Wikipedia:是日正文/2020年3月
物理係一門自然科學。佢主要研究嘅係宇宙嘅基本組成要素：物質、物質喺時間同空間入面嘅運動、同埋好似係能量或者力呢啲相關嘅概念都係物理嘅研究題目－細至構成物質嘅基本粒子，大至成個宇宙，都係物理學嘅研究範圍。佢主要係透過分析同發現宇宙嘅基本定律（呢啲定律通常係用數學方程式嚟表達嘅）嚟去了解宇宙點運行。因為宇宙入面幾乎所有嘢都會受制於呢柞定律，物理學可以話係自然科學之中最基本，覆蓋面最廣嘅。
物理學係其中一門歷史最悠久嘅自然科學，成 2,000 年之前嘅古希臘已經有人喺度研究。雖然係噉，響一至廿世紀嘅大多數時間，物理都俾人睇成一種自然哲學，要去到成 17 世紀左右科學革命打後，物理學先至自己分咗出嚟做一門獨立學科。物理學同數學之間亦都有好密切嘅關係－物理定律往往都係要用算式物理公式嚟表達先至夠精確；而且物理學係一門好基礎嘅科學－其他自然科學（好似係生物學、化學、地質學）研究嘅對象都係會遵守物理定律嘅，所以好多科學家都會同物理學家合作搞跨學科研究；最後，物理亦都同各門工程學有啦掕，好多科技上嘅發明都要靠物理嘅知識先整到出嚟。(成篇文章……)