Wikipedia:是日正文/2025年7月

1897 年一個科幻故仔當中所想像嘅外星人侵略；「外星人侵略地球」喺當時係比較嶄新嘅諗頭。

科幻，全名叫科學幻想，係推想型故仔下嘅一個體裁，泛指一啲集中於科學同先進科技相關主題嘅故仔。對於「科幻故仔」呢個詞要點定義，2020 年嘅科幻界仲未有完全一致嘅共識，不過一般認為，科幻故仔傾向具有以下嘅特徵：

• 背景設定設於未來嘅世界，
• 會有一啲（由作品出嘅年代嘅角度睇）先進嘅科技；
• 喺主題上，好多時會係關於一啲當代有關科學同科技嘅哲學問題；
• 常用嘅橋段包括咗好似人噉嘅人工智能以及時間旅行等等。

科幻俾人稱為「諗頭嘅文學」，因為科幻作品成日會引起人對當代科學科技構思嘅思考。好似係由美國著名導演史匹堡執導嘅戲《人工智能》噉：呢套戲嘅主角係一個俾人類創造，用嚟俾啲冇仔女嘅夫婦有得湊細路嘅機械男仔大衛，佢由俾養母抗拒至受接納，後嚟再因為想變成一個有血有肉嘅人類而出發冒險，當中有一幕係噉嘅：大衛俾一班仇視機械人嘅人類捉咗，而當嗰班仇視機械人嘅人類打算當眾處死大衛嗰陣，圍觀嘅人見到大衛迫真嘅外形同佢嘅行為舉止，以為佢係一個真嘅人類細路而反對處死佢。呢一幕令到好多觀眾反思到底內部用金屬造但有情感嘅大衛算唔算係一個「人」－一個人工智能要點樣先算係一個「人」正正係人工智能哲學上一條受關注嘅問題。 (成篇文章……)

以前嘅正文： 電腦科學 – 腦電圖 – 神經細胞