唐韻
《唐韻》（粵拼：tong4 wan5）係中國韻書，大唐人孫愐所編纂。成書約莫開元二十年之後（一說成書於751年，另一說係733年），係陸法言《切韻》嘅增修本。原書好早就散佚，冇傳到而家，但宋代時又修訂咗次《唐韻》，編成《大宋重修廣韻》。
按大清卞永譽所寫《式古堂書畫彙考》，收有大唐元和年間嘅《唐韻》寫本殘目，記載住序文同各卷韻數，全書五卷，韻目共195韻，個數同稍早王仁昫寫嘅《刊謬補缺切韻》一樣，同樣上、去二聲都多《切韻》一韻。但就唔知韻嘅排佈以及內容係咪等同。
現存有蔣斧舊藏版本嘅《唐韻》殘卷（殘留住一部分嘅去聲同埋入聲），但當中韻嘅數目同卞永譽講嘅有相當大嘅出入，現時唔係咁清楚從原先孫愐版開始，佢經歷過何種程度嘅改訂。另外佢亦有敦煌殘卷（P2018，平聲「東·冬·鍾」嘅一部分）。
王仁昫《刊謬補缺切韻》，亦係切韻增修本，早過《唐韻》。但孫愐利用朝廷擴大《唐韻》影響，所以《唐韻》雖則係孫愐私人著作，然而命名有官方性質，有名氣過《刊謬補缺切韻》。范鎮《東齋記事》講，「自孫愐集為唐韻，諸書遂廢」。王仁昫《刊謬補缺切韻》同孫愐《唐韻》，都為韻字加入注釋，並且引文亦有出處，於是乎，韻書就有辭書字典之用。