新文學運動

新文學運動（粵拼：san1 man4 hok6 wan6 dung6），又叫白話文運動，係喺 1910 年代嘅大中華地區發起嘅一場改革，提倡「言文一體、我手寫我口」。用白話文（語體中文）嚟取代文言文寫嘢。

語體中文喺文法同用字上係建基於標準官話嘅。

歷史背景

睇埋：文言文

一路直至廿世紀為止，大中華地區同世界好多其他地區一樣，有雙層語言嘅情況：文言文係儒學文獻嘅基礎，喺文法同用字上接近春秋戰國時期嘅上古漢語；不過有估計話到咗漢朝嗰陣，文言文已經脫離咗口語，唔再係任何人嘅母語）。而喺打後嗰 2,000 幾年間，啲人寫親「正經嘢」，通常都係要寫文言文嘅，要寫上古漢人嘅口語；例如曹雪芹喺乾隆 49 年甲辰（1784 年）用白話文嚟寫《紅樓夢》，就有畀人話佢寫白話「唔得文雅」。喺呢種情況下，文言文係 H 語言（高威望）而各漢語口語係 L 語言（低威望）。

順帶一提，查實成個漢字文化圈都有噉嘅歷史—日本、韓國同越南都深受儒教影響，廿世紀前都或多或少有「正經嘢要寫文言文」嘅情況。

粵語問題

睇埋：雙層語言同粵文

粵語地區嘅人可以用粵音朗讀用中文字寫嘅語體中文，但「粵音讀語體中文」喺多數情況下，依然明顯唔似自然粵語講嘢，舉一句例句：

語體中文	請給我他的書。
標官讀	Qǐng gěi wǒ tā de shū。
粵音讀	Cing2 kap1 ngo5 taa1 dik1 syu1。
粵文 / 粵白	唔該畀佢本書我。
粵音粵文	M4 goi1 bei2 keoi5 bun2 syu1 ngo5。

到咗廿一世紀初，大中華地區多地（例如港澳）被指係仲有雙層語言嘅現象：啲人當咗語體中文係 H，政府公文同報紙等都係攞語體中文嚟寫，學校教嘅亦主要係語體中文；同時喺粵語區，啲人會以學母語嘅方式（即係細個嗰時喺屋企聽屋企人講嘢）嚟學粵語（L），粵文喺電視同漫畫等嘅娛樂媒體當中都可以見得到，而且啲人屋企人朋友之間傳信息或者喺互聯網論壇留言，亦都成日會用粵文。

睇埋

• 雙層語言