荃錦公路
荃錦公路（英文：Route Twisk）係喺香港新界，荃灣區同埋元朗區錦田之間一條南北走向馬路。北面同錦田公路同埋林錦公路連接，南面喺荃錦交匯處同象鼻山路、大河路北同埋德士古道北連接。呢條路有啲路段喺郊野公園入面，全長大概11.3公里（大概7英里），闊大概7.2米（大概24英尺）。
呢條路多斜多彎，途經香港最高嘅山大帽山嘅山腰，連接新界荃灣、錦田同埋石崗軍營。
歷史
[編輯]1951年至1952年，駐港英軍為改善石崗軍營嘅對外交通，請咗英國皇家工程隊來港進行軍事工程，起荃錦公路。呢條路起初只係畀軍車同埋緊急車輛用，但喺1960年代，港英政府同埋駐港英軍磋商開放荃錦公路嘅可能性，經過多次磋商，軍方同意將荃錦公路移交畀港英政府，條路喺1961年5月25號開放畀公眾用。
呢條路嘅荃灣終點原本係喺青山公路荃灣段，但由於香港地鐵（家下港鐵）起荃灣綫，因此荃錦公路縮短到荃錦交匯處。
由於荃錦公路狹窄多彎，而車流亦一直偏低，幾十年來一直都有賽車發燒友喺道賽車。
英文名
[編輯]荃錦公路嘅英文名格式，同香港其他馬路嘅音譯（Tsuen Kam Road）唔同，而係「Route Twisk」，噉係因為同佢曾經係軍用道路有關。據聞現時嘅英文名係由「TW / SK」演變而成，其中「TW」代表荃灣（Tsuen Wan），「SK」 就代表石崗（Shek Kong）。「TW/SK」可以解做荃灣連接石崗。後來因有關部門將TW/SK中嘅斜綫誤當成字母I，所以變成「Route Twisk」。後人一直冇執番正。
公共交通
[編輯]因為荃錦公路嘅路面關係，行荃錦公路嘅車唔可以長過10米。途經嘅巴士線亦只可以用較短身嘅車，長期以來大部分都只係使單層巴士，九龍巴士（九巴）曾經特別為呢條路線（51）買同埋改裝特別引擎配搭嘅都城嘉慕威曼都城巴士雙層巴士，以應付路面情況，但由於損耗嚴重，巴士好快就調去普通市區線，而再換入另一批車行。呢個情況一直維持到1998年10月19號，51線改為全冷氣服務為止，之後九巴一直派配手動減速器嘅丹尼士飛鏢行，2011年改派配手動減速器嘅亞歷山大丹尼士Enviro 200。