林大輝

出自維基百科,自由嘅百科全書
跳去: 定向搵嘢
林大輝議員Lam Tai Fai

林大輝 (Lam Tai Fai,1959年11月22日-)SBS,BBS,JP,香港出世,祖籍廣東潮州。而家係香港立法會議員,身兼全國政協委員同埋河南省政協常委。2000年榮獲香港青年工業家獎、2000年同2004年分別獲香港理工大學頒發大學院士同工商管理榮譽博士學位、2005年獲港府委任做太平紳士 (JP)、2006年同2012年分別獲頒授銅紫荊星章(BBS) 同銀紫荊星章 (SBS)。

簡歷[編輯]

林大輝喺新界元朗屏山村長大,佢喺上水鳳溪第一中學畢業,1981年完成香港理工學院紡織工藝學,就加入咗半島針織集團做練習生,由低層做起,十年之間晉升做集團董事總經理。2007年佢離開咗半島針織集團,全職投身政界,同一年獲委任沙田區區議員;2008年競逐並當選第四屆香港立法會工業界(第二)議員;2012年再自動當選,連任第五屆立法會的工業界(第二)議會代表。

佢好多次獲邀請出任紡織及時裝界相關公職,包括時裝業發展統籌委員會督導委員、工業貿易署紡織業諮詢委員(TEXTAB)、職業訓練局轄下紡織及製衣業訓練委員會副主席、香港知專設計學院顧問委員會委員等。另曾任創新科技署創新及科技基金評審委員會委員。 佢做過好多重要政府公職,包括製衣業訓練局主席、監警會副主席等等,協助特區政府制定政策同推行措施。佢亦都擔任好多個本地商會同社團嘅首長級職務包括香港中華廠商聯合會副會長、香港紡織業聯會副會長、香港紡織商會常務副會長、香港羊毛化纖針織業廠商會會長、香港紡織及服裝學會會長、香港青年工業家協會副會長、新界潮人總會副主席、香港童軍總會副會長等等,積極推動工商業發展,團结社會。

支持教育事業[編輯]

林大輝好相信教育係「富國興邦之本」。2000年捐錢俾理大創辦第一個「服裝及紡織品設計」全日制碩士課程;2002年同鄭州中原工學院合辦「亞太國際服裝學院」,為內地培育新一代嘅時裝設計專才。 2004年佢喺沙田區創辦直資英文中學「林大輝中學」,校監同校董會主席,以學生全人發展做目標,喺傳統嘅文法課程之外,加入時裝設計、運動科學、創意科技及健康教育等嘅特色科目,將藝術、體育同學術科目合而為一,希望為社會培育唔同類型嘅人才。2006年喺大陸展開捐建小學嘅教育工程,包括已經喺河南同埋青海興建一共22間小學。佢而家係河南省政協常務委員,為河南同埋香港兩地嘅交流貢獻唔少。2001年佢被選為傑出理大校友,兼且喺2002同2007年分別擔任「理大畫出彩虹」同「和諧團結創旗蹟」活動籌委會主席,打破咗健力士世界紀錄,慶祝母校創校六十五同七十周年。佢曾經係校董會成員、理大校友會聯會副主席,而家係顧問委員會成員。


支持香港體育[編輯]

1990年代,佢曾經先後擔任香港甲組足球聯賽球隊流浪同埋愉園班主,攞過好多冠軍。跟住2007年8月至到2011年擔任沙田足球隊班主,帶領球隊由丙組一直升上去甲組,參加2009-10年度甲組聯賽。

佢亦都係香港手球總會會長及董事會主席,係2008北京奧運的120名香港火炬手之一,亦係香港2009東亞運動會嘅大力支持者之一。2009年佢出任香港體育學院董事,大力推動香港精英體育培訓。


立法會[編輯]

林大輝喺2007年獲委任做沙田區議員,開始投身議會工作。

2008年立法會選舉,林大輝參加功能界別工業界(第二)選舉,順利當選第四屆立法會議員。

2012年立法會選舉,林大輝喺冇對手之下再次自動當選,連任第五屆立法會嘅工業界(第二)議員。


名下賽馬[編輯]

佢名下馬匹都係用「繼續」、「奇妙」嚟命名,包括繼續加速、繼續勝利、極奇妙、確奇妙、好奇妙、更奇妙、真奇妙、太奇妙、超奇妙、小奇妙。

[編輯]

出面網頁[編輯]