林大輝

林大輝，BBS，JP係香港立法會議員（工業界(第二)功能界別），沙田區議會委任議員，半島針織集團董事總經理。

林大輝嚮香港出世，鄉下嚮廣東潮州，而家係全國政協委員，兼係製衣業訓練局主席、香港中華廠商聯合會副會長、港府紡織業諮詢委員會、職業訓練局…多個專責小組嘅委員、警監會副主席，佢亦係2000年香港青年工業家獎得主、香港理工大學工商管理榮譽博士；2005年太平紳士、2006年銅紫荊星章得主。

簡歷

林大輝細個住喺元朗屏山，小學讀達德學校。大學讀香港理工學院紡織及製衣學系，之後投身香港工業25年，做過唐翔千家族嘅半島針織集團董事總經理。而家係香港紡織商會常務副會長、香港紡織業聯會理事、香港專業及資深行政人員協會創會副會長、香港青年工業家協會榮譽顧問、香港羊毛化纖針織業廠商會名譽會長。

支持教育事業

林大輝嚮2004年創立林大輝中學，特設時裝設計、運動科學、創意科技同健康教育科目。重嚮香港理大「時裝及紡織品設計」全日制碩士課程，提供獎學金贊助中國內地大學時裝設計系老師黎香港深造。2002年佢嚮鄭州中原工學院創辦「亞太國際服裝學院」。重搞緊「飛揚小學」教育工程，嚮河南、青海起咗23間小學。

林大輝重做埋香港童軍總會副會長、香港理工大學校董會成員。

支持香港體育

林大輝自從小學已經鍾意踢波。1990年代，做咗香港甲組足球聯賽球隊流浪、愉園班主，由2007年8月起，擔任沙田足球隊班主，帶隊踢到上甲組。

林大輝重做埋香港手球總會會長兼董事會主席，2008年夏季奧林匹克運動會兼做埋120名香港火炬手之一，香港2009年東亞運動會佢都有份支持。

區議會同立法會

林大輝係沙田區議會委任議員。嚮2008年立法會選舉，功能界別出選，由於對手呂明華宣佈棄選，林大輝自動當選。

2009年11月18日立法會會議，林大輝問唐英年交出普選路線圖，佢言論覺得佢「泛民上身」。

名下賽馬

林大輝同老婆蘇麗貞都係香港賽馬會會員，買咗幾隻賽馬叫做繼續加速、繼續勝利、極奇妙、確奇妙、好奇妙、更奇妙、真奇妙。

睇埋

• 林大輝中學

出面網頁

• 議員履歷。 香港立法會。