亞洲象

How to read a taxobox 亞洲象
瀕危指標
瀕危 (EN)
物種分類
界 動物界 Animalia 門 脊索動物門 Chordata 綱 哺乳綱 Mammalia 目 長鼻目 Proboscidea 科 象科 Elephantidae 屬 象屬 Elephas 種 亞洲象種 E. maximus
二元學名
Elephas maximus Linnaeus, 1758
亞洲象而家嘅分布

亞洲象（英文：Asian Elephant 或 Asiatic Elephant），又叫印度象，係亞洲體型最大嘅陸上哺乳動物，但比非洲象細隻。鼻端有一個手指咁嘅突起，象公冇象牙，即使係象公亦有一半無象牙或者象牙好細，耳仔比較細、較圓，前腳有 5 隻腳趾，後腳有 4 隻腳趾，共有 19 對肋骨（其中蘇門答臘象有 20 對，但比非洲象少一對），頭骨有兩個突起，背脊拱起。性情溫和，比較容易馴服。響野外，老虎、豹同人類係亞洲象嘅主要敵人。

分佈

目前，亞洲象分布喺印度、尼泊爾、斯里蘭卡、緬甸、泰國、越南、印尼同馬來西亞，響中國以前分布亦好廣，由黃河以南大部分地方都有，但而家就只剩底雲南西雙版納一帶先至有。過往可再分4個亞種：印度象、錫蘭象、馬來西亞象、蘇門答臘象。此外，重有幾個亞種，馬來西亞有一種亞洲象亞種 —— 婆羅洲侏儒象，體型更細，係最近幾年先至俾人發現。

用途

亞洲象響南亞國家馴服咗嚟使，響交通唔方便嘅森林搬木材等。相比之下，非洲象其實都可以馴養，只係冇亞洲象咁「機智靈敏」啫。

古代亦有人訓練做戰象，馬其頓嘅亞歷山大大帝進攻印度時，就係俾佢哋從未見過嘅戰象擊敗。

歷史文化

亞洲象響古代中國唔單止係南方鄰國進貢嘅禮品，皇家多馴養象用於典禮時顯示威儀，甚至用嚟打仗。古時響黃河流域重係用嚟耕田嘅家畜。響《呂氏春秋》裏面，亦記載咗商王曾經騎象攻打東夷部族。古時亦有「曹植稱象」嘅故仔 。

響泰國，象係國家象徵。泰國好多府嘅府徵都有象嘅圖案。相傳白象為古時泰北嘅蘭納泰王朝帶嚟幸運，自此成為泰國嘅國寶。泰國皇室勳章最高級嘅係皇家白象勳章。因為2006年從2月到7月大象嘅數目增長三倍有多，而家喺泰國主要用象嚟當車咁租畀人。11月1日定為象節，嗰日會揀一啲強壯嘅大象，嚟參加拔河、舉重、踢波、越障礙跑等比賽項目嘅大象運動會。

喺斯里蘭卡，亞洲象被視為莊嚴嘅象徵。而喺印度，就被視作吉祥物，佢哋成日出現喺重要嘅禮儀慶典。

喺美國，第一隻入境嘅亞洲象係喺1796年，而第一個文獻記載嘅圈養亞洲象出世記錄喺1875年，位於Missouri嘅Saint Joseph裏面。

喺香港，雖然重未發現過亞洲象嘅化石，但學者估計，后海灣沼澤森林同吐露港一帶附近亦曾經出現過。因為廣東、廣西一帶響 17 世紀初（明朝末年）仍然有亞洲象，嗰時軍隊中重有一隊用嚟做運輸同騎嘅大象。

大象天奴係以前荔園動物園所養嘅亞洲象，可惜響1989年2月染急性肺炎而人道毀滅。其後亦有兩次有大象從泰國運港作短期展出。而1975年嗰時，據講泰國有一個馬戲團嚟過香港表演，但反應唔理想，於是將 9 隻大象寄居荔園，重要籌錢將嗰班大象送返泰國。

相

• 
  亞洲象食緊西瓜
• 
  亞洲象嘅骨架
• 
  斯里蘭卡象搬嘢
• 
  雌性亞洲象 Elephas maximus 喺英國嘅動物院