李璟

  呢篇文講南唐皇帝。想搵北朝人嘅話，請睇李璟 (北朝)。

李景
南唐皇帝／江南國主
元宗孝皇帝李景
南唐皇帝
在位	943年～958年
加冕	943年4月8號
前任	李昪
繼任	冇
江南國主
在位	958年～961年
前任	冇
繼任	李煜
私人明細
妻妾	光穆皇后鍾氏 凌氏
仔女	仔女一覽 李弘冀 李弘茂 李從慶 李煜 李從善 李從鎰 李從謙 李從信 太寧公主 永嘉公主
年號	年號一覽 保大：943年農曆三月～957年 中興：958年農曆正月～二月 交泰：958年農曆三月～五月 改用後周年號 顯德：958年農曆五月～960年 改用宋朝年號 建隆：960年～961年
諡號	明道崇德文宣孝皇帝
廟號	元宗
父	李昪
母	宋福金
出世	916年
過世	961年8月12號
安葬	962年2月26號 順陵

李景（粵拼：lei5 ging2；916年—961年8月12號），字伯玉（baak3 juk6），係五代十國時代（10世紀）南中國嘅南唐第二位皇帝（國主），943年到961年在位，跟廟號叫唐元宗（tong4 jyun4 zung1），歷史上又叫南唐中主／嗣主（naam4 tong4 zung1 zyu2 / zi6 zyu2）。佢原來嘅名叫徐景通（ceoi4 ging2 tung1），南唐建國後恢復本姓李，改名叫李璟（lei5 ging2），臣服後周後因爲要避諱周信祖郭璟（周太祖郭威嘅太太爺）嘅名，而再改名做李景。佢係烈祖李昪嘅大仔。

喺佢統治初頭，佢擴張勢力，通過進攻週邊小國來爲南唐開疆：945年滅亡閩國，951年滅亡楚國。不過，戰爭亦損耗咗國家元氣，令佢喺956年喺後周軍隊面前輸得慘重，於是喺958年佢唯有江北嘅州割畀後周，去帝號，向北朝皇帝稱臣朝貢（先係後周，後來係北宋）。

出身

李景，原名徐景通，喺916年出世。佢嘅老豆徐知誥嗰陣時做緊吳國昇州刺史，喺契老豆徐溫帳下（亦即徐景通嘅契阿爺），徐溫當時攬住吳國嘅實權。佢係徐知誥嘅大仔。佢嘅阿媽係徐知誥嘅第二位老婆，宋福金，佢又生咗另外三個仔，李景遷、李景遂、李景達。

吳時

923年，嗰陣時徐知誥代徐溫攝緊政，出咗件大事，將領鍾泰章，佢曾經擁護徐溫攬權，而家佢畀人指罪佢食賄賂。徐知誥想重手懲罰鍾泰章，不過徐溫念在鍾泰章對佢自己嘅功勞，於是無責罰佢，仲提議徐知誥娶鍾泰章嘅女做徐景通嘅新婦（sam1 pou5），不過唔清楚婚事係喺正嗰年辦定數年後。925年，徐景通嗰年先9歲，封做駕部郎中，係個喺兵部嘅監察官職。之後佢入到宿衛軍隊。930年，嗰陣時徐知誥頂替徐溫攝政，徐知誥準備自江都移都到佢嘅根據金陵（之前嘅昇州），留徐景通喺江都管政事，封佢做兵部尚書同參政事（攬權宰相）。930年，徐知誥嘅軍師宋齊丘推辭唔做佢嘅謀士，徐知誥派徐景通上宋齊丘嘅府第，勸到佢返朝廷。嗰年年尾，徐知誥移出江都，入到金陵，又留徐景通喺江都攝政，有宋齊丘同王令謀輔佐佢。徐景通封做司徒（三公之一）、同中書門下平章事（宰相）、知中外左右諸軍事（軍隊統領）。

934年尾，徐知誥自江都召徐景通返金陵輔佐佢，封徐景通做鎮海同寧國嘅節度使、諸道副都統、判中外諸軍事。佢嘅細佬徐景遷替補喺江都攝政。

935年尾，爲咗準備篡位，徐知誥逼吳帝楊溥封佢做齊王、大元帥。936年頭，做咗大元帥後，徐景通做咗太尉（三公之一）。937年，徐知誥封徐景通做齊國王太子，不過徐景通推辭唔做。

父皇李昪時

937年冬，徐知誥逼楊溥讓位畀佢，結束吳朝，建立齊朝。喺嗰段時間，徐景通封做諸道都統，即係全國各鎮嘅總指揮，無耐立爲太尉、尚書令、封號吳王。佢嘅名亦由景通改成璟。938年，佢改封爲齊王。

939年，徐知誥改返自己親生老豆嘅姓李，改名成昪。由齊改國號做唐。徐璟同皇家其他人（除咗徐温嘅親生仔女）都改姓李。李昪落令話國中政事交畀李璟決定，國君只直接處理關鍵軍事問題。嗰年尾，李昪想立李璟做太子，但佢唔愛，於是李昪改爲進封佢個高貴名號大元帥，有權指揮全國軍隊，領銜太尉、錄尚書事，統領國家政務，做揚州同昇州刺史（南京同江都）。940年秋天，李昪立佢做皇太子，仲保留佢嘅大元帥、錄尚書事，不過佢都唔制，由於噉，李昪聽佢話，但落令畀各官，要對佢似太子噉用禮。940年尾，道士孫智永叫李昪巡遊江都。李昪聽咗，留李璟喺金陵做攝政，而佢去巡遊。國君喺嗰度留咗段時間，不過之後睇嗰度冰雪咁凍，決定走返金陵。

942年，宋齊丘發難謯（naan6 zaa2）話實權唔多，李昪畀佢權去管尚書省，李璟嘅細佬李景遂得權去統領中書、門下省，李璟做呢兩個人嘅監官。（不過，呢個局面未持續到呢年年尾，宋齊丘嘅輔佐夏昌圖畀人捉到佢食賄賂，不過宋齊丘唔想處死佢。李昪好嬲，落令斬夏昌圖嘅頭，宋齊丘怨恨，於是辭退。）

咁多年來，宋齊丘經常讚頌李璟嘅細佬李景達，李昪對佢評價亦幾高，曾經想立佢做繼位人。不過，因爲李璟已經長成，佢嘅太子位穩定咗。因爲呢個理由，李璟好唔鍾意宋齊丘。有次李昪去李璟屋企，睇到佢共家人唱歌——李昪就噉睇佢輕浮，由於噉連日來李璟被責罰。李昪嘅愛妾种氏，生得幼子李景逷，趁住機會說服李昪廢李璟而立李景逷做太子。不過李昪好嬲鬧：「我嘅仔犯錯，我責罰佢係天經地義。你係女人，點敢干預國事？」於是趕种氏走，要佢出家做師姑。嗰陣時，李璟下面嘅官陳覺、馮延巳同宋齊丘關係親切，打擊朝中其他人。常夢錫同蕭儼都同李昪告話陳覺濫用權力，而史書亦話李昪都贊成個控告，不過佢未有行動，因爲943年春天時，因爲佢想長生而濫用丹藥，結果病咗。3月30號，李昪召李璟來病牀，託付國事後就過世。李璟無立即發喪，而係落詔話攞李昪嘅名義封李璟做攝政，然後落令大赦。嗰陣時大臣孫晟提防陳覺佢哋濫權，驚新君制唔住佢哋，由於噉宣佈話李昪嘅遺言想宋皇后做李璟嘅攝政，不過大臣李貽業指出話李昪唔想婦女執政，又話若果有噉嘅詔旨，佢會撕爛嗰份詔，孫晟聽佢話。無耐，李璟宣佈父親過世，之後繼位。

頭個時期

繼位後，李璟尊母后宋氏做皇太后，而正妻鍾夫人做皇后。嗰陣時佢用宋齊丘同周宗，佢睇呢兩個人喺國中有威信，於是畀佢哋做宰相，具體職名係中書令同侍中，但啲緊要決定仲係由佢來決定。佢畀自己細佬封王：李景遂從壽王改封燕王，李景達從宣城王改封鄂王。史書記話佢繼位後，佢交付好多重責畀陳覺，又包括一班顧問，包括陳覺、馮延巳、馮延魯（馮延巳嘅細佬）、魏岑、查文徽。佢哋喺朝中攬得好大嘅權力，利用皇帝爲自己謀利，當時稱呼做五鬼。不過，之後冇耐，陳覺因爲母親喪事而免職，令呢個聯盟破散，而魏岑攞呢個機會攻擊陳覺，醜化佢。隨住陳覺離開朝中，李璟不滿於宋齊丘多次同周宗嘅不和，李璟貶宋齊丘做鎮海節度使，之後，宋齊丘好嬲而辭職，李璟準佢。

呢年年尾，有講法話李昪在生時曾經有意思想之後各個仔都互相讓位，於是李璟封皇弟李景遂做大元帥、齊王，畀佢住喺東宮，亦即太子住嘅地方，而封李景達做燕王。佢公開表示意思，話過世後會讓位畀呢兩個細佬，但佢哋拒絕接受呢個更高嘅名號。李景遂改佢嘅字做退身，話自己唔適合呢個位置。李璟亦封皇長子李弘冀做南昌王，佢最細嘅細佬李景逷做保寧王。宋太后好憎李景逷，因爲之前种夫人謀求廢李璟來令自己嘅仔做太子，所以佢想殺李景逷，但係有李璟保佢，保住咗李景逷條命。

942年冬天，張遇賢領導嘅農民起義爆發。張遇賢起兵喺南唐嘅鄰國南漢，之後轉活動地區去北方，李璟派大臣嚴恩做將軍，邊鎬做監軍，進攻張遇賢。邊鎬用白昌裕做謀士，進攻、打敗對手。張遇賢嘅手下李台造反，捉咗上頭，捉到去金陵處決。

944年春天，馮延巳、魏岑同查文徽搵辦法擅權，佢哋利用皇帝想讓位畀皇弟嘅意思，勸佢出詔旨話：「齊王景遂監守國政。各官當中，只有魏岑同查文徽先得見寡人同齊王來講事；未得召集時，唔得來謁見。」呢個決定令成個朝廷震驚，蕭儼上表勸諫都唔得。最後，掌控軍隊嘅賈崇得入謁見，跪低求佢，指出噉樣嘅行動會支割皇帝同各大臣，李璟先至收返命令。947年春天，李璟立李景遂做皇太弟，李景達做齊王，李弘冀做燕王，李景達兼任大元帥，李弘冀做副。

消滅閩國

李璟改變老豆李昪保守嘅政策，烈祖嘅政策係注意內治，而佢則係大規模對外用兵，係噉侵犯周邊國家。

大閩割據喺而家福建省，係南唐南邊嘅鄰國，943年尾，閩國因繼承人爭位而內亂。閩帝王延曦同皇弟王延政爭執，而王延政亦自稱皇帝，起國號做殷。李璟寫信畀兩邊，怪責佢哋兄弟不和，勸佢哋和解返。兩邊都唔聽，王延曦引話佢呢下似周公消滅佢細佬管叔鮮同蔡叔度嘅叛亂、亦似唐太宗殺李建成同李元吉；而王延政寫信鬧李璟父子劫咗吳國嘅位。李璟嬲，同殷國絕交。944年夏天，王延曦畀朱文進殺害後，朱文進自稱做閩王，派使臣到南唐設立關係。不過，李璟捉咗使臣，準備進攻朱文進，由於時節熱，加上天災接連，令唐軍最後無出軍。

944年尾，查文徽立計劃進攻殷國首府建州，雖然遇到好多反對，李璟派查文徽指揮軍隊打殷國。查文徽進軍到信州，埋近殷國領土，佢上表話征伐會成功。李璟之後派邊鎬去幫查文徽。不過，場戰役唔得順利。殷國將領吳成義當時進攻緊閩國首府長樂，決定借呢個機會對閩人話南唐軍係來幫殷國進攻朱文進，令成座長樂城騷動。閩將林仁翰亦因此反叛，打返主家，殺朱文進同連重遇，開城門畀吳成義入城。之後無耐，王延政稱做大閩皇帝，不過仲係建都喺建州，而唔係搬去長樂。南唐將領祖全恩畀李璟派去幫拖查文徽，引軍打敗由閩國丞相楊思恭指揮嘅閩軍，然後包圍建州。保大三年（945年）秋天，建州失守，王延政投降南唐，閩國實際上滅亡。不過，南唐將領喺進攻建州時一直搶劫，令閩人好驚。開頭閩人仲歡迎唐軍，將佢哋睇做救星，來幫佢哋脫離混亂境況，所以佢哋感到失望，但李璟無追究啲將領，因爲佢哋立咗消滅閩國嘅大功。

開頭，建州失守後，成個閩國歸服南唐，包括福州（即係長樂），呢陣時福州受李仁達管控，初頭李仁達喺福州反叛王延政，當建州被包圍時佢投降南唐，於是李璟因此封官畀佢，賜名做李弘義。然而，建州失守後，福州仲未完全畀南唐控制。陳覺嗰陣時係樞密使，派咗去說服李弘義到金陵去同李璟稱臣。但陳覺到咗福州，李弘義接待淡薄，令陳覺唔敢講入朝嘅嘢。當返到劍州時，陳覺悔恨，於是用李璟嘅名義命令李弘義入朝，然後自己自稱做福州監軍。李弘義唔制，戰爭爆發。李璟覺得陳覺未得自己意旨就恣意行動，但由於啲官嘅說服，於是佢同意舉兵幫陳覺。南唐各將立起咗福州包圍網，起頭幾順利，王崇文做元帥，但陳覺、馮延魯、魏岑都恣意行動，仲有留從效同王建封唔服從、唔遵命，佢哋相互爭功，進退無相應。

李弘義同吳越稱臣，改名成李達。947年夏天之前，吳越軍開進福州。南唐軍畀吳越越過自己嘅領地來到閩地，希望可以攻破入城、佔領福州。但吳越軍打敗咗南唐嘅力量，解圍福州，於是李璟輸咗畀吳越嘅錢弘佐。之後，留從效引軍返佢嘅巢穴泉州，撇甩南唐軍，由於噉，雖然仲同南唐稱臣，但而家福建南部都由留從效管轄。（由於噉，南唐爭得嘅閩國領土事實只有西北部同建州週邊區域）。李璟對呢次失敗好嬲，想處死陳覺同馮延魯，但最後由於宋齊丘同馮延巳嘅勸阻，只流放咗佢哋。

950年，查文徽做緊永安節度使，收到條流料消息，話吳越放棄咗福州，於是決定引軍攻打。當佢埋近時，遇到吳越威武將軍嘅埋伏，畀佢打敗，佢本身亦被捉。吳越國王錢弘俶交返查文徽畀南唐，前提係南唐亦交返被捉嘅吳越將領。之後，南唐軍無再打任何戰役去攞返舊時閩國嘅全部領土。

同北朝嘅外交

947年春季，契丹軍侵略中原，消滅後晉。遼太宗耶律德光喺中原自稱皇帝。李璟寫信祝賀契丹皇帝，同時亦因爲李昪自稱係李唐皇室嘅後裔，令佢想派人去拜下唐朝皇帝嘅陵寢。太宗皇帝唔畀，但亦派使者南下答覆。嗰陣時，好多後晉大臣唔想臣服契丹人，於是逃脫去南唐，而且淮河北面嘅農民首領挨住唐晉邊界亦願同南唐稱臣。大臣韓熙載提議南唐派軍北伐，收復中原，但因爲嗰陣國中兵力都抌喺福州戰場，所以無辦法踐行，令李璟無限可惜。當李璟得知契丹軍放棄大梁、走返北方，佢都想北伐，畀李金全統領軍。不過唐軍仲未出外，晉國將領劉知遠就佔咗大梁，稱做後漢皇帝，李璟唔敢同劉知遠作對，於是撤軍。

948年頭，劉知遠死，佢嘅仔劉承祐繼位，後漢將領李守貞喺河中叛亂，遣使求援南唐。李璟派李金全北伐。李金全軍隊進入後漢領土，到沂州，但由於河中幾遠，要完全越過後漢埞方，南唐軍會無精神戰鬥，所以李金全撤軍。李璟寫信畀劉承祐道歉，請後漢皇帝寬恕李金全，修補通商關係。漢帝冇答佢。之後冇耐，李金全畀後漢將領郭威打敗。951年，郭威奪帝位，立後周。

952年頭，後漢將領慕容彥超（後漢高祖劉知遠嘅同母弟）起兵反抗後周，派人求援南唐。不過，南唐救援軍畀後周擊退，冇耐慕容彥超被打敗。郭威交返南唐俘虜燕敬權，反返轉頭，李璟亦交出之前畀江南捉到嘅中原將領。

史書記話李璟鍾意文學，嗰陣時，啲文士湧去南唐，令呢度變成當時中國最大嘅文學中心。不過，朝廷冇組織科舉選官。952年，李璟落詔恢復科舉，派江文蔚負責。皇帝問呢個科舉同唐時制度嘅比較（南唐認唐朝做自己祖先），江文蔚答話：「喺前朝，半數人靠佢哋嘅才能獲得任用，一半係由個人愛惡選拔。下臣只靠才能而錄用。」李璟鍾意，但大臣張緯曾經喺唐時登第，聽到嗰啲話，對江文蔚好不平，開始傳啲對科舉嘅異議。仲有，朝中嘅大臣親信都唔係出身自科舉，由於噉佢哋都唔贊成。因爲噉科舉就冇開成。

消滅楚國

之後南唐西面嘅鄰國、割據喺而家湖南省嘅南楚亦爆發咗後繼者爭奪戰，喺馬希廣同馬希萼兩兄弟間。馬希萼阿哥馬希範傳位畀馬希廣，馬希萼就好唔忿，因爲佢先係歲數大嘅人（馬希萼係馬希廣嘅哥），於是喺949年叛亂，攻佔咗武平做獨立勢力，楚國內訌。950年春季，馬希萼唔忿後漢皇帝，因爲噉拒絕來往，遣使上表向南唐稱臣，同南唐聯手。嗰年尾，馬希萼佔得楚國國都潭州，殺害咗馬希廣，馬希萼自稱做楚王。佢繼續低身做南唐嘅臣下，派劉光輔去南唐。作爲答覆，李璟派孫晟同姚鳳到潭州晉封馬希萼做楚王。不過，劉光輔又勸李璟話楚國衰弱，重兵鎮守唔得住。李璟派邊鎬去袁州，搵時機打楚國。之後冇耐，武平嘅官王逵同周行逢因爲不滿馬希萼，就出走潭州，到武平首府朗州，佔守呢笪埞，廢留後馬光贊（馬希萼嘅仔），扶馬殷嘅長孫馬光惠上位，但把佔曬權衡事宜。馬希萼同李璟講呢件事，李璟遣使到武平招諭佢哋，希望佢哋臣服自己。不過王逵哋攞曬贈禮，而趕咗使者走。之後佢哋又改尊劉言做武平節度使，劉言遣使要求公認，李璟冇答佢。由於噉，劉言同後周稱臣（由郭威開國，係接喺後漢之後嘅朝代）。

入咗潭州後，馬希萼成日醉酒，唔關心到國家事務。第年951年（保大九年）秋天，潭州嘅將領反佢，馬希萼畀部下趕出。佢嘅細佬馬希崇上臺攬權。馬希崇貶馬希萼去衡山，押送嘅將領係彭師暠，佢之前跟住馬希廣，令佢畀馬希萼重罰，希望佢會殺馬希萼來報仇。不過彭師暠冇噉做，仲押送馬希萼到安全埞方。聽到局勢變動嘅信息，劉言派軍隊打入潭州，馬希崇好驚。喺劉言嘅策劃下，馬希崇處死咗好多擁護馬希萼嘅官吏，但劉言仲繼續騷擾佢。就喺兩邊對頂時，馬希崇嘅手下想暗殺上頭。馬希崇怕，派范守牧到南唐朝廷，想歸附佢來搬救兵。李璟派邊鎬到潭州認降，出兵併合咗楚國，結束咗馬氏喺楚國嘅統治時期。由於場戰爭，楚國人民遇到饑荒，邊鎬分發馬氏倉庫嘅嘢食畀民衆，令楚人好滿意。之後，當馬希萼想請服職做武安節度使（治所喺潭州），因爲佢以前啲行動，當地人民憎馬希萼，請求畀邊鎬來做節度使，李璟同意。李璟畀馬希萼繼續做楚王，但要佢移徙去洪州。至於馬希崇，頒個細啲嘅職務佢，共班楚國啲官移轉，去離遠佢哋嘅舊領土。

佔得潭州，並冇話全部楚國都係南唐嘅嘢——嗰陣佢哋佔嘅係武安軍，而武平軍喺劉言手度，仲有重鎮靜江軍，入咗南漢手。李璟準備出軍收服武平同靜江，但952年夏天前，朝廷議定唔愛靜江戰役，諗計令劉言稱臣，而唔係消滅全部。佢同嗰陣執緊政嘅孫晟、馮延巳傾呢件事，孫晟贊同，但馮延巳反對，話若係噉會令出兵打楚變到冇咩功效。不過，進攻入靜江首府桂州時，喺南漢軍面前失敗慘重。與此同時，邊鎬因爲太過仁慈，管理武安時唔夠威風，制唔得住權下班將士，畀佢哋干涉到自己啲事務。952年冬天，劉言派王逵引軍打入潭州。邊鎬固守到一段時間之後，棄城而走返南唐領土。南唐啲官將聽聞話潭州失守，都拋棄咗州郡，令劉言恢復南嶺以北近乎全部楚國嘅領土（仲有靜江）。南唐實際上喺侵略楚國當中冇賺得乜嘢。孫晟同馮延巳都辭職，而李璟認命話佢再都唔動兵嘞。不過，955年蜀主孟昶派使者來，提議立個三邊聯盟，有後蜀、北漢、南唐，佢又同意，之不過呢個聯盟未搞出任何事實上嘅軍事行動。

同後周嘅戰爭

喺李璟做皇帝嘅大部分時間（約40年歷史），南唐疆土最大。按而家中國政區講，南唐嘅領域有江蘇、江西、安徽、湖北、湖南、福建。

起自華北嘅後周世宗（柴榮，又叫郭榮，係郭威嘅養仔）以統一中國爲目標，開始咗南征。當時南唐同後周以淮河做界。淮河係條大江，後周軍要越過淮河攻擊南唐好難。不過冬天時淮河水位低，噉就易過。出於噉嘅理由，後周對南唐嘅攻擊唔會喺冬季之外。南唐政權都唔係蠢，喺淮河條江以南配置咗軍隊嘅密集力量來防守，特別係冬天潮低時。不過因爲直到955年前後周都冇攻擊，個北方邊疆冇戰事，將領吳廷紹提議唔要個制度，因爲費用高，想節約銀庫。吳廷紹嘅意見畀朝廷接納，而唔聽清淮節度使劉仁贍嘅反對。

955年十一月，世宗直接率領軍事，舉大兵侵攻南唐，由李穀同王彥超指揮，南唐軍陷入完全被動嘅態勢。李璟派劉彥貞送救援軍去幫圍困喺壽州嘅劉仁贍，又召鎮南節度使宋齊丘返金陵惗計。

李穀包圍壽州，但未佔城。當劉彥貞嘅進軍埋近時，李穀決定走人，唔同救援軍正面交戰。劉彥貞嘅部下咸師朗提議乘勢追擊，劉仁贍唔贊成。劉彥貞聽咗咸師朗條計，進軍到正陽地方，結果遇到李穀嘅反擊。佢大大擊破南唐軍，斬咗一萬個首級，當中就有劉彥貞，而咸師朗畀人生擒。之後冇耐，後周皇帝郭榮親自引軍，包圍咗壽州城，任用表哥李重進去指揮大軍，之後喺趙匡胤嘅指揮命令下，周軍佔領咗滁州；後來壽州城亦畀後周佔領。李璟寫信畀郭榮，話：「唐皇帝敬謹傳書畀大周皇帝。寡人請求皇帝停兵、訂立和平。寡人願意尊皇帝做兄長，貢納錢銀布匹來犒軍。」郭榮冇答佢。因爲驚唐軍又會再輸，李璟推舉有口才嘅大臣鍾謨同李德明，帶住布匹、茶、藥材、金、銀、牛同埋酒去周軍營寨求和。但當鍾謨同李德明到嗰度時，郭榮惡鬧佢哋，嚴厲噉斥責，拒絕咗和議，要李璟親身跪面前謝罪。南唐使者亦去遼國，提議遼國引兵南下，共同打後周，但使者畀後周軍喺半路捉住。嗰陣時，舊時嘅吳國楊氏皇室喺緊泰州，因爲怕後周軍會用佢哋做名義來打自身，李璟派尹延範押送皇室嘅人去潤州。不過，因爲條路遠又難行，兼且又驚楊氏班人會搞事反抗，尹延範決定殺曬啲人，來唔使咁煩。李璟聽聞咗，落令處死尹延範。

956年春天，後周軍連續戰勝，然後突然進攻、佔領江都，濠州、泗州、揚州、泰州都落入後周度。呢陣時南唐軍隊嘅戰意喪失咗好多。例如泰州刺史喺敵前逃亡，喺蘄州發生咗刺史畀部下殺害，然後啲部下向後周投降嘅事。

李璟又派孫晟同埋王崇質出使，去貢納金銀、絲綢畀郭榮，呢次信中佢變爲稱臣，而唔再用兩個皇帝間平衡嘅禮儀：

自天祐（唐朝舊年號）以來，國土畀人分割；好多地方畀啲軍閥分開據守，好多地方仲維持住一個家族嘅管治。臣，繼承父親嘅基業，領有咗江南呢笪大地，但臣仲係不斷噉望，想可以搵得真天子去奉事佢。而家，陛下係應咗啲人嘅天命，陛下嘅名望同威權威震天下。臣願意跟隨兩浙（即係吳越，呢國嘅領土包括咗舊時唐朝兩個區域：浙東、浙西，所以叫兩浙）同湖南（楚國嘅舊領土，呢陣時同周朝稱緊臣），追認正朔，自今日起只求畀臣喺處保境安民。請陛下收起憤怒、退兵，寬恕臣冇早早歸附。請畀臣做諸侯帶頭朝拜，做陛下嘅外臣。若果如此，陛下嘅恩德會遍佈四方，冇邊個會唔服。

之後，通過李德明同孫晟，李璟又話辭去帝號；稱臣貢納，割六個州嘅地畀後周——壽州、濠州、泗州、楚州、光州、海州。但係，郭榮對於連續戰勝好自信，惗話自己可以攞盡長江以北嘅南唐領土，所以冇應承。李德明同孫晟求郭榮畀李德明同王崇質南歸，去回報後周皇帝嘅要策，仲有郭榮親筆寫信畀李璟同班南唐重臣，可以承認和議，但要服從由後周提出嘅條款。李璟又一次上表謝恩北朝。李德明回京，話周軍個勢咁猛，呢陣時候只有按佢哋嘅要求，去割長江北面嗰14州嘅地。不過，李璟幾憎呢條，而宋齊丘亦話割地對國家有害。另外，陳覺原本就唔鍾意李德明同孫晟，就指使王崇質去講同李德明相反嘅話。接住佢哋同李璟講讒言：「李德明賣國謀利。」李璟好嬲，處死咗李德明，於是場談判落入僵局。

後周嘅進攻之外，南唐喺東南邊又遇到來自吳越嘅威脅。李璟驚住吳越會乘機攞低常州，決定召喺緊潤州嘅皇長子李弘冀返金陵，因爲佢認爲李弘冀太過後生，領唔到軍。但係李弘冀聽咗近臣趙鐸話，認爲如果離咗潤州，會令呢笪地方同埋鄰近州郡恐慌，於是佢抗令，去佈置啲防守。之後佢同柴克宏嘅援軍一齊打吳越。柴克宏打散咗由吳程指揮嘅吳越軍，粉碎咗吳越嘅侵凌。

隨住和議破裂，李璟任用李景達引軍反擊，想攞返壽州，但又用陳覺做監軍，實質兵權喺陳覺手。李璟又派出大臣朱元，係個有將才嘅人，畀佢領軍去收復被佔州郡。朱元好快攞低舒州同和州，而同時李平佔咗蘄州。對後周呢一連串失敗，再加上李景達帶軍去壽州，郭榮決定撤軍出江都，集中力量守壽州。李景達軍埋近到壽州，但唔敢同後周軍對頭。

956年冬天，李璟聽聞咗敵將張永德（郭榮妹夫）同李重進不和，於是就秘密寫信畀李重進，搵計離間佢，想令佢反叛郭榮，喺信中佢又講咗好多對後周皇帝嘅難聽說話。不過，李重進將封信上奏畀郭榮，嗰陣時佢撤軍返京都大梁。睇完封信，郭榮好嬲，叫咗孫晟（捉咗去大梁嘅南唐使者）來，質問佢，同時要孫晟講出佢知嘅南唐朝廷嘅秘密。孫晟唔制，求賜死。郭榮之後處死孫晟，流放咗另一個同來嘅使臣鍾謨。但冇耐郭榮又悔恨自己殺咗個忠誠嘅人，於是召回鍾謨回朝。嗰陣時，李璟又派第個使臣陳處堯過海去遼廷，呈書畀遼穆宗，請求聯盟。遼廷唔聽，仲扣押住使臣。

稱臣

由於喺戰場上立得大功，朱元心生自負，唔聽李景達（實質係陳覺）嘅命令。957年春天，陳覺上表李璟，話朱元唔信得過，於是李璟派楊守忠去換低朱元。朱元就又嬲又驚，開頭惗定去自殺，但之後改咗主意，帶住一萬軍投降後周。後周軍包圍壽州，重創李景達嘅力量。楊守忠、許文稹、邊鎬被生擒；李景達同陳覺走返金陵。呢陣時劉仁贍九死一生，壽州軍隊因爲形勢而投降。之後冇耐劉仁贍死，李璟珍惜劉仁贍嘅忠誠之心，因爲佢保衛咗城池好耐，於是非但冇責罪佢，仲表揚佢。佔咗壽州後，郭榮進逼江都。南唐軍棄城走佬，長江以北啲城池（諸如楚州）陸續落入北朝手中，後周軍又喺紫金山擊敗南唐軍。後周佔領咗南唐淮南江北嘅大片土地，打到長江一帶，兩軍隔住長江對峙，但南唐完全唔係後周嘅敵手。958年春天，郭榮駐軍喺長江北岸，喺長江嘅水軍戰鬥中南唐大敗，畀後周軍過到條江，殺到嚟金陵。到呢陣時，南唐喺江北只守得四州——廬州、舒州、蘄州、黃州。

嗰陣時，李景遂坐住皇太弟個位有成10年，佢疏奏話李弘冀抵抗吳越時立咗大功，應該立做皇太子。李景達亦請罪辭職呢個元帥。李璟批准，改封太弟李景遂做晉王，調去洪州，調李景達出去撫州。佢晉封李弘冀做皇太子。

周軍過咗大江，事態到咗噉，李璟唯有送使者過去盟誓對後周服屬。但佢覺得好醜，因爲佢要稱臣嘅郭榮年紀仲細過自己，於是派陳覺做大使，想讓位畀李弘冀，嗌李弘冀做談判代表。不過，陳覺到咗周軍營寨，睇到周軍個勢咁猛，令佢同郭榮講嘢時好忍讓，提議北朝皇帝放劉承遇返金陵，去彙報李璟，割四州嘅地畀北朝：廬州、舒州、蘄州、黃州，亦即意思係割晒全部江北。郭榮承諾咗，寫信畀金陵，封信頭寫話：「皇帝敬書江南國主。」劉承遇到咗金陵，李璟同意，寫信答謝，自稱做「唐國主」，應承割呢四州、常年貢納。郭榮批准講和，然後撤軍，話畀陳覺聽李璟毋須讓位。講和條約締結嘅條件如下：

• 淮河以南、長江以北嘅地割讓畀後周。
• 南唐向後周稱臣。
• 南唐君主要去帝號，唔得自認做皇帝，而只能自稱江南國主。喺朝中唔准用天子儀禮。
• 禁止南唐獨自嘅年號，年號由原本嘅交泰改為後周嘅顯德，來表示臣服。
• 李璟嘅名改爲李景。因爲璟呢隻字畀後周皇族用咗（郭威嘅四世祖叫郭璟），要避開呢個諱忌。

憤鬱而死

958年夏天，李弘冀驚李景會復位王太弟畀李景遂，就投毒整死佢。之後李景上書畀北朝，求讓位畀李弘冀，但郭榮唔批。北朝放咗之前被捉嘅馮延魯，共鍾謨、許文稹、邊鎬南歸。李景睇許文稹同邊鎬係敗軍之將，就禁咗佢哋軍權，唔再畀佢哋帶兵。

呢陣時，李景因爲啲軍事失敗而沮喪。李徵古提議交付國政畀宋齊丘。鍾謨同李德明親近，想爲李德明復仇，就趁呢個機會攻擊宋齊丘、李徵古、陳覺，話佢哋圖謀篡位。咁啱喺嗰陣時，陳覺亦宣稱北朝命令要殺宰相嚴續。呢啲事件令李景覺得陳覺個意圖不善。958年冬天，佢決定流放陳覺，殺李徵古，然後要宋齊丘致仕，雖然仲留住佢嘅全部職務。之後喺959年春天，宋齊丘走返喺九華山嘅私邸，李景封鎖佢個府邸，只允許透過牆上一個細窿畀啲飲食。宋齊丘喊住感嘆話呢個係佢嘅報應，因爲之前佢許諾過會保全楊溥嘅家族，但又食言，於是然後佢上吊自殺。之後，靠住郭榮嘅同情，李景開始修復啲防線（之前佢驚話郭榮會認爲呢個行動係有意挑釁，但呢陣時郭榮病咗，話將來唔知會出咩事，而李景亦需要自保自身個國家）。之後冇耐，959年夏天，後周嗰邊世宗死咗，佢實歲6歲嘅仔恭帝即位。因爲國都金陵位於長江南邊，離後周領土好近，李景驚北方嘅強力，惗過後就決定遷都去洪州，任命唐鎬負責建設新京師。

喺呢陣時，由於同後周戰爭嘅後果、以及每年沉重嘅貢納款項，令南唐經濟嚴重衰退，特別係鑄錢原料嘅來源自唐朝時就經已枯歇，通貨膨脹嘅情狀越發加強。按鍾謨嘅意思，李景落令鑄大額銅錢，一嚿新嘅大銅錢等同先前嘅五十文舊銅錢。

959年秋天，王太子李弘冀過世。鍾謨由於得到李景同郭榮兩邊器重，於是喺南唐朝廷中得到緊要地位，由此個人變得驕傲，逐漸令李景唔妥佢。鍾謨唔擁護在生仔中輩份最大嘅鄭王李從嘉做世子，而想立紀公李從善，話李從嘉份人柔弱，過於崇信佛教，而李從善爲人夠決斷。呢下逆咗李景意，李景就思疑佢，落令流放佢，之後又處死佢，仲殺埋佢個同盟張巒，同時毀棄之前發行嘅大額銅錢。佢立李從嘉做吳王，畀佢入住東宮。

960年，後周將領趙匡胤趁住周恭帝年幼嘅機會，用兵變劫低皇位，受禪讓做咗皇帝，宋朝建國，史稱宋太祖。宋帝落詔去佈告李景，李景承認大宋嘅霸權，似臣從後周噉，繼續臣從宋朝，又派大使去祝賀新皇帝，年號亦用宋朝嘅。960年秋天，淮南節度使李重進起兵於揚州，反抗宋太祖，佢提議南唐同佢聯盟，但李景推辭。之後冇幾耐，李重進被打敗，收尾自殺。當宋太祖坐戰船巡遊長江時，李景好心慌，但情形緩和咗，當時有兩名南唐將領杜著同薛良叛逃去大宋，而宋太祖以不忠罪處死佢哋兩個。不過，呢啲事更加令李景決意遷都。

961年春天，李景遷都去洪州，改當地名成南昌府。佢封李從嘉做王太子，由太子守備舊首都金陵，來監察住遷都事宜。但到咗南昌，佢發覺呢笪地方用來做國都太過噏𢱕，只容得十分之一二嘅中央官吏，兼且唔易擴建座城。啲大臣掛住金陵，而李景亦經常嘆氣噉望住北面嘅金陵方向。大學士秦承裕想令佢冇咁難過，於是佢攞屏風遮住李景望北方啲視線。負責營建都城嘅唐鎬因而驚王上會準備論罪，就嚇出病而死。

建隆二年（961年）夏天嘅8月12號，李景病死，時年46歲。佢留低遺詔，想能夠落葬喺南昌西面啲山度。不過佢嘅棺材仲係帶咗返去，安葬喺金陵。李從嘉喺金陵即位，改名叫李煜，決定留住國都喺度，唔再搬京師。之後，按照李煜嘅請求，李景得以追尊做皇帝，廟號元宗，謚號叫做明道崇德文宣孝皇帝ming4 dou6 sung4 dak1 man4 syun1 haau3 wong4 dai3，所以又叫唐孝帝，而佢嘅墓亦因而稱做皇陵。《續資治通鑑》如下噉評價李景：

南唐國主有才華，份人好學。喺佢在位時，佢勤奮節儉又仁慈，佢嘅志向亦好符合作爲統治者。但係，佢自負噉認爲自己係唐朝皇室嘅子孫，於是陷入心態膨脹嘅貪妄陷阱，一味想擴張領土。喺福州同埋湖南失敗之後，佢先知佔取領地係幾咁艱難。佢曾經歎過：「寡人呢世再都唔想用兵。」當周軍進攻時，佢委託重責畀嗰啲唔恰當嘅人，以致冇能力抵抗北軍。佢被迫辱國、辭去帝號，然後喺憂慮同後悔之中死去。

唐元宗相比喺政治方面，喺文化方面名聲更高，詩、詞同書法都兼優，特別係「小樓吹徹玉笙寒」係不朽嘅名句，同下一代嘅後主李煜嘅作品一齊收錄喺《南唐二主詞》。

參攷資料

• 陸游。〈卷二 元宗本紀〉. 《《南唐書》》。
• 約翰尼斯·L.括芝（Kurz, Johannes L.） (2011年)。《《China's Southern Tang Dynasty (937-976)》（中國嘅南唐王朝）》。Routledge。ISBN -9780415454964。
• 牟復禮 (1999年)。《《Imperial China (900-1800)》（帝制中國）》。哈佛大學出版社。頁 11、13～14。ISBN 978-0-674-01212-7。
• 劉昫。〈卷134〉. 《《[[舊唐書]]》》。
• 歐陽脩。〈卷62〉. 《《[[新唐書]]》》。
• 脫脫。〈卷478〉. 《《[[宋史]]》》。
• 吳任臣。〈卷16〉. 《《[[十國春秋]]》》。
• 司馬光。"卷272, 277, 279, 280, 281, 282, 283, 284, 285, 286, 287, 288, 289, 290, 291, 292, 293, 294". 《《[[資治通鑑]]》》。
• 畢沅。"卷1, 2". 《《[[續資治通鑑]]》》。

前代： 烈祖

南唐第二代皇帝／國主 943年～961年

後代： 後主