福音書
(由四福音書跳轉過嚟)
福音書（英文：Gospel，希臘文：Ευαγγέλιο，唐朝景教譯《阿思瞿利容經》）係《新約聖經》嘅四卷福音書：《馬太福音》、《馬可福音》、《路加福音》、《約翰福音》，記述耶穌生平同復活事蹟為主嘅文件、書信同書籍。
簡介
[編輯]每卷福音書都有佢嘅唔同特點、記法、啟示出耶穌嘅多方面，令人可以喺多方面認識上帝嘅獨生子耶穌基督。每一卷福音書都有佢特定嘅補充範疇，所以福音書比較著重於記載一位人物，而唔係故事，而且對耶穌講嘅嘢並唔注重先後次序，比較著重教訓嘅真理內容，同埋神跡嘅屬靈意義。而每卷福音書之間嘅差別，都可以令佢哋互相補充。
福音書嘅信息內容主要有：
- 主嘅先鋒施洗約翰嘅工作
- 耶穌嘅工作同教導
- 耶穌嘅十字架同復活
福音書寫作嘅目的係要喚起並強化對基督耶穌嘅信心，係對反對上帝或持有錯誤睇法嘅人嘅最好解答，同時引導信徒更完全明白認識上帝嘅位格、工作同埋上帝嘅主權。
種類
[編輯]馬太、馬可、路加福音呢三卷福音書，所記錄嘅耶穌生平事跡，有共同觀點同類似風格，亦有好多共通嘅地方。佢哋嘅內容、情節相同、而且字詞大體一致，好似三個人一齊睇同一件事件，所以叫做「對觀福音」，又叫做「符類福音」。
而約翰福音嘅內容同其他三卷福音書嘅記載唔同，有好多補充，所以亦叫做「補充福音」。