圖章 (東亞)

出自維基百科,自由嘅百科全書
Jump to navigation Jump to search
古代圖章

圖章又叫印章或者,佢喺東亞文化圈傳統佔有重要地位,唔單止係日常生活用品,圖章嘅圖案、文字彫刻同埋圖章本身嘅造型都好有藝術價值。

歷史[編輯]

據講,圖章源自中國三代」嘅製(《後漢書·祭祀志》云:「三皇無文,結繩以治,自五帝始有書契。至於三王,俗化彫文,詐僞漸興,始有印璽以檢奸萌,然猶未有之器也。」唐朝杜佑通典》話:「三代之制,人民皆以金玉爲印。」)或者源自殷墟甲骨文嘅契書同青銅鑄造嘅銘文,到而家仲未有定論。根據歷史記載同埋考古遺物,圖章喺春秋戰國時期已經較爲普遍使用嘞。後嚟,圖章傳到去東亞其他地區,例如日本朝鮮越南等地,成爲呢啲地區傳統文化嘅一部份。圖章喺朝鮮嘅使用,最早可追溯至公元前二世紀嘅扶餘國

坊間亦都有講法認爲圖章起源於「徵識圖騰」。另外根據《抱樸子·登涉篇》記載:「古之人山者,皆佩黃神越章之印,其廣四寸,其字一百二十,以封泥著所住之四方各百步,則虎狼不敢近其內也。」可見圖章亦都有驅邪嘅作用。

中國古代政府喺冊封官員任命時,授受印章,以做信物,是爲信印,即後世所稱嘅公章。呢類圖章係政治權力嘅象徵,通常隨官職爵位,順序傳承,並非個人所有。中國歷代君主使用嘅圖章——,則係國家最高權力嘅象徵。漢代緯書《春秋運鬥樞》話:「黃帝時,黃龍負圖,中有璽者,文曰『天王符璽』」;《春秋合誠圖》入面,「堯坐舟中與太尉舜臨觀,鳳凰負圖授堯,圖以赤玉爲匣,長三尺八寸,厚三寸,黃玉檢,白玉繩,封兩端,其章曰『天赤帝符璽』」。黃帝堯舜皆係傳說人物,呢類講法,並非信史。最爲知名嘅璽係秦始皇傳國璽

發展[編輯]

中國嘅圖章同印泥
  • 圖章材料嘅發展:陶係圖章最古老嘅材料,後來漸漸發展爲金、銀、銅、玉、、木、牛角、象牙等,乃至現代嘅塑料、橡膠;明朝後半葉,文人採用葉蠟石嚟做圖章材料,流傳至今。
  • 圖章名稱嘅發展:秦以前,稱爲「」(亦作「」),到一統六國後分「璽」(皇帝專稱)同「印」(臣民所稱);朝時期,稱之「璽」或者「章」;至武后改「璽」爲「寶」,而唐至「璽」、「寶」並用。民間對圖章嘅稱呼仲有「印信」、「記」、「朱記」、「印章」、「戳子」等。日語又稱「判子」。

圖章內容[編輯]

大部份圖章上面都刻咗文字,當中以漢字爲主,大部份採用篆書,有啲甚至用金文甲骨文。現代嘅圖章都有用隸書楷書嚟刻嘅。日本有一啲刻咗假名嘅圖章,韓國亦都有一啲刻咗諺文嘅。仲有一啲非文字嘅圖章,刻嘅係圖案。

要留意一點,舊時漢字少過今日,整圖章嗰陣不時要借用通假字,例如上面啲圖章,「茶熟香溫且自看」用「孰」通假「熟」,「千巖秋气高」借「嚴」通假「巖」,「知時無止」以「亡」通假「無」。有嘅漢字古時音義唔同今時,好似「問梅消息」嘅「梅」,金、篆時寫做「某」,《說文》云:「某,酸果也。从木从甘。」今日「梅」同「某」已經分化做兩個字,音、義都唔同,但係印上仍然跟舊時嗰套,噉就要讀成「梅」音,解做「梅」嘅意思。

亦有啲古字同今日寫法好唔同,例如「秋」字金文係「龝」,从「禾」从「𬟏」(之類嘅蟲);「時」字金文係「旹」,从「日」,「㞢(之)」聲;「野」字甲骨文係「埜」,从「林」从「土」等等,解讀時就要掌握文字學知識。時期有啲篆刻家鍾意用罕見嘅傳抄古文,譬如「我思古人實獲我心」嘅「實」字,好似「木」上有果實噉;「千巖秋气高」嘅「气」字从「日」从「气」;「道」字喺圖章度,亦成日寫成「人」喺「行」(道口)中間行緊嘅樣。而鳥蟲篆、九疊篆呢類文字,加咗好多裝飾,搞到即使係文字學家都未必好認。

白文同朱文[編輯]

圖章分白文(陰刻、陰文)同朱文(陽刻、陽文)兩種。白文係指圖章上面嘅字凹落去,印出嚟嗰陣啲文冇畀印泥上色嘅印章;朱文係指圖章上面嘅字凸出來,印出嚟嗰陣文字畀紅色印泥上咗色嘅印章。仲有啲圖章係朱白相間嘅。

應用[編輯]

日常應用[編輯]

漢代前,圖章係用嚟置放竹木簡牘嘅木質方槽上嘅「印泥」,又稱「朱肉」。漢代後,圖章用喺扱喺紙張上面。同時,圖章亦用嚟烙喺身上嚟做標記,以及用嚟做大件物品發送嘅封用標記。

圖章常用作簽署,統稱爲「名印」。古代嘅名印可分以下種類:

名稱 例子 圖例 用途
姓名 「李小狼印」或「李小狼」 李小狼印李小狼 表示個人姓名。
表字 「字矗昊」或「矗昊」 字矗昊矗昊 表示個人嘅表字。
臣妾印 「臣劉鳴釧」或「臣小明」(男性)
「妾美櫻」(女性)
臣劉鳴釧臣小明妾美櫻 臣子妃嬪命婦女官喺上呈皇帝嘅文件度所用嘅印。
書簡印 「如佩信印」 如佩信印 書信下款度用。
迴文印 「李小狼印」、「吳之鯨印」 李小狼印吳之鯨印 表示姓名,但係文字以逆時針方向排列,同一般由上至下、
左至右排列文字嘅圖章唔同。可以同姓名印比較兩者差異。
有時用喺寫作嘅作品,即係印喺書嘅自序作爲簽署。
總印 「大英伯明皇龍正之章」 大英伯明皇龍正之章 表示名字同埋嚟自邊度。
官印 「益都路管軍千戶建字號之印」、
「平定縣印」
益都路管軍千戶建字號之印 平定縣印 表示官位、官方機構或者管治地域等等。
國璽、帝璽 「大清帝國之璽」、
「文帝行璽」
大清帝國之璽文帝行璽 代表國家或者君主。

現時,東亞地區仍然好多人用名印簽署,而且具備法律效力。因此用嚟做簽署嘅圖章必須妥善保管,避免畀人盜用。目前臺灣、韓國、朝鮮等地嘅最常見嘅名印刻有簽署者姓名,中國大陸則喺中華人民共和國成立後因將其視爲「傳統嘅舊時代產物」而廢除個人圖章。日本嘅一般只有姓氏,一啲常見姓氏嘅現成圖章可以於市面上購買。

喺日本同埋韓國,用作簽署用嘅圖章需要登記方有法律效力,日本同韓國各地有專門嘅政府機構負責登記圖章。日本會爲已經登記嘅圖章發出「印鑑登錄證明書」(日語漢字印鑑登録証明書),已經登記嘅圖章叫做「實印」(日語漢字:実印),未登記嘅稱爲「認印」(日語漢字:認印)。韓國爲已登記圖章發出嘅文件就叫「印鑑證明書」(諺文인감증명서),已經登記嘅圖章會叫「印鑑」(諺文:인감)或者「實印」(諺文:실인),至於「圖章」通常都淨係指未登記嗰啲。大部份韓國人會有兩個姓名印章,「圖章」淨係用喺一般簽署度,「印鑑」就用嚟做重要文件或重大交易、合約嘅簽署。

書法與繪畫作品中嘅應用[編輯]

蘭亭序·神龍本》。歷代擁有者印上無數圖章,包括陰刻、陽刻、書體等。

東亞書法作品中嘅圖章分爲名號章同埋閒章(或閒印)。而按照圖章所扱嘅位置又分爲迎首章(扱喺作品上首)同埋押腳章(扱喺正文同下款之後)。圖章同正文題款共同構成書法作品嘅三大要素。

仲有,東亞傳統繪畫都成日有圖章,具有簽署同埋裝飾嘅作用。有啲書法、繪畫嘅擁有者亦都會喺自己嘅收藏品度扱上圖章。

「閒章」作爲一啲愛好書畫人士嘅個人標記印,作用類似有特色嘅簽名,但係冇法律效力,以下係一啲例子:

名稱 例子 圖例 用途
肖形印 福鹿印、虎印 福鹿印虎印 冇文字,用圖像嚟做持印者嘅代表。
吉語印 「日就富貴」 日就富貴 印上有吉祥短語。
黃神越章 「黃神越章天帝神之印」 黃神越章天帝神之印黃神越章天帝神之印 古代用嚟驅邪避鬼,而家主要用嚟祝福遠行人士平安。
封泥 (無) (無) 用嚟封好信封或者包裹嘅開口。

另外,仲有啲代表書齋、私墊、藏館嘅圖章,統稱「齋印」,好似下面呢啲例子噉:

名稱 例子 圖例 用途
齋館印 「雅目齋」、「玄賞堂印」、
「定齋」
雅目齋玄賞堂印定齋 表示齋館嘅名字,同類圖章有社團、商社、公司嘅圖章。
別號印 「白石道人」、「三橋居士」、
「白雲峰主」
白石道人三橋居士白雲峰主 表示持印者嘅別號,例如佢嘅筆名。
收藏印 「不孤盦書畫記」、
「儀徵張錫組珍藏書画」
唔孤盦書畫記儀徵張錫組珍藏書畫 蓋喺圖書館、印刷館、畫館等保存嘅藏書、藏畫上。
詞句印 「問梅消息」、
「買魚沽酒答春晴」、
「沽酒聽漁歌」
問梅消息買魚沽酒答春晴沽酒聽漁歌 上面有詩句或者短語,多數扱喺擁有者所繪畫嘅水墨畫、所書寫嘅字帖上面,大細各異。
花押印 (無) 琵琶形押 魚形押 具有圖像嘅個人特色印。

參見[編輯]