婉曲

婉曲（粵拼：jyun2 kuk1；英文：euphemism），又叫委婉、婉轉，即係指唔直接噉用啲準確嘅詞句表達本意，而係用啲相關嘅詞句，間接噉烘托、流露或者暗示本意嘅一種表達手法。婉曲通常係用啲冇攻擊性嘅字詞，嚟代替有冒犯性或者會令人反感嘅字詞。

婉曲亦係種修辭手法，可以分四類：曲折、微辭、吞吐、含蓄。

類別

曲折即係，用啲同本意相關嘅詞句，講出本意。本意比含蓄句直白啲。讀者可以靠前文後理，意會本意。

例子：

「假如醫藥廣告所說的話，完全可以兌現，現有的疾病，實不足以危害人類。」孫如陵《墨趣集》
粵化：「假如醫藥廣告所講嘅嘢，完全可以兌現，現有嘅疾病，實在唔足以危害人類。」

── 刁鑽噉講醫藥廣告信唔過。

微辭即係，用啲同本意相關嘅詞句，諷刺同埋不滿噉講出苛刻嘅本意。本意比微辭句苛刻啲。讀者可以靠前文後理，意會本意。

例子：

「炸死了你，我的故事就該完了。炸死了我，你的故事還長著呢。」張愛玲《傾城之戀》
粵化：「炸死咗你，我嘅故事就應該完喇。炸死咗我，你嘅故事仲有好長呀。」

── 諷刺男主角用情不專，攻擊男主角嘅人格。

吞吐即係，用略過本意重點嘅詞句，講出本意。本意比吞吐句完整啲。又即係講到重點嗰陣，講啲唔講啲，欲言又止。讀者可以靠前文後理同想像力，填充冇講到嘅重點。

例子：

「陽光從褐色雲裏斜著過來，幻成一種異樣的紫色，透明似的，不可逼視，剎那間在我迷眩了的視覺中，這草田變成了……，不說也罷，說來你們也是不信的！」徐志摩《我所知道的康橋》
粵化：「陽光由啡雲裏斜住過嚟，幻化成一種異樣嘅紫色，好似透明噉，唔可以逼視，剎那間喺我迷眩咗嘅視覺當中，呢塊草田變咗……，唔講都罷，講咗你哋都唔會信嘅！」
「胡琴咿咿呀呀的拉着，在萬盞燈火的夜晚，拉過來又拉過去，說不盡的蒼涼的故事──不問也罷！」張愛玲《傾城之戀》
粵化：「胡琴咿咿呀呀噉拉住，喺萬盞燈火嘅夜晚，拉過嚟又拉過去，講唔盡嘅蒼涼故事──唔問都罷！」

含蓄即係，用同本意差唔多，但係更形象化嘅詞句，講出本意。本意比含蓄句直白啲。讀者可以自己歸納出最簡單直接嘅意思，但係噉做會損失本意嘅細節。

例子：

「賽因河的柔波裏掩映着羅浮宮的倩影，它也收藏着不少失意人最後的呼吸。」徐志摩《巴黎的鱗爪》
粵化：「賽因河嘅柔波裏邊掩映住羅浮宮嘅倩影，柔波亦收藏住唔少失意人最後嘅呼吸。」

── 最後嘅呼吸（或者最後唞嗰啖氣）即係死亡；失意人嘅死亡可以理解為自殺；河入面嘅自殺即係投河自盡。
「我並沒有失去我的故鄉，當年離家時，我把那塊根生土長的地方藏在瞳孔裏，走到天涯，帶來天涯。」王鼎鈞《瞳孔裏的古城》
粵化：「我並冇失去我嘅故鄉，當年離家嗰時，我將嗰塊根生土長嘅地方收埋喺瞳孔裏邊，走到天涯，帶嚟天涯。」

── 收埋喺瞳孔裏邊即係記住。