工作特徵理論

工作特徵理論（英文：job characteristics theory）係工作設計嘅一個理論基礎。根據最基本嘅工作特徵理論，無論係做邊行嘅都好，一份工可以具有以下呢啲特性：

• 自主性（autonomy）：指一個人主觀噉覺得自己喺工作上有幾多自由可以揀想做嘅嘢，自由愈多就算係自主性愈高；舉個例說明，好似廿世紀初嗰種工廠式嘅做法自主性就低得好交關－啲工人淨係一味聽阿頭嘅命令，阿頭安排佢哋做乜佢哋就一世都淨係做死嗰樣嘢，而相比之下，一個學者做嘢自主性就相對高，可以揀自己跟住落嚟嘅研究項目要去邊個方向；又或者係好似彈性工時（flextime）嘅安排噉，要求員工準時交貨但想喺咩時間做嗰樣工作就任員工自己揀。
• 技能多樣性（skill variety）：指一份工有幾要求員工展現多種唔同技能，要求嘅技能愈多技能多樣性就算係愈高；例如廿世紀初嗰種工廠式嘅做法，技能多樣性就好低－啲工人做嚟做去都淨係做同一件作業，學完做一樣作業之後就完全唔使做第啲嘢，唔使學新嘅技能，而相比之下，一個做營銷嘅人就要做多種唔同嘅工作，包括係度點樣同件產品定價、點樣安排啲貨送到客嗰度同埋點樣同件產品做宣傳呀噉－要用到多種唔同嘅知識同技能。
• 作業顯著性（task significance）：指一份工涉及嗰啲作業能唔能夠對個組織或者身邊嘅人造成具體嘅影響，影響愈大作業顯著性就算係愈高；例如一個工人喺裝配線上面組裝零件好多時都唔會感覺到份工對身邊嘅人造成咩具體嘅影響，但一位心理治療師可能會感覺到自己做嘅嘢令啲客開心咗，覺得自己做嘅嘢會對身邊嘅人有正面影響，作業顯著性就高。
• 回輸（feedback）：指一份工有冇為個人提供有關「自己表現幾好」嘅資訊（呢啲資訊就係所謂嘅回輸）；例如一位工程師喺度設計一件產品，跟住攞件產品去做測試，測試起上嚟發現件產品根本唔掂（有關表現嘅資訊），就算係靠睇測試結果嚟知道自己表現有幾好。

基本嘅工作特徵理論仲進一步噉提出，上述呢四個因素冚唪唥都係傾向有正面影響嘅。