跳去內容

市場學

出自維基百科，自由嘅百科全書
(由營銷跳轉過嚟)

呢幅相影到：遊戲開發者喺展覽會展示自己嘅遊戲作品。俾消費者知道自己產品幾優質，係營銷嘅重要一環。
五光十色嘅廣告：廣告係其中一種最常見嘅宣傳做法。
貨車等嘅嘢已經打點好晒，個貨倉裏面啲貨，隨時可以車去消費者去到嘅舖頭。

市場學，參見英文：marketing，近似粵音：maa1 ket4 ting4，又叫營銷學，係商學入便最基礎最重要嘅學問之一[1][2]，專門探究點樣吸引人買自己嘅產品同服務，其內容包含商對商市場學同商對客市場學等：商對商指生意人嘗試吸引第啲生意人買自己嘅嘢，例如農夫想吸引連鎖超市買自己嘅農作物，而商對客則係指生意人嘗試吸引普羅消費者買自己嘅嘢[3]。

喺最基本嘅營銷組合上，想為自己產品搵市場嘅生意人有四大因素要考慮[4][5]：

  • 產品：件產品本身嘅特性，以及件產品能夠滿足乜嘢需要或者慾望－產品梗要滿足到某啲需要或者慾望先會有人買[6]；
  • 價錢：件產品賣幾多錢；思考價錢嘅過程當中，要估消費者肯出幾多錢買，會用到需求同供應等嘅概念；
  • 地方：講緊件產品要點送到去客人嘅手上，會涉及地理同物流等方面嘅考量；
  • 宣傳：講緊要確保消費者知道件產品存在，同埋知道件產品能夠滿足到佢哋嘅需要同慾望；宣傳唔淨只係廣告咁簡單，仲可以包括口耳相傳[註 1]等嘅途徑嚟傳播[7][8]；

諗好晒呢幾個因素後，幫件產品做市場嘅人就可以決定佢哋套營銷策略[9][10]。

市場學時常受到批評，俾人話佢哋品行有問題。有研究者指，市場學有誘因吸引消費者購買冇實際價值嘅產品，所以成日做古惑嘢，例如係落一啲帶有誤導性質嘅廣告噉[11]。而喺二〇一七年，紐約時報甚至有評論者噉樣嚟描述市場學：佢話市場學係藝術一種，專係講古講得迷人到令人唔記得銀包冇咗幾多錢[12]。為咗應付呢啲問題，市場學上有所謂嘅市場學操守，專門設嚟確保市場學從業者係有返咁上下操守嘅[13]。

學科定位

[編輯]
睇埋：商學、經濟學同賣嘢

二〇一七年嘅美國市場學協會[歐 1]係噉嚟界定市場學嘅[14]：

市場學係一系列活動、制度同埋過程，用嚟創造、傳達、遞送同交流物品，呢啲物品對顧客、客戶、生意夥伴以至社會整體嚟講係有價值[註 2]嘅。

當中對社會嚟講有價值呢點，係喺二〇〇八年添加嘅[15]。美國市場學協會對市場學嘅早期[註 3]定義，淨係包括生產者同消費者之間嘅關係[16]，如下：

市場學係指某一系列商業活動嘅進行，呢啲活動做嘅係將貨品同服務由生產者引導去到消費者度。

美國市場學家菲力·哥特勒[歐 2]則係噉樣界定市場學嘅，佢個觀點同美國市場學協會嘅好相似[17]：

市場學係一系列社會同管理方面嘅過程，其中涉及個人同團體，佢哋透過創造、提供同埋彼此交易有價值嘅產品，嚟得到佢哋想要或需要嘅嘢。

喺廿世紀上半橛，唔少人覺得市場學技術似係媒體創作嘅一種，包含廣告、分銷同賣嘢等嘅活動。不過隨住市場學方面嘅學術研究演進，愈嚟愈多市場學者都希望市場學能夠成為更加精確嘅學問，於是開始採用心理學、腦神經學、經濟學、社會學同統計學等領域嘅知識同埋研究方法。到咗廿一世紀初，市場學經已廣受認同，係一門有科學成份嘅學問，會用科學方法做研究，甚至會用到精確嘅數學模型模擬研究緊嘅現象，因而令學界有咗市場科學嘅講法[18][19]。



營銷對象

[編輯]

好多人一講起市場學，就覺得係生產者嘗試賣嘢俾消費者，例如美國市場學協會一九三五年嗰個定義，直頭將市場學界定為由生產者去消費者嘅嘢。不過原則上，市場學包含晒一切噉樣嘅過程：

將有價值嘅貨品或服務，由賣家傳遞去買家度。

噉即係話市場學思考嘅嘢，仲會包括埋[1]：



市場概念

[編輯]
蘋果公司嘅撈稿；世界各地嘅人一睇到呢個撈稿就認得佢—建立品牌形象係市場學上嘅大課題。

消費者概念

[編輯]
香港一條好多舖頭嘅街，攝於二〇一三年；有好多消費者喺度行街買嘢，進行緊消費活動。
内文：消費者
睇埋：需要同慾望

消費者係進行消費嘅人。喺經濟學上，消費可以理解為個體消耗手上嘅資源，換取即時嘅效益，簡單例子有行超市嗰陣使錢買餸，得到今晚煮到飯嘅即時效益，又或者係人行街嗰陣使錢買衫，得到一件衫噉嘅即時效益；消費可以用嚟同投資對比，投資概念上係講緊要消耗手上嘅資源，以求喺將來得到更多嘅資源，例如係買某隻預會升嘅股票，達致消耗現時嘅錢，希望第時有更多錢可以用[22]。

市場學其中一個研究重點，就係想鼓勵消費者消費，尤其係想消費者喺自己嘅產品或服務上消費。因此，市場學最基本要諗嘅，就係消費者點解想消費。喺最基本上，可以用以下呢兩個概念嚟諗[23]：

  • 需要：對人嘅生存同健康嚟講必要嘅嘢，例如係基本嘅食水噉。
  • 慾望：指一啲對生存同健康嚟講唔必要、但想要得到嘅嘢，尤其係可以睇下奢侈品同彈性等嘅概念。

貨品或服務有幾能夠滿足消費者嘅需要同慾望，會決定佢喺消費者心目中有幾多價值，從而決定消費者肯花費幾多資源嚟換取佢。有關價值呢樣嘢嘅理論分析，經濟學有深入嘅著墨，比如係效益同經濟價值等嘅概念呀噉[23]。

供應同需求

[編輯]

廣義上嚟講，市場可以泛指任何空間，俾賣家攞住自己嘅產品賣，買家攞住錢買嘢[註 4]，就謂之市場[24]。喺市場入面，是但搵一樣有人買賣嘅貨品或服務，佢有至少兩個屬性：價格同數量[歐 6]；供應同需求嘅框架，描述呢兩樣嘢之間嘅啦掕，對市場學嚟講都有一定嘅價值[25]。

需求

[編輯]
内文：需求

喺市場之中，對某貨品或服務嘅需求[歐 7]反映其需求量[歐 8]同其價格間嘅關係。譬如依家有件貨品，佢價格係 10 文嗰陣，買家總共會買 100 件，價格係 9 文嗰陣，啲買家總共會買 110 件，如是者佢條需求曲線[歐 9]會穿過 (10 文, 100 件) 同 (9 文, 110 件) 呢兩點嘅線[註 5]而呢條線表達嘅嗰段關係就係需求[26]。

有好多外界因素都可以改變需求：收入可以影響需求，如果買家嘅收入突然間普遍上升，通常會引致條需求曲線向右移，即係買家無論價格幾高都買多咗嘢；反之如果買家收入突然普遍下跌嘅話，通常則會引致條需求曲線向左移，買家無論價格幾高都買少咗嘢[27]；替代品嘅價格都可以改變需求，例如如果依家可口可樂提高其價格，噉啲買家好有可能會改為去幫襯百事可樂，百事嘅需求就會提升，條需求曲線向右移[28]。

喺現實應用中，市場學工作時會嘗試做需求預測：喺最簡單嗰種情況下，佢哋可以做份問卷調查，派問卷俾消費者，問佢哋喺每個可能價錢下會買幾多件等，再將消費者嘅答覆畫成圖表，打戙軸係價格，打橫軸係需求量，跟住做迴歸分析，結果會得出一條估計嘅需求曲線。需求預測嘅技術喺營銷策略上好有用，有助企業家知道喺每個價格，件貨品服務會賣到幾多件，並且籍此估計件貨品服務要設喺乜嘢價格，至可以令利潤最大化[29]。

供應

[編輯]
内文：供應

供應[歐 10]係指件貨品服務嘅價格同供應量[歐 11]之間嘅關係。例如假想有一件貨品，佢價格係 10 文嗰陣，啲生產商總共會生產 100 件，而佢價格係 9 文嗰陣，啲生產商總共會生產 90 件，如此類推，噉呢個價格與供應量嘅關係，就係呢件貨品嘅供應，而按呢段關係畫出嚟嗰條線，就係所謂嘅供應曲線[歐 12]，供應曲線嘅斜率通常都會係正數，是謂供應定律[30]。

同需求相似嘅係，供應都可以受各種外在因素影響：譬如依家生產科技上有突破或者工人嘅人工下跌，令到生產貨品嘅成本下降嘅話，噉條供應曲線傾向會向右移，就算價錢不變啲生產商都會生產多咗；而如果工人嘅人工升，引致生產成本上升嘅話，噉條供應曲線則傾向會向左移，就算價錢不變啲生產商都會生產少咗[30]。

彈性

[編輯]

彈性[歐 13]係需求同供應可以有嘅屬性，指需求量同供應量對價格改變有幾強嘅反應[31]，可以用以下呢條式理解：

；

當中 P 係件貨品服務嘅價格，Q 係件貨品服務嘅需求量或者供應量，而 係指導數－簡單講，就係變率[31]。

舉例說明，假想依家有兩件貨品，暫且叫佢哋做 X 同 Y，X 嘅需求彈性低啲。噉嘅話如果兩件貨品嘅價格同時上升 1 文，對 X 嘅需求量嘅跌幅會細過對 Y 嘅需求量嘅。即係話 X 嘅需求量對價格改變反應冇咁大，即使 X 價格改變，消費者買嘅數量都冇改變得太明顯。X 需求彈性低啲可以係因為好多原因：例如可能 X 係一啲鹽同糖噉嘅生活必需品，就算佢平咗，消費者都唔會太有動力買多啲，而佢就算貴咗，好多消費者都仲係要焗住買咁多；相比之下 Y 就較可能係一啲好似魚子醬噉嘅奢侈品。好似係彈性等嘅供應同需求特性，會決定消費者嘅行為，做營銷嘅人需要理解呢啲行為[31]。

市場區隔

[編輯]
内文：市場區隔
睇埋：聚類分析

市場區隔[歐 14]係思考市場嗰陣成日用嘅概念：好多時市場入便會有一定嘅多樣性，唔同性別、年紀同社會階層嘅人使起錢上嚟嘅行為，都會有分別；因為噉，市場學專家分析市場嗰陣，不時會嘗試將市場按呢啲特性，劃分做若干個子市場，每個子市場內部嘅個體喺某啲特性上相近，所以佢哋喺需要同慾望上都會相似，行為上較一元，簡單例子有將個市場分做男人同女人兩大組，因為男人同女人嘅使錢習慣有差異，所以呢兩個子市場各自嘅一元化程度，會高過整體市場嘅[32][33]。



技術上，市場區隔可以用到統計學方法：市場學專家可以首先用問卷調查等嘅方法收集數據，例如量度消費者消費嘅頻率、每個月喺唔同產品上嘅開支等，跟住再做聚類分析，按消費者喺多個變數上嘅相似度，將佢哋分成若干組內部相似嘅群組。完成市場區隔之後，市場學家通常仲會考慮埋目標同定位等嘅因素：前者係由各個市場群組中揀出最適合做營銷對象嘅消費者，後者就係決定品牌希望喺目標消費者心目中建立乜嘢形象，以及點樣同競爭對手區分，例如強調產品質素、功能或者滿足某類需要嘅能力[34]。

營銷組合

[編輯]
内文：營銷組合

營銷組合[歐 15]係市場學上一套思考方法：對消費者同市場有咗基本理解後，公司就需要開始思考自己嘅營銷策略；諗營銷策略需要考慮好多因素，而營銷組合就係指一套套指引，講解營銷要顧及啲乜嘢因素[35]。喺二十世紀嘅傳統營銷組合當中，做營銷嘅人有四大因素需要考慮[4][9]：

呢四大因素時常會嗌做市場學 4P，原因係嗰四個因素喺英文裡便嘅名都係 P 字開頭。呢四大因素可以話係廿世紀市場學嘅根基之一[36]。


二〇一〇年香港沙田有人擺檔賣生果－
  • 產品：生果可以滿足人嘅口腹之慾；
  • 價錢：賣家憑經驗，知咩價錢係街坊會買嘅；
  • 地方：賣家喺人多嘅地方擺檔賣，準備埋膠袋，街坊買咗可以輕易噉拎返屋企；
  • 宣傳：大聲嗌埋嚟睇埋嚟揀，好靚嘅生果！從而吸引街坊行埋嚟，埋嚟就會睇到啲生果幾咁新鮮。


產品

[編輯]
睇埋：品質管理

產品係指賣家俾出、買家俾錢嚟換取嘅嘢。產品可以包括睇得到、掂得到嘅貨品，例如係買餸嗰陣會買嘅菜同肉、衫褲鞋襪、傢俬、汽車、個人電腦同遊戲機等，冚唪唥都算係產品；不過再廣義化噉睇，產品亦可以包埋服務，即係賣方做出某啲買方想佢做嘅行動，例如係買家俾錢，請髮型師幫手剪好佢嘅頭髮、請技術員幫手修理電腦、或者係請維修員幫手修理架車呀噉。產品嘅特性決定佢能夠滿足咩需要同慾望，亦都主宰件產品要進入乜嘢市場，仲有係佢有邊啲替代品同互補品[36]。

喺市場學上，思考產品嘅營銷組合要考慮到件產品處於產品生命週期[歐 20]嘅邊個階段。產品生命週期係一個關於產品嘅模型，指件產品出咗市場後一段時間內銷售量嘅唔同階段變化。一般嚟講，除非某件產品係一啲生活必需品，佢會經歷以下呢四大階段[37][38]：

  • 進入階段[歐 21]：件產品啱啱出街，銷售量一般會慢慢增長，唔少買家都肯試下買件產品；不過可能由於多數買家都仲未熟識佢，所以就算件產品設計得好，啲買家買嘅意慾普遍都仲未係咁大，好多買家仲係想例如聽下買咗件產品嘅人嘅意見，先決定買唔買。
  • 增長階段[歐 22]：件產品出咗街一段時間，喺市場上經已有一定數量嘅買家會習慣噉買，有更多買家開始知道件產品存在同埋[註 7]聽過有關件產品嘅正面消息；競爭者亦會開始嘗試複製，因為可能出現競爭，賣家好多時焗住要減價。
  • 成熟階段[歐 23]：生產者夠晒時間做研發，所以件產品嘅生產成本明顯下降咗，同時市場嘅買家幾乎全部都經已認識件產品，即係話市場嘅增長潛能好可能會開始見頂；就算係成個市場內最強大嗰啲生產者，佢哋都開始發覺件產品嘅銷售量唔再點升，於是乎有愈嚟愈多嘅競爭者有誘因離開市場。
  • 衰竭階段[歐 24]：原先嗰件產品開始唔再適合個市場，可能係有新嘅產品陸續出現，呢啲新產品中好多都會係原先嗰件產品嘅替代品；件產品嘅銷售量因為呢啲原因而開始下跌；一旦銷售量跌到咁上下，生產者好可能會選擇放棄，最後件產品就會停產。

如果打戙軸做銷售量，打橫軸做時間，市場學講嘅產品生命週期，可以畫成以下噉嘅圖：



價錢

[編輯]
呢個餐牌講明每種飯要幾多錢。價錢對客人買嘢嘅意慾會有相當嘅影響。
内文：定價同定價策略

價錢係指買家換取件產品需要負出乜嘢代價，一般係以要俾幾多錢嚟衡量。價錢係動態[歐 25]嘅：假想依家有件產品，佢嘅生產商想其價錢一直處於市場均衡，但隨住件產品經歷其生命週期，對佢嘅需求同供應都會起變化，例如研發會減低件產品嘅生產成本，即係令件產品嘅供應上升，而隨住時間過去，第啲公司會出新產品，呢啲新產品當中有啲可以係替代品，於是原先件產品嘅需求就下跌，所以件產品嘅市場均衡價格會係噉改變[39][40]。

定價策略[歐 26]係營銷上嘅課題，講緊賣家喺定一件產品嘅價錢要點定，先可以令自己嘅利潤有咁大得咁大。例如動態定價[歐 27]呢種策略就相當出名，當中優步[歐 28]用咗呢種做法：優步嘅流動應用程式可以用嚟通過網絡約車，便於住喺城市嘅人唔使自己揸都可以有車坐，簡單講優步約車有一個標準約車費[歐 29]而優步嘅流動應用程式會將個標準約車費乘以一個乘數[歐 30]，當中乘數取決於當時嘅需求量，即係

實際約車費 標準約車費

即係話一旦需求量升，例如係傍晚多人放工想返屋企嘅時段，或者落雨好多人想坐車等，約車費就會升，而且全個過程高度自動化。唔少評論家都認為，優步嘅做法係定價策略上嘅一大創新[41][42]。

分銷

[編輯]
内文：分銷
睇埋：物流同零沽

分銷，有陣時會稱為地方[註 8]。分銷係講緊要考慮啲產品要點樣送到去買家手上。如果某位生意人要賣貨品俾普羅消費者，分銷要顧及搵貨倉儲起啲貨，仲有係打點用嚟將貨運去舖頭度嘅方法，包括係貨車同貨船呀噉[43]。分銷對利潤嘅影響重大：喺較大型嘅生意中，分銷方法嘅效率會左右賣嘢嘅成本－租貨倉用、請貨倉員工、請貨車司機同送貨等嘅工序，通通都要錢同時間，設計得唔好嘅分銷方案，可以搞到買家遲遲攞唔到貨，引起不滿，或者係送貨成本過高等嘅多種問題[44]。因為噉，好多公司都會特登開個職位，淨係負責處理分銷嘅工作[45]。

對分銷策略[歐 31]嘅思考係市場學嘅重要一環。市場學專家要思考例如產品要送去乜嘢舖頭度賣，佢哋要了解邊啲消費者會有興趣買呢樣產品，然後就用市場調查等嘅方式，估呢啲消費者傾向會去咩地方，再運用地理同交通等嘅知識，設計出一套方案，能夠以最低成本將貨送去目標地點，包括要諗好貨要擺喺邊啲貨倉，同埋要由呢啲貨倉運去舖頭要嘥幾多成本等[24]。


幅相影到個工人喺貨倉運貨。運貨呢種工作相當花精神同時間，即係有成本，所以有必要小心設計。


宣傳

[編輯]
内文：宣傳同廣告

宣傳泛指向消費者傳達有關自己件產品嘅資訊，尤其想話畀消費者聽：件產品能夠有效噉滿足需要同慾望。宣傳嘅常見方法，包括喺電視、雜誌、受歡迎嘅網站同大街等多人會見到嘅地方落廣告，又或者係喺展覽度向大眾展示自己嘅產品，又或者係贊助一啲受消費者歡迎嘅活動，再唔係又可以搵員工直接逐家逐戶上門做銷售，而生意人嘅宣傳組合則係市場學上嘅行話，指佢選用嘅宣傳方法嘅組合。

宣傳嘅重點在於想確保消費者知道件產品存在，仲有係對件產品有興趣[4]:p. 769。喺廿一世紀初嘅大數據時代，宣傳嘅效果有方法客觀噉衡量－想知件產品有幾出名，可以留意啲人有幾常喺搜尋引擎度摷有關件產品嘅關鍵詞；同時喺當代嘅數碼營銷上，搜尋引擎最佳化等嘅技術亦應運而生[46]。

廣告係最常用嘅宣傳手法之一。喺商業上，廣告牽涉到單向嘅資訊傳遞[註 9]，目的係想提升消費者購買嘅意慾。廣告可以係靜態圖像或者影片，可以出現喺好多唔同地方－諸如係電視同受歡迎嘅網站嗰度，或者係以實物形式出現喺大型建築物嘅外牆度，等等。廣告嘅設計因而廣受關注，會結合美術同圖像設計等領域嘅知識[47][48]。



宣傳上嘅考量相當關注注意力嘅概念：人腦無時無刻都喺度接收大量資訊，為咗要有效噉解決問題，個腦有必要集中處理對佢嚟講重要嘅資訊，並且忽略冇咁重要嘅資訊，注意力可以理解為認知功能一種，牽涉到腦部由外界資訊中揀一部份出嚟集中處理；簡單例子可以想像有一大拃招牌，每個招牌上面嘅圖同字都唔同，人睇到嗰陣，通常都會選擇淨係留意住佢最有興趣嘅嗰一兩塊招牌；而注意力可以當成有限嘅資源—人喺可以同時留意幾多樣嘢上有上限，人淨係要留意住一個招牌嗰陣通常唔會有問題，要留意住兩三個就開始覺得吃力，要留意住五個嘅話，佢好可能就冇能力清楚知道每個招牌寫咗啲乜，事後唔會記得啲招牌上面有乜[49]。



對注意力嘅思考，亦有注意力經濟[歐 32]嘅諗法：注意力經濟嘅諗法主張，消費者嘅注意力可以視為一種唔夠分[註 10]嘅資源：想像依家有一大拃廣告，消費者嘅注意力有限，唔能夠同時留意晒全部嘅廣告；原則上，一位生意人會希望自己嘅廣告得到消費者注意，所以生意人彼此之間就爭住將自己嘅廣告設計到有咁奪目得咁奪目，想要脫穎而出，得到消費者嘅注意力[50][51]。

營銷策略

[編輯]
内文：營銷策略

營銷策略係指生意人嘅長遠策略，講緊產品要點樣做營銷。現代市場學上，有好多常用嘅營銷策略，市場學專家要做市場研究，搜集資訊，得知市場嘅形勢同營銷組合嘅情況，再決定要選用邊種營銷策略[52]。

強弱危機

[編輯]
強弱危機分析嘅圖解

強弱危機分析係營銷策略上常用嘅策略思考方法。根據強弱危機分析嘅諗頭，為一間公司制定策略，重點要分析四方面嘅嘢[53][54]：

  1. 間公司嘅強項[歐 33]，即係能夠令佢有競爭優勢嘅內在因素；
  2. 間公司嘅弱項[歐 34]，即係可能會令佢喺競爭中不如對手嘅內在因素；
  3. 周圍環境有乜嘢機遇[歐 35]，即係間公司可以利用嘅外在因素；
  4. 周圍環境有乜嘢危險[歐 36]，即係可能會阻礙間公司嘅外在因素。

強弱危機呢四大因素，為做營銷嘅生意人提供大方向，用嚟諗策略要點樣制定：某件產品嘅強弱項，取決於件產品嘅特性，例如質素係咪好過同行產品同埋價錢係咪平啲抵買啲[註 11]；而睇完呢四大因素後，營銷者仲要做好多種嘅工序，例如係諗下有邊啲量度得到嘅變數，可以攞嚟衡量強同弱項，以及係實際做數據搜集呀噉[53]。

基本策略

[編輯]

基本競爭策略[歐 37]係由美國經濟學家米高波特提出嘅諗法。根據佢套諗法，一間公司想要同自己啲產品爭取競爭優勢，基本上淨係得三種策略[55]：

  • 成本領導[歐 38]：贏價錢，降低成本，務求享有同類公司中最低嘅成本；用呢種策略嘅公司一般係自己喺效率、規模或者經驗上優勝過對手，例如係不斷做研發，成功發現更低成本嘅生產技術噉；
  • 差異化[歐 39]：所謂嘅贏產品，講緊要改變自己嘅產品，務求令到自己提供嘅貨品服務質素，優越過競爭對手，就算價格一樣都會有更多消費者肯購買；
  • 集中[歐 40]：贏在專化，淨係專攻市場中嘅某一部份，例如由專門賣運動用品，專化成專門賣足球方面嘅用品，有可能令自己喺生產足球用品嘅成本同質素上都變得更有競爭力。

以上呢三種基本競爭策略，可以想像成下圖噉嘅樣[56]：

一般認為，三個基本競爭策略各有優劣，所以有關邊種策略最好，取決於市場形勢：成本領導同產品差異化，都唔重視專化落去市場嘅某一部份，但前者重視成本，後者重視質素，冇得成本優勢同質素優勢兼得；集中就係想成本優勢同質素優勢兼得，但就要犧牲公司嘅覆蓋面，一旦選擇咗嗰個市場因為外在因素唔增長，就會令間公司喺擴張上受阻，譬如係足球嘅受歡迎程度唔上升，搞到足球用品嘅市場唔增長。根據米高波特嘅建議，生意人選擇基本競爭策略嗰時，必需要做取捨[55]。

研究

[編輯]
幅相影到個男人填緊問卷：問卷調查係市場學上常用嘅研究方法。
睇埋：行為分析

市場學研究[歐 41]泛指市場學上嘅研究，包括咗市場研究[歐 42]：

  • 市場研究係指做數據收集，用數據分析嚟了解市場形勢，例子可以睇下用聚類分析做市場區隔嘅做法噉；
  • 市場學研究則更廣泛，包括用數據收集同分析嚟解決市場學上遇到嘅問題，包括市場研究，仲包括例如用心理實驗研究廣告對消費者心理嘅影響呀噉[57]。市場學研究可以係理論性質嘅－唔少市場學家都會將市場學當成科學噉研究，想嘗試諗出科學化嘅理論嚟解釋市場係點運作嘅；不過市場學研究又可以好應用導向，譬如係對營銷策略熟識嘅生意人，喺自己產品出街前梗會留意市場研究嘅結果，用呢啲結果嚟幫自己做營銷策略方面嘅決定[19][58]。

市場學同第啲商學或者社科領域一樣，有機會用到理論。理論化嘅市場學研究時常會好似科學噉，追求想要解釋所研究嘅現象，會跟從科學方法嚟去研究佢哋所研究嘅現象[59][60]，會追求手上嘅理論做得到盡可能咁準確嘅預測[61]。

歷史變化

[編輯]

一八七三年一幅畫；幅畫描繪畫家想像中嘅古代阿拉伯市集。

原則上，營銷早喺人類文明早期有商貿活動嗰陣，就經已存在，但要等到成廿世紀初，先開始有人認真看待學術性質嘅市場學[62]。自從廿世紀初以嚟，市場學上對市場相關概念嘅理解，有過多波嘅大改革，而佢哋對於營銷應該點做嘅睇法往往會跟住出現變革。

根據一種常見嘅分法，廿世紀初以嚟有影響力嘅營銷哲學[歐 43]有以下呢啲[63][64]：

  • 生產導向[歐 44]，一八六〇至一九三〇年代：集中於係噉做生產同提升生產嘅效率，目的係想達致規模經濟，假設咗需求會超越供應－即係相信如果有人整咗件產品，就實會有人想買[註 12]，所以好少可會特登做乜嘢宣傳，諗住產品整咗出嚟就會搵到人買，而喺研究上傾向淨係集中思考生產技術要點改進，唔多睇重消費者相關嘅研究[65]；
  • 銷售導向[歐 45]，大蕭條時期至一九五〇年代：開始重視宣傳，尤其講緊要做銷售；用銷售導向嘅生意人好多時會用進取嘅方法想賣自己嘅產品，而且時常會忽略消費者係咪真係需要呢啲產品，成日會逐家逐戶上門做銷售，賣一啲生產嗰陣多咗出嚟嘅貨；呢種做法傾向唔多重視同客人嘅關係[66]。
  • 營銷導向[歐 46]，由一九五〇年代起：會睇晒市場學上嘅 4P；用營銷導向嘅生意人會留意消費者嘅需要同慾望，並且用市場研究嘅方法嚟收集有關呢啲嘢嘅資訊，按得到嘅資訊調整自己嘅定價、分銷同埋宣傳手法[67]。

到咗廿一世紀，營銷哲學都仲有不斷噉發展。

社會營銷

[編輯]
呢啲產品嘅包裝用塑膠造；喺廿一世紀初，塑膠包裝成日俾人詬病，話佢哋污染環境，而且微塑膠仲被指係會危害人類嘅健康[68]。
内文：社會營銷

社會營銷係一套喺一九七〇年代興起嘅營銷哲學，一般認為係由美國市場學家菲力·哥特勒喺一九七二年提出嘅[69]。根據社會營銷嘅觀點，做營銷嘅人唔淨只要滿足客人嘅慾望同埋提供高質素嘅產品，仲要有社會責任，即係要諗埋營銷所做嘅嘢對社會嘅整體利益有乜嘢影響，要顧及員工、客人、本地群體、仲有係一般大眾以至政府等嘅利益，仲要確保營銷活動唔會對自然環境造成明顯嘅破壞[70]，後者呢點仲帶出咗綠色營銷嘅諗頭－指考慮埋環保因素嘅營銷[71]。

社會營銷嘅特徵包括以下呢啲：平衡生意人本身嘅利潤同埋消費者、第啲生意人、員工同投資者嘅利益；要求生意人跟從市場學操守辦事；唔准用唔公平嘅定價策略；綠色營銷，即係將營銷活動造成嘅污染保持喺可以接受嘅水平[72]。

關係營銷

[編輯]
内文：關係營銷

關係營銷係一套喺一九九〇年代興起嘅營銷哲學，重點在於想同消費者建立長期嘅關係，尤其係想諗計令消費者變成熟客。關係營銷嘅思想源於菲力·哥特勒嘅主張：哥特勒指出，得到一個新客要用嘅成本係維持一個現有客人嘅成本嘅五倍咁多，所以公司需要重視點樣維持現有嘅客人，令啲客人會買完又買；做關係營銷嘅公司，時會希望令買開自己產品嘅消費者對自己產生信任甚至歸屬感，並且靠呢啲關係嚟吸引客人一嚟再嚟[73]。

關係營銷嘅特徵講到：例如要求產品能夠滿足客人嘅慾望，而且能夠仲長遠噉達到呢種目標，例如件產品要唔易爛，或者最少確保客人喺件產品爛咗嗰陣可以輕易搵到顧客服務幫手；而喺資訊科技普及化嘅廿一世紀，關係營銷嘅諗法，仲刺激咗營銷工作對社交媒體嘅使用，令到社交媒體營銷更引人注意－例如到咗二〇二〇年代，幾乎所有有咁上下規模嘅公司，都實會留意社交媒體，觀察客人同準顧客對佢哋嘅產品有乜嘢意見，又或者係睇下嗰排興啲乜，透過呢啲資訊幫助營銷上嘅決策[74]，甚至係用機器學習等嘅技術分析得到嘅數據[75]。

數碼營銷

[編輯]
内文：數碼營銷

數碼營銷係一類營銷嘅做法，泛指用互聯網同相關嘅資訊科技，宣傳產品或者服務，仲可以包括使用呢啲技術嚟宣傳某啲諗法。數碼營銷嘅簡單例子有網絡廣告－即係喺啲網站嗰度落廣告，顯示自己想傳揚嘅信息，而如果嗰啲網站係多消費者瀏覽嘅，噉做就可以達到將段信息傳俾好多消費者睇[76][77]。


呢幅網上廣告，消費者可以撳即刻去攞 Q 旁得到一張 Q 旁，消費者睇到有幾大機率會撳？可以睇埋點擊率講嘅嘢。


例如聯盟式營銷就係數碼營銷成日用嘅做法，指企業畀錢或者第啲著數畀某位第三者，呢位第三者就係所謂嘅同盟，間企業會要求呢位同盟搵方法吸引消費者留意間企業嘅產品，而間企業會畀嘅錢嘅量，就視乎位同盟搵到幾多客而定嘅。舉個具體例子：想像依家有間企業，佢聯絡第啲網站嘅營運者，搵呢啲營運者做同盟；班同盟會喺自己嘅網站度落廣告，消費者睇嗰啲網站嗰陣，可以一撳個廣告連去本來嗰間企業嘅網購網站度買嘢；而間企業同佢班同盟嘅合約講明，每有一個客透過條噉嘅途徑買件產品，間企業就會畀若干量嘅酬金畀嗰位同盟。呢種做法喺廿一世紀初嘅互聯網成日都見到，例如亞馬遜等嘅大企業都用咗噉嘅做法[78]。

相關學科

[編輯]
睇埋：商學同社會科學

以下呢啲學科，都同市場學有密切關係。

睇埋

[編輯]
行銷漏斗基本版本嘅圖解：當中最上嗰個 A 係認識，I 係興趣，D 係意慾，最下嗰個 A 係行動。每經過一個階段，都梗會有準顧客流失，人數因而逐漸減少。

文獻

[編輯]

有志攻讀市場學嘅學生，可以去摷以下呢啲文獻嚟睇：

  • Bartels, Robert, The History of Marketing Thought, Columbus, Ohio, Grid, (1976) 1988 online
  • Christensen, Clayton M. (1997). The innovator's dilemma: when new technologies cause great firms to fail. Boston, Massachusetts, USA: Harvard Business School Press. ISBN 978-0-87584-585-2.
  • Church, Roy and Godley, Andrew (eds), The Emergence of Modern Marketing, London, Frank Cass, 2003 online edition.
  • Davidson, D. Kirk (2002). The Moral Dimension of Marketing: Essays on Business Ethics. South-Western Educational. ISBN 978-0-87757-300-5.
  • Hollander, Stanley C., Rassuli, Kathleen M.; Jones, D.G. Brian; Dix and Farlow, L., "Periodization in Marketing History," Journal of Macromarketing, Vol 25, no.1, 2005, pp. 32–41. online
  • Kotler, P., & Keller, K.L. (2011). Marketing Management, Prentice Hall.
  • Labrecque, J. S., Wood, W., Neal, D. T., & Harrington, N. (2017). Habit slips: When consumers unintentionally resist new products. Journal of the Academy of Marketing Science, 45, 119-133，有講到習慣會點樣阻礙消費者採用新產品。
  • Lee, Y. L., & Yang, D. J. (2019). Potential contributions of psychological capital to the research field of marketing. Frontiers in psychology, 10, 2111，將心理學嘅概念用落市場學度嘅一個例子。
  • Tedlow, Richard S., and Jones, Geoffrey G. (eds), The Rise and Fall of Mass Marketing, Routledge, 2014
  • Weitz, Barton A. and Robin Wensley (eds). Handbook of Marketing, 2002

參考

[編輯]

註釋：

  1. ↑ 可以睇睇口碑營銷嘅概念。
  2. ↑ 可以睇下經濟價值嘅概念。
  3. ↑ 一九三五年
  4. ↑ 或者攞住第啲用嚟換想要嘅貨品服務嘅嘢。
  5. ↑ 唔一定係直線。
  6. ↑ 好：正常嚟講係指能夠滿足消費者嘅需要同慾望。
  7. ↑ 假設件產品有返咁上下質素
  8. ↑ 噉叫係為咗順口：地方嘅英文詞係 place，同營銷組合中其餘嘅元素一樣係 P 字開頭。
  9. ↑ 喺廿一世紀初，即使係單向嘅資訊傳遞，都可以一定程度上個人化。
  10. ↑ 睇埋稀缺嘅概念。
  11. ↑ 一般認為假設第啲因素不變，產品傾向係平啲會較有吸引力。
  12. ↑ 可以睇下所謂嘅薩伊定律。

詞彙嘅外語名：

  1. ↑ American Marketing Association，AMA
  2. ↑ Philip Kotler
  3. ↑ B-to-B
  4. ↑ B-to-C
  5. ↑ C-to-C
  6. ↑ quantity
  7. ↑ demand，粵拼：di6 maan1
  8. ↑ quantity demanded；買家有能力同願意買嘅量。
  9. ↑ demand curve
  10. ↑ supply
  11. ↑ quantity supplied；指賣家肯整嚟賣嘅量。
  12. ↑ supply curve
  13. ↑ elasticity
  14. ↑ market segmentation
  15. ↑ marketing mix
  16. ↑ Product
  17. ↑ Price
  18. ↑ Place
  19. ↑ Promotion
  20. ↑ product life cycle
  21. ↑ introduction
  22. ↑ growth
  23. ↑ maturity
  24. ↑ decline
  25. ↑ dynamic
  26. ↑ pricing strategy
  27. ↑ dynamic pricing
  28. ↑ Uber
  29. ↑ standard rates
  30. ↑ multiplier
  31. ↑ distribution strategy
  32. ↑ attention economy
  33. ↑ Strength
  34. ↑ Weakness
  35. ↑ Opportunities
  36. ↑ Threats
  37. ↑ generic strategies
  38. ↑ overall cost leadership
  39. ↑ differentiation
  40. ↑ focus
  41. ↑ marketing research
  42. ↑ market research
  43. ↑ marketing philosophy
  44. ↑ production orientation
  45. ↑ selling orientation
  46. ↑ marketing orientation

引用咗嘅文獻或網頁：

  1. 1 2 3 Lamb, Charles; Hair, Joseph; McDaniel, Carl (2016). Principles of Marketing. Boston, MA: Cengage Learning.
  2. ↑ Drucker, Peter (1954). The Practice of Management. New York: Harper & Row. p. 32.
  3. ↑ McNamara (1972) cited in Deshpande, R., Developing a Market Orientation, Thousand Oaks, CA, Sage, 1999, p. 11.
  4. 1 2 3 McCarthy, Jerome E. (1964). Basic Marketing. A Managerial Approach. Homewood, IL: Irwin.
  5. ↑ Hester, Brittany (9 April 2019). "Marketing Strategy: Forget the 4 P'S! What are the 4 C'S? 互聯網檔案館嘅歸檔，歸檔日期2021年3月1號，.". CATMEDIA Internal Communication.
  6. ↑ Stanton, William J. (1984). Fundamentals of marketing. McGraw-Hill.
  7. ↑ Market Research is a subset of Marketing Research "Difference Between Market & Marketing Research".
  8. ↑ Julie Bosman (10 March 2006). "For Tobacco, Stealth Marketing Is the Norm". The New York Times.
  9. 1 2 Hunt, Shelby D. (July 1976). "The Nature and Scope of Marketing". Journal of Marketing. 40 (3): 17–28.
  10. ↑ Bagozzi, Richard P. (October 1975). "Marketing as Exchange". Journal of Marketing. 39 (4): 32–39.
  11. ↑ Marketing Is Evil. Psychology Today，篇文個呔圖已經話市場學「邪惡」。
  12. ↑ Charles Duhigg (14 June 2017). "Why Don't You Donate for Syrian Refugees? Blame Bad Marketing". The New York Times，引咗嗰段原文："Marketing is the art of telling stories so enthralling that people lose track of their wallets."
  13. ↑ Davidson, D. Kirk (2002). The Moral Dimension of Marketing: Essays on Business Ethics. South-Western Educational.
  14. ↑ American Marketing Association, Definitions of Marketing, approved 2017, accessed 26 February 2021，原版英文嗰段嘢："... the activity, set of institutions, and processes for creating, communicating, delivering, and exchanging offerings that have value for customers, clients, partners, and society at large."
  15. ↑ Pomering, A., Noble, G. and Johnson, L., "=https://documents.uow.edu.au/content/groups/public/@web/@commerce/documents/doc/uow044913.pdf A Sustainability Roadmap for Contemporary Marketing Education: Thinking Beyond the 4Ps]", 2008.
  16. ↑ Darroch, J., Miles, M. P., Jardine, A., & Cooke, E. F. (2004). The 2004 AMA definition of marketing and its relationship to a market orientation: an extension of Cooke, Rayburn, & Abercrombie (1992). Journal of Marketing Theory and Practice, 12(4), 29-38，原版英文嗰段嘢："Marketing is the performance of business activities that direct the flow of goods, and services from producers to consumers."
  17. ↑ "University of York Introduction To Marketing" (PDF). Retrieved 10 October 2019，原版英文嗰段嘢："... a social and managerial process by which individuals and groups obtain what they want and need through creating, offering and exchanging products of value with others."
  18. ↑ Bass, F. M. (1993). The future of research in marketing: marketing science. Journal of Marketing Research.
  19. 1 2 Burgess, S. M., & Steenkamp, J. B. E. (2006). Marketing renaissance: How research in emerging markets advances marketing science and practice. International Journal of Research in Marketing, 23(4), 337-356.
  20. ↑ Business News Daily Editor, Exp. "What is B2C?". Business News Daily.
  21. ↑ Krikke, Harold (1 October 2011). "Impact of closed-loop network configurations on carbon footprints: A case study in copiers". Resources, Conservation and Recycling. 55 (12): 1196–1205.
  22. ↑ Black, John; Hashimzade, Nigar; Myles, Gareth (2009). A Dictionary of Economics (3 ed.). Oxford University Press.
  23. 1 2 Weeks, Richard; Marx, William (Autumn 1968). "The Market Concept: Problems and Promises". Business & Society. 9: 39–42.
  24. 1 2 Kotler, P. and Keller, K.L., Marketing Management, Prentice Hall 2011.
  25. ↑ Brody, A. (1987). "Prices and quantities". In Eatwell, John; Milgate, Murray; Newman, Peter. The New Palgrave Dictionary of Economics. The New Palgrave: A Dictionary of Economics (first ed.). p. 1.
  26. ↑ The Demand Curve and How It Works 互聯網檔案館嘅歸檔，歸檔日期2021年2月26號，.. The balance.
  27. ↑ O'Sullivan, Arthur; Sheffrin, Steven M. (2003). Economics: Principles in Action. Upper Saddle River, New Jersey: Pearson Prentice Hall. p. 79.
  28. ↑ Retail Analytics: A Novel and Intuitive way of finding Substitutes and Complements 互聯網檔案館嘅歸檔，歸檔日期2020年3月27號，.. Towards Data Science.
  29. ↑ How to Estimate a Demand Curve.
  30. 1 2 The Supply Curve. ThoughtCo.
  31. 1 2 3 Price elasticity of demand and price elasticity of supply. Khan Academy.
  32. ↑ Dickson, Peter R.; Ginter, James L., "Market Segmentation, Product Differentiation, and Marketing Strategy". Journal of Marketing, Vol. 51, No. 2, (1987)., p. 1.
  33. ↑ Yankelovich, D., & Meer, D. (2006). Rediscovering market segmentation[失咗效嘅鏈] (PDF). Harvard business review, 84(2), 122.
  34. ↑ Moutinho, L., "Segmentation, Targeting, Positioning and Strategic Marketing," Chapter 5 in Strategic Management in Tourism, Moutinho, L. (ed), CAB International, 2000, pp. 121–166.
  35. ↑ Kotler, P., Marketing Management, (Millennium Edition), Custom Edition for University of Phoenix, Prentice Hall, (2000), p. 9.
  36. 1 2 Van Waterschoot, W., & Van den Bulte, C. (1992). The 4P classification of the marketing mix revisited (PDF). Journal of marketing, 56(4), 83-93.
  37. ↑ Singh, M. (2012). Marketing mix of 4P's for competitive advantage[失咗效嘅鏈] (PDF). IOSR Journal of Business and Management, 3(6), 40-45.
  38. ↑ Grieves, Michael (2005). Product Lifecycle Management: Driving the Next Generation of Lean Thinking. McGraw-Hill.
  39. ↑ Borden, N., "The Concept of the Marketing Mix," Journal of Advertising Research, June 1964 pp. 2–7; van Waterschoot, W. and van den Bulte, C., "The 4P Classification of the Marketing Mix Revisited," Journal of Marketing, Vol. 56, No. 4, 1992, pp. 83–93.
  40. ↑ Borden, Neil H & M. V. Marshall (1959). Advertising Management: Text and Cases. Homewood, III, Richard D. Irwin.
  41. ↑ "Uber Is Trying to Patent Its Surge Pricing Technology 互聯網檔案館嘅歸檔，歸檔日期2021年3月4號，.". Time. December 19, 2014.
  42. ↑ "Uber Seeks to Patent Pricing Surges That Critics Call Gouging". Bloomberg L.P. December 19,
  43. ↑ Wright, R., Marketing: Origins, Concepts, Environment, Holborn, London, Thomson Learning, 1999, pp 250-251.
  44. ↑ Some Consequences of Poor Distribution Network Design. Logistics Bureau.
  45. ↑ Logistics Manager.
  46. ↑ Saura, J. R. (2020). Using Data Sciences in Digital Marketing: Framework, methods, and performance metrics. Journal of Innovation & Knowledge.
  47. ↑ Arens, William, & Michael Weigold. Contemporary Advertising: And Integrated Marketing Communications (2012).
  48. ↑ Belch, George E., and Michael A. Belch. Advertising and Promotion: An Integrated Marketing Communications Perspective (10th ed. 2014).
  49. ↑ Anderson, John R. (2004). Cognitive Psychology and Its Implications (6th ed.). Worth Publishers. p. 519.
  50. ↑ Crawford, Matthew B. (March 31, 2015). "Introduction, Attention as a Cultural Problem". The World Beyond Your Head: On Becoming an Individual in an Age of Distraction (hardcover) (1st ed.). Farrar, Straus and Giroux. p. 11.
  51. ↑ Wu, Fang; Huberman, Bernardo (2007), "Novelty and collective attention", Proceedings of the National Academy of Sciences of the United States of America, 104 (17599): 17599–17601.
  52. ↑ Baker, Michael (2008). The Strategic Marketing Plan Audit. p. 3
  53. 1 2 Dess, Gregory (2018). Strategic Management. United States: McGraw-Hill. p. 73.
  54. ↑ Armstrong, M. A handbook of Human Resource Management Practice (10th edition) 2006, Kogan Page, London
  55. 1 2 Porter, Michael E. (1980). Competitive Strategy. Free Press.
  56. ↑ Kiechel, Walter (2010). The Lords of Strategy. Harvard Business Press.
  57. ↑ Market Research is a subset of Marketing Research "Difference Between Market & Marketing Research". 24 September 2019.
  58. ↑ Gilal, F. G., Paul, J., Gilal, N. G., & Gilal, R. G. (2021). The role of organismic integration theory in marketing science: A systematic review and research agenda. European Management Journal.
  59. ↑ Curd, M., & Cover, J. A. (1998). Philosophy of science: The central issues. C. Pincock (Ed.). New York: WW Norton.
  60. ↑ Ketokivi, M., & Choi, T. (2014). Renaissance of case research as a scientific method. Journal of Operations Management, 32(5), 232-240.
  61. ↑ Clark, A. (2000). Mindware: An introduction to the philosophy of cognitive science. Oxford University Press.
  62. ↑ Brian Jones, D.G. and Shaw, E.H, "The History of Marketing Thought," in Handbook of Marketing, Weitz, R. and Wensley, R. (eds), London, UK, (2003), p. 50
  63. ↑ Hollander, Stanley C.; Rassuli, Kathleen M.; Jones, D. G. Brian; Dix, Laura Farlow (2005). "Periodization in Marketing History". Journal of Macromarketing. 25 (1): 32-41.
  64. ↑ Narver, J.C. and Slater, S.F., "The Effect of a Market Orientation on Business Profitability". Journal of Marketing, Vol 54, no. 4, pp 20-34.
  65. ↑ Kotler, P., "Marketing Management: Analysis, Planning, Implementation and Control", Prentice Hall, 1997. p.17
  66. ↑ Solomon, N.R., Marshall, G. and Stuart, E., Marketing: Real People, Real Choices, 5th ed, Pearson, 2009, Chapter 1.
  67. ↑ McGee, L.W. and Spiro, R.L., "The Marketing Concept in Perspective," Business Horizons, May-June 1988, pp 40-45.
  68. ↑ Chartres, Nicholas; Cooper, Courtney B.; Bland, Garret; Pelch, Katherine E.; Gandhi, Sheiphali A.; BakenRa, Abena; Woodruff, Tracey J. (2024-12-31). "Effects of Microplastic Exposure on Human Digestive, Reproductive, and Respiratory Health: A Rapid Systematic Review". Environmental Science & Technology. 58 (52): 22843–22864. Bibcode:2024EnST...5822843C. doi:10.1021/acs.est.3c09524. ISSN 0013-936X. PMC 11697325. PMID 39692326.
  69. ↑ Kotler, P., "What Consumerism Means for Marketers", Harvard Business Review, vol. 50, no. 3, 1972, pp 48-57.
  70. ↑ Crane, A. and Desmond, J., "Societal Marketing and Morality", European Journal of Marketing, Vol. 36 Issue: 5/6, 2002, pp. 548-569.
  71. ↑ Belz F., & Peattie K.(2009). Sustainability Marketing: A Global Perspective. John Wiley & Sons.
  72. ↑ Kotler, P and Armstrong, G., Principles of Marketing, 9th ed., Prentice Hall; Griffin and Ebrert, Business 5th edition, Prentice Hall.
  73. ↑ Spiro, Roseann; Gregory Rich; William Stanton (2008). Management of a Sales Force (12th ed.). McGraw-Hill Irwin.
  74. ↑ Peppers & Rogers Group, Relationship Marketing 3.0: Thriving in Marketing's New Ecosystem, [White Paper], 2009
  75. ↑ Jaakonmäki, R., Müller, O., & Vom Brocke, J. (2017, January). The impact of content, context, and creator on user engagement in social media marketing 互聯網檔案館嘅歸檔，歸檔日期2021年3月6號，. (PDF). In Proceedings of the 50th Hawaii international conference on system sciences.
  76. ↑ "The Four Faces of Digital Marketing". American Marketing Association.
  77. ↑ Nielsen (10 March 2016). "Digital Advertising is Rising in Canada, Requiring More Sophisticated Measures of Success". Nielsen.
  78. ↑ Brown, Bruce C. (2009). The Complete Guide to Affiliate Marketing on the Web: How to Use and Profit from Affiliate Marketing Programs. Ocala, FL: Atlantic Publishing Company. p. 17.

拎

[編輯]
由「https://zh-yue.wikipedia.org/w/index.php?title=市場學&oldid=2456049」收