巴洛克
(由巴洛克式跳轉過嚟)
巴洛克（粵拼：baa1 lok3 haak1，意大利文：Barocco），又譯巴羅克，係歐洲藝術革新風格，喺文藝復興之後出現，大概喺1590年代開始喺意大利羅馬興起，跟住蔓延到歐洲其他地方，一路去到大概1720年代，畀新古典主義同其他藝術風格取代。
音樂舞蹈
[編輯]睇埋：芭蕾舞
巴洛克音樂包括咗好多隻曲種：
- 莎拉班德（Sarabande；西班牙文：Zarabanda）：16 世紀上半橛發源於西班牙嘅一種舞曲同舞蹈，喺古典樂當中相當受歡迎，例如韓德爾（Handel）嘅《D 小調鍵盤組曲 HMV 437》（Keyboard suite in D minor HWV 437）入面嘅第四樂章就係一首好出名嘅莎拉班德[1]；現代嘅莎拉班德舞曲會跟 3/2 拍號跳，有好似下圖噉嘅節奏，速度偏慢，好多時得嗰 70 bpm 左右，俾人形容係「氣氛生動活潑」。啲人喺跟莎拉班德跳舞嗰時，通常數拍子會跟兩段節拍嘅方式數，即係「1 2 3 4 5 6... 1 2 3 4 5 6...」噉數[2]。
第四樂章嘅一個版本
- 阿里曼德（Allemande；法文「德國式」噉解）：源自 16 世紀德國嘅一種舞曲，不過係由法國發揚光大嘅，好似巴哈（Bach）同韓德爾等嘅著名作曲家都作過阿里曼德；喺音樂特性上，阿里曼德 4/4 拍，有好似下圖噉嘅節奏，速度傾向喺 100 bpm 上下（算係微快），形式上傾向用二段體，十六分音符零舍多[3]；有啲學者覺得，阿里曼德係一種好「嚴肅同儀式化」嘅舞，忌切分音（指啲特登唔跟拍子嘅音），傾向表達滿意等正面得嚟輕微嘅情緒，成日俾人攞嚟做一套組曲嘅第一樂章[4]。
建築風格
[編輯]内文：巴洛克式建築
巴洛克式建築（Baroque architecture）係一種喺 17 世紀嘅意大利發源嘅建築風格。當時基督新教發源咗冇幾耐，但係成功噉由羅馬天主教會手上攞走咗好多信徒，於是依然由羅馬天主教主導嘅拉丁歐洲－指法國、意大利、西班牙、同葡萄牙呢啲語言發源自拉丁文嘅地區－發展咗一套用嚟展示羅馬教會權威嘅風格[5]。
巴洛克式建築係一種好浮誇嘅風格：巴洛克式嘅教堂興有好闊、有時呈橢圓形嘅中殿；有陣時啲建築元素會特登整到好似唔完整噉嘅樣；啲裝飾會華麗得好交關而且興鑲金；天花板會有大規模嘅濕壁畫；內部會勁喺度用畫同雕像做裝飾；甚至乎啲牆上面嘅裝飾興運用視錯覺呀噉。大量使用圖像（無論係畫定係雕像）同埋華麗裝飾呢啲特徵好具有羅馬天主教嘅作風，所以以新教徒為主嘅日耳曼地區（包括英國、德國、同北歐等）好多時都唔多鍾意呢種風格，甚至對巴洛克懷有敵意，所以巴洛克嘅代表作多數集中喺拉丁歐洲同埋受拉丁歐洲影響過嘅地區。另一方面，巴洛克式嘅建築喺粵港澳地區都見得到，尤其係前葡萄牙殖民地澳門，噉係因為嗰陣時嘅粵港澳地區係明朝對西歐嘅主要港口，令到西歐文化湧入粵港澳地區[5]。
.jpg)
.jpg)
.jpg)
攷
[編輯]- ↑ Hicks, Anthony (2001). "Handel, George Frideric". In Sadie, Stanley; Tyrrell, John (eds.). The New Grove Dictionary of Music and Musicians. x (2nd ed.). London: Macmillan. p. 804.
- ↑ Dance Rhythms for Ballet Pianists. RAD.
- ↑ A Baroque Glossary.
- ↑ Blatter, Alfred (2007). Revisiting music theory: a guide to the practice, p.28.
- ↑ 5.0 5.1 Though there is a vast literature on the subject, a succinct overview can be found in: Francis Ching, Mark Jarzombek, Vikram Prakash, A Global History of Architecture, Wiley Press, 2006.