廣東省人民體育場

廣東省人民體育場

東較場
廣東省人民體育場（喺4號看台嘅門口度影）
基本資料
位置	中國廣東廣州越秀區 烈士陵園正門南邊 兩條較場路之間 雲海通津北邊
業主	廣東省體育局
草坪表層	草地
容納人數	15,000
建築
啟用	1454年
重修	1916年12月

 廣東省人民體育場（粵拼：gwong2 dung1 saang2 jan4 man4 tai2 juk6 coeng4） ，簡稱東較場（「場」字讀「腸」，dung1 gaau3 coeng2），之前嗌過中正體育場zung1 zing3 tai2 juk6 coeng4、廣東省立體育場gwong2 dung1 saang2 laap6 tai2 juk6 coeng4，係中國廣東廣州嘅一間綜合性體育場，喺越秀區中山三路南邊（烈士陵園對面）；較場西路嘅東邊（中華廣場嘅東門同埋中華國際中心嘅對面）；較場東路嘅西邊；雲海通津北邊。呢間體育場重係中國內地其中一間歷史比較耐嘅體育場。呢間體育場喺1454年起好。

史

「東較場」

之前廣東省人民體育場係個古代練兵場。喺1454年，嗰時專門睺住兩廣軍務都察院嘅右副都禦史（廣東嗰邊）——馬昂，就喺廣州嘅東邊起咗個古代練兵場出嚟；喺1683年就重新裝修，嗰時嘅體育場好細，得128800平方米，喺裝修嗰陣重改咗名嗌「東較場」。喺明清時期，呢個場地成日搞閱兵、操練同埋武術比賽，所以「東較場」嘅名就係噉嚟。

1901年，武術嘅科舉制度取消咗，用咗1200年嘅武術科舉就成為歷史。喺1906年就改咗一次名，嗌「廣東省運動場」。嗰年重辦咗第一屆廣東省大運動會；

民國時期

喺1916年12月，廣東省政府出錢起咗間公共體育場出嚟，而呢個體育場喺1932年起好；喺起緊公共體育場嗰時，好多改變成個中國命運嘅事件喺東較場發生。首先喺1922年5月2號，呢度辦咗由孫中山授旗嚟開辦嘅粵軍第二軍北伐誓師典禮。跟住係1925年6月23號，為咗抗議帝國主義喺上海搞嘅五卅慘案，周恩來同埋省港大罷工嘅工人同埋各界群眾喺東較場嗰度搞咗個大會嚟撐上海嘅鬥爭，重組織咗100000人嘅反帝大遊行，結果遊行隊去到沙基就俾沙面租界嘅英軍開槍掃射而搞出咗單沙基慘案。喺1926年元旦，中國國民黨第二次代表大會開幕之後就喺東較場度舉行咗閱兵儀式，有20萬個軍民大嗌「打倒帝國主義同軍閥」嘅口號。喺1926年7月9號，呢度重辦咗北伐誓師大會，拉開咗北伐戰爭嘅序幕。1935年，廣東省體育專科學校成立咗，之後呢個場地重俾人定咗係廣東省體育專科嘅運動場。1938年抗日戰爭期間，日軍攻陷廣州，重將嗰時嘅廣東省立體育場攞咗嚟做軍用倉庫同埋兵工廠。1947年，國民黨接手呢間體育場之後，就改咗名做中正體育場。

中華人民共和國成立之後

喺1949年10月14號共產黨攻佔廣州之後，毛澤東同朱德發佈《中國人民解放軍佈告》，將體育畀返人民，所以廣東省人民政府就開始重新起返間畀日軍搞冧咗嘅體育場。就喺1950年7月，廣東省人民政府將呢間體育場改名叫「廣東省人民體育場」，重一直用到而家，而呢個名就係「屬於人民自己嘅體育場」噉解。不過體育場嘅周邊地塊俾啲居民住宅攞嗮。喺20世紀50年代到60年代之間，呢個體育場從原先坐到8,000位觀眾，整大到可以畀11,000位觀眾入去睇嘅鐵架木板看台。

改革開放之後

1983年，為咗舉辦國際女子足球邀請賽，呢間體育場重改咗嚟起有27096個座位嘅鋼筋混凝土看台同埋4座燈光照明鐵塔嘅足球場。喺1990年，為咗搞好喺廣東辦嘅第一屆女足世界盃，由霍英東負責出錢嚟重新裝修過間體育場：喺東西看台個度起咗個擋雨棚；而觀眾席重整咗個塑膠凳；田徑場就起咗個塑膠跑道，重改造埋電子顯示屏幕同埋音響功能，變成一個標準嘅現代體育場。

舉辦過嘅賽事同慶典

• 1906年：好多次嘅廣東省運動會
• 1983年11月16號～1983年11月27號：廣州國際女子足球邀請賽
• 1991年：第一屆女子足球世界盃
• 2000年：第17屆男子足球世界盃外圍賽
• 2001年11月20號～2001年12月5號：九運會嘅足球比賽場地。
• 2010年11月12號～2010年11月25號：廣州亞運會嘅足球比賽場地。
• 2016年1月3號：第38屆省港盃後半輪賽事。
• 2016年2月27號：第6屆廣府廟會花車巡遊。

附近嘅交通

• 地鐵：

  1號綫：烈士陵園站

• 巴士：

  烈士陵園站

連出去

• 百年历史体育场 见证世纪沧桑风云
• 再见，东较场！
• 比赛场馆-亚运百科 第16届亚洲运动会官方网站