恆河

恆河

恆hang4河（梵文：गङ्गा，羅馬拼音：Ganga；孟加拉文：পদ্মা，羅馬拼音：Padma）係南亞嘅一條河，流經印度同孟加拉。佢係印度最長嘅河，有2,525公里咁長；佢同布拉馬普特拉河以及梅克納河夾埋，係世界上流量最大嘅水系之一。 恆河由印度北阿坎德邦出發，經過恆河平原，流入印度洋孟加拉灣。

恆河係印度教嘅聖河，恆河女神亦係佢哋主要嘅神。除此之外，恆河仲養活咗唔少魚同其他動物，以及住喺附近嘅人，所以好重要。不過呢條咁緊要嘅河俾人污染得好嚴重。

名

喺梵文入面，恆河叫 Ganga，有流得快、唔斷流嘅含義。

恆河個中文名意思係「恆久嘅河」，就係嚟自呢個含義。佢另外仲有「殑ging6伽河」呢個名，係唐代玄奘法師譯嘅。

恆河流到去孟加拉叫做 Padma，意思係蓮花，中文又譯做博多河。

流向

恆河喺印度北部發源之後大致向東南方向走，經過孟加拉，最後流入印度洋。

源頭

帕吉勒提河

恆河嘅發源地有兩個講法，兩個都喺喜馬拉雅山西邊、印度北部嘅北阿坎德邦嗰度。帕吉勒提河（Bhagirathi River）係印度教神話入面嘅恆河發源地，佢啲水嚟自根戈德里冰川（Gangotri Glacier）嘅融冰。而長啲嘅阿勒格嫩達河（Alaknanda River）就係水文學上恆河嘅源頭，佢嘅水嚟自喜馬拉雅山嘅融雪。恆河嘅幹流就係喺呢兩條河嘅合流點嗰度開始。

除咗呢兩條河，恆河仲有四條主要源流。一共六條河，連同佢哋嘅合流點，都係印度教入面神聖嘅。

支流同分流

恆河之後由喜馬拉雅山嘅山谷流入開闊嘅恆河平原，大致由西南走向轉做東南。恆河第二大流量嘅支流亞穆納河就係喺呢度同恆河匯合；兩條河合流之後有成58.5%嘅水都係由亞穆納河貢獻嘅。

跟住恆河再轉彎向住東面流。恆河喺幾條細啲嘅河加入咗之後，就同加格拉河（Ghaghara River）相遇。加格拉河同樣由喜馬拉雅山開始；佢經西藏同尼泊爾，最後同恆河接合，係恆河最大流量嘅支流。

之後恆河又轉返向東南面流。喺流入孟加拉境内之前，恆河就出現咗第一條分流，叫胡格利河（Hooghly River）。

孟加拉段

恆河喺孟加拉嗰段叫做Padma。佢先同布拉馬普特拉河嘅分流匯合，之後再同梅克納河（Meghna River）合流，最後流入印度洋嘅孟加拉灣。

恆河水入面嘅沉積物喺出海口形成恆河三角洲。佢有成64,000 km²咁大， 係世界上最大嘅三角洲。

地圖

臺 灣 海 峽 白令海 恆河 白令海峽 哥打華里河 戈壁沙漠 南海 挪威海 新畿內亞 多瑙河 東西伯利亞海 東海 日本海 東北 平原 立借夫海 利拿河 馬麻拉海 馬來半島 湄公河 馬爾代夫 巴倫支海 貝加爾湖 峇里 波羅的海 白海 孟加拉灣 婆羅洲 北冰洋 北海 伏加河 雅魯藏布江 庫頁島 北威拿河 蘇門答臘 蘇拉威西 斯間地那維亞 西奈 星加坡島 細亞細亞 亞丁灣 阿剌伯半島 阿剌伯海 鹹海 黑龍江 亞速海 非洲之角 鶯曼羣島 阿爾泰山 愛琴海 耶尼射河 阿曼灣 鄂河 澳洲 鄂荷次克海 烏拉河 烏拉山脈 幼發拉底河 伊朗高原 印度河 印度次大陸 彥地結卡河 北印度洋 中南半島 日本列島 爪哇 珠江 長江 祁連山 卡拉海 喀喇崑崙 裏海 琴察加半島 高加索 加羅蓮 羣島 哥羅馬河 崑崙 聖誕島 塔克拉瑪干 沙漠 泰國灣 北太平洋 天山 北部灣 底格里斯河 帝汶 青藏高原 帕米爾 波斯灣 比初拉河 菲律賓 菲律賓海 朝鮮半島 北海道 紅海 華北 平原 黃河 黃海 黑海 喜馬拉雅山 印度大  平原 興都古舒 臺灣 亞洲主要地理

歷史

恆河流經嘅恆河平原係中央平原嘅一部分，呢度俾人話係好幾個文明嘅搖籃。由公元前三世紀嘅孔雀王朝，一路到十六世紀嘅蒙兀兒汗國都係呢度出嚟嘅。

印孟水利糾紛

去到1951年，印度諗住起條河壩，將一啲河水引流去胡格利河嗰邊。座壩就起喺印度同東巴基斯坦（今日嘅孟加拉）邊境附近，喺旱年會搞到去東巴嘅水得返五分之一左右。東巴於是提出反對，然後爭拗就開始咗。要去到1996年，孟加拉已經獨立咗廿五年，印孟兩邊先至和解。佢哋簽咗分三十年協議，確保孟加拉唔會冇水。

宗教同文化

睇埋：印度教

恆河聖水

恆河係印度教嘅聖河，啲水啱搞宗教儀式。佢亦係其他聖河嘅體現，例如哥達瓦里河又叫做南面恆河。

作用

喺印度教文化入面，流水可以吸走雜質，而恆河就將啲嘢沖得最乾淨。流水除咗洗走灰塵之外，仲有心靈入面嘅污糟嘢。所以就算科學角度上面恆河水質有幾差都好，恆河水都係喺宗教儀式同象徵意義上純潔嘅。浸喺恆河入面可以洗走一個人成世嘅罪過，所以好多信印度教嘅人都會去浸下，尤其係去水流特別快嘅上游。

大壺節

2001年大壺節嘅情景

大壺節係印度教信徒去恆河聚集朝聖嘅節日，每十二年一次。而每六年會有一次中型集會，每三年就一次小聚。大壺節嘅主要活動係喺恆河邊浸浴嘅儀式，另外仲有宗教辯論、唱詩歌等等。大壺節係印度教嘅朝聖之旅入面最神聖嗰個，所以好多苦行僧都會參加，每次集會都吸引到幾百萬信徒。

恆河女神

喺印度教入面，恆河仲係一位好重要嘅女神，叫做甘加（Ganga）。好多印度教信徒都會拜佢。

作為呀媽

恆河喺印度教入面又稱之為甘加媽媽（Ganga Mata）。一來佢會包容、寬恕嗮所有嘢，好似母愛噉；而且同其他女神唔同，佢完全冇毀滅性嗰面。二來甘加真係好幾個神嘅呀媽，包括毗濕摩（Bhishma）同其他幾位婆藪（Vasu）。

作為配偶

印度教三個最重要嘅神合稱叫三相神，而甘加係全部三位嘅配偶。喺關於創造神梵天嘅故仔入面，甘加通常以水嘅形式出現，跟住梵天周圍去。

就住守護神毗濕奴嚟講，有神話話到甘加係毗濕奴三個老婆之一。恆河嘅出現係因為佢同另一位爭寵嗰陣互相咒對方變做一條河、要幫佢哋嘅信徒洗清罪過。毗濕奴知道之後就決定將佢哋分開，要甘加做梵天老婆，另一位做毀滅神濕婆老婆，而淨返嗰位和事嘅就繼續做佢老婆。點知嗰兩位係噉嘈，搞到毗濕奴要收回成命，最後佢哋以河嘅形式繼續陪住毗濕奴。

至於甘加同毀滅神濕婆嘅關係係最親密嘅。有段故話甘加一次又一次噉由天上跌落凡間，跌入濕婆嘅頭髮裏面，於是就不斷俾濕婆馴服。

生態

魚

恆河流域入面大概有350款魚，其中有幾款係恆河獨有嘅。淨係計品種，有一半都屬於鯉形目、兩成半係各種鯰魚。受威脅嘅有30種，原因包括過度同非法捉魚、污染等等。

恆河豚

恆河豚

恆河其中一款最出名嘅動物係恆河豚（學名：Platanista gangetica gangetica）。佢係世界上五款淡水海豚之一，仲係印度嘅國家代表水生動物。以前喺恆河同布拉馬普特拉河都有好多恆河豚，但今時今日因為污染等嘅問題，世界自然基金會話2012年已經淨低三千隻。

經濟

農業同漁業

恆河水入面嘅沉積物有好多養分，所以佢流域嘅泥土都夠嗮肥沃，好啱種嘢。加埋佢嘅河水常年俾農夫攞嚟淋水，所以恆河對農業為主嘅印度同孟加拉經濟特別重要。種喺恆河附近嘅農作物包括米、蔗、薯仔、辣椒等等。另外，有唔少漁夫會喺恆河捉魚，所以嗰度漁業都幾旺盛。

旅遊業

當地另一個主要產業係宗教旅遊。印度教有幾個聖地都喺正恆河隔籬，吸引好多信徒去朝聖。恆河嘅急流亦都出名可以撐艇，每年夏天都會有人去嗰度玩。除此之外，有幾座城都喺恆河邊起咗步道，吸引遊客去睇風景，包括印度比哈爾邦首府巴特那。

污染同健康問題

恆河嘅污染問題非常嚴重。淨係喺維華拿斯，每日就有差唔多二億公升未經處理嘅污水排落恆河入面。呢個情況導致河水入面有好多糞生大腸桿菌（fecal coliform），超出咗當地政府畀沖涼水嘅安全指引120倍。 而維華拿斯作為印度教其中一座聖城，不時都會有大批信徒去嗰度浸浴，搞到有嚴重嘅健康風險。

有研究估計，每年用恆河水浸浴、洗碗碟、或者刷牙嘅人入面，有三分之二都會病。呢啲病包括霍亂、痢疾、甲型肝炎、同傷寒。

恆河行動計劃

喺1985年，印度政府提出咗恆河行動計劃（Ganga Action Plan），打算用截留、分流、同處理污水嘅方法改善恆河水質。有人話個計劃係「世界上清理一條河嘅最大嘗試」，十五年合共使咗二億幾美金，但卒之都係失敗告終。個計劃唔單只延期、超支，仲要執行得好差，冇乜成效。有學者話原因係做環境規劃嗰陣冇清楚理解到人同環境嘅互動，亦有學者話係貪污問題。

其他解決方法

喺2008年，恆河正式成為印度「國河」。政府趁機成立咗國家恆河流域管理局（National Ganga River Basin Authority）去計劃同實施保護恆河嘅措施。

喺2017年，北阿坎德邦高院將恆河宣佈做法人，畀咗啲權利佢。 但係唔少人都話好難執行，唔會有用。