西郊泳場

出自維基百科,自由嘅百科全書
Jump to navigation Jump to search
西郊泳場正門,而家收費亭喺左手邊間屋仔入面。
西郊泳場入面嘅沙灘游水池(2014年6月29號)

西郊泳場粵拼sai1 gaau1 wing6 coeng4),又叫西郊游水場sai1 gaau1 jau4 seoi2 coeng4)或西郊游泳場sai1 gaau1 jau4 wing6 coeng4),係中國廣東廣州嘅大型泳池,1930年起好,位置喺荔灣區黃沙大道粵南大街3號,近珠江大橋落橋位,總面積成30萬平方米,綠化地8000平方米,入面有人造沙灘泳池同2個標準池、1個室內池同1個跳水池,其中沙灘游水池喺2012年5月喐手起,10月起好。室內游水池同跳水池喺2015年底喐手起,2016年12月開放。

西郊泳場係廣州最早嘅三大泳池(另外兩間分別係珠江泳場沙面泳場)之一[1],對面可以望到海角紅樓泳場

[編輯]

成立初期[編輯]

1928年,陳策、司徒優、關崇志、陳本夾份創辦廣東體育學校,但學生當年要去西關陳家祠嘅體校上游泳班(今日荔灣體育場),每個月行路一次到豐寧路同虎長路交界(今日人民中路惠福西路嘅交界)搭長途巴到東山水上體育會游泳場度上游水課。

游水教練黃麗棠到處呼籲,希望喺自己嘅學校入面開個游水場。後嚟佢嘅盟友——梁彧農收到水之後,就喺荔枝灣涌口嘅東邊搞咗有6畝幾嘅廢灘,而呢笪地係梁彧農嘅老婆——黎壽彭嚟負責,呢笪地附近有間牛皮寮,成日污水橫流,變咗臭水灘,不過除咗呢度就冇得揀第度喇。後嚟經過黃梁黎呢3個人嘅努力,就同牛皮寮一齊幫手,另外挖條深溝出嚟,將啲污水喺後面度排,之後重用咗用竹木攔嚟攔住呢個海灘,用咗深挖出嚟嘅泥喺差唔多陸地邊度起咗個壩。由於呢笪灘喺水嘅漲潮同退潮嗰陣,成日經過呢度,結果過咗幾個月,呢度啲土質同水質都恢復到重未有牛皮寮嗰陣嘅樣。到咗1930年,游水場就起好咗。之前係用咗竹木結構,上面重整咗葵蓬響度,入面最先整咗高、中、初三個游水池。就係噉,呢度有一班細路哥就出咗何培昌、朱志成、蘇天膜、葉子由、黃彼得(黃麗棠個仔)、吳年呢啲猛人,因為佢成日都喺西郊泳場度訓練,而呢個游水場,除咗黃彼得後嚟死咗之外,其他幾位都變咗廣東省同廣州市嘅游水界入面,最出名嘅猛人。

嗰時嘅西郊泳場凈係得差唔多3000平方米咁大,場入面有個初級池,又窄又長嘅中級池,靠住條河邊嘅係高級池,池嘅中間重有個細嘅浮台響度,而台邊架有跳板嚟畀人跳水用。嗰時,雖然話西郊泳場嘅設備好簡陋,但因為交通好方便,收費又平,所以有好多後生仔嚟呢度游水。

起咗間水警講習所[編輯]

1931年,廣州市警察局就鬧咗西郊泳場啲嘢,佢想霸咗呢度嚟起水警講習所,但係,由於梁彧農同黎壽彭都係泮塘同西村嘅望族,而且黎壽彭重攞埋呢笪地嘅產權,後嚟經過協商,就用咗廣州市員警體育會嘅名嚟免費辦水警講習所。而游水場重係梁彧農同黎壽彭嚟負責管理。喺日本人霸咗廣州嗰陣,水警講習所就冇咗。

重建[編輯]

雖然話喺日本人霸咗廣州嗰陣,游水場冧咗,但係到咗1946年,游水場就恢復咗營業,不過佢重係用咗以前1930年起嘅竹棚嗰種。喺嗰時,廣州入面凈係得好少可以畀人游水嘅公眾泳池,所以有好多人去咗西郊泳場度游水。

荔灣游泳場[編輯]

1947年,嗰時嘅廣東省銀行行長鄒殿邦嚟出錢,喺青年泳池嗰的起咗個木料結構,松皮蓋頂嘅泳場,重改咗名嗌「荔灣游泳場」。而場入面有個四方形嘅初級池、一個50×50米嘅高級池,喺池嘅中間重有個10米高嘅跳水台,而跳水台嘅兩邊重有跳板響度,高級池嘅兩端重起咗各長27米六級嘅觀眾台嚟畀成千人嚟睇游水比賽。而高級池嘅四邊,全部啲走廊都係通嘅,而喺初級池同高級池之間,重有條好闊嘅走廊響度。而中西菜部、士多、粥品部、攝影部等都喺大走廊度起咗,喺嗰時,呢度係個幾有規模嘅游水場。喺荔灣游泳場開幕呢晚,喺初級池度唔好彩,出咗單溺水事故,重有呢個泳場附近冇水上碼頭響度,交通都唔係好方便,後嚟1948年嗰陣,荔灣游泳場唔撈喇,入面嘅設施冚唪唥畀嗮西郊泳場,而西郊泳場嘅面積就去到12000平方米。

同荔灣游泳場合併咗之後[編輯]

喺荔灣游泳場話唔撈之後嘅第二年,間游水場重係嗌「西郊遊泳場」個名,而人員方面,除咗總幹事同副總幹事同財務係換咗,變咗分別係任伯泉同黃某、謝子安同吳月馨嚟做;但其他波士級位重係啲西郊泳場嘅原班人馬未逳過。而總幹事同副總幹事就負責丼錢,招咗啲外企股份返嚟起大咗個游水場。由於個規模擴大咗,編制都擴大埋,業務都變多咗,佢重喺游水場附近起咗個溜冰場添。而滑水場喺1949年解咗放之後,就變咗有瀡滑梯設備嘅兒童樂園。

解放之後[編輯]

  • 1949年嘅解放之後,西郊泳場就畀返廣州人民政府領導嚟睺實呢度。
  • 1950年就畀咗李卓儒(而家係廣州市體育分會秘書長)嚟睺實呢度。之前改咗個名嗌「西郊人民游泳場」,之後畀返廣州市體育分會嚟睺實呢度。
  • 1960年就畀咗荔灣區體育委員會嚟睺實呢度,經過咗三次嘅範圍擴大,全場面積去到28000平方米。而泳池嘅結構就改咗用水泥鋼筋結構。之前嘅滑水場變咗係兒童池。另外重起咗個800幾平方米嘅大滑水場。不過由於附近嘅珠江成日都出污染,重有漲潮同退潮嘅影響,嗰陣已經起咗3個用自來水裝嘅50×25米儲水池,重有2個河水高級池同1個跳水池同1個沙灘池,入面重有籃球場、器械場、桌球室、飲冰室呢啲設備,變咗間綜合性嘅活動場地。

重新大修同加開室內場[編輯]

喺2012年5月9號,西郊泳場開始停業改造[2]。而改造方面,就係將之前有65年歷史嘅水上樂園拆咗,改成沙灘游水池[3]。呢個裝修嘅工程一直到2012年10月8號重新開放。[4]

2015年9月28號,泳場打算喺北邊嘅室內場館搞大改造,準備整返個室內池同跳水池出嚟[5]。重喺2016年春末正式入咗調試階段[6],同年12月正式開放。

2017年5月底,園方開始圍蔽橫渡池搞改造,直到2018年2月先至正式開放。

設施同開放時間[編輯]

西郊泳場泳池有個啱晒國際標準嘅25米標準池,另外有沙灘池、橫渡池同埋室內池、跳水池。

水深 開放時間
兒童池 0.4m~0.6m 凈限7~8月嘅上晝、晏晝同晚黑時段開放。 細路入場時必須有大人陪同
沙灘池 0m~1.5m 每日06:30~21:30
限每年4月底到10月底開放
健身池 1.4m~2m 每年5~10月:06:30~21:30
每年11月~第二年4月:07:00~11:00、14:00~17:30
必須要帶游水帽先至畀落水游
未夠14歲啲人落水游時必須有大人陪同
橫渡池 2.3m 每日07:00~10:00、15:00~17:30
至少達到粉海豚等級先至畀入去游。
必須要有中華人民共和國體育部頒發嘅「海豚證」
重要至少達到「粉海豚」等級先至入得。
要攞到「海豚證」,一定要過到以下兩關:
1. 通過體能測試
2. 標準池或室內池嘅游水時間測試
申請海豚證嘅,必須要向室外健身池或室內池啲救生員問下數先至得。
室內池 1.6m~2m 每年5~10月:07:00~21:15
每年11月~第二年4月:07:00~18:30
(限一次性出入)
入場時必須要畀喺售票處賣嘅室內場飛先至入得
落池游水必須要帶泳帽
唔識連續游超過50m嘅泳客,唔畀入。
雖然室內池飛可以包玩埋室外池任何項,但限一次性出入。
跳水池 4.8m 唔對外。凈限跳水氼水水上芭蕾啲訓練或參賽隊用。 個人需要使用嘅必須要向館方提出申請兼批准
批准後重要喺館方簽生死狀先至可以用得

另外,喺室內館嘅2號儲物間隔籬有間男女分開嘅濕蒸房,喺每日07:00~12:00及14:00~18:30開放。

[編輯]

附近嘅交通[編輯]

電車

中山八路站、荔灣湖公園西門站

巴士

中山八路站、荔灣湖公園西門站

地鐵

5號綫中山八站

出面網頁[編輯]

[編輯]

  1. 广州珠江泳场[失咗效嘅鏈] 广州网
  2. 西郊泳场变身 泳客吁手下留情 互聯網檔案館歸檔,歸檔日期2016年3月5號,. 新浪 喺2012-05-08搵到
  3. 西郊泳场改造方案:放弃水上乐园改建沙滩泳场 新浪 喺2012-04-11搵到
  4. 西郊泳场暂无“夜水”(图)[失咗效嘅鏈] 網易 喺2012-10-09搵到
  5. 广州西郊泳场要花2.5亿改造[失咗效嘅鏈] 腾讯 (2015-09-29)
  6. "热到变形西郊泳场等着你!要不要一起去游个夜泳?". 廣州日報大洋網. 2016-06-03. (原先內容喺2016-06-04歸檔). 喺2017-04-19搵到.