金髮妹同三隻熊

廿世紀初一幅插圖，描繪想像中嘅三隻熊一家大細。

呢幅插圖描繪三隻熊返到屋企，發現金髮妹睏咗喺熊囝仔張床上面。

《金髮妹mui1同三隻熊》（英文：Goldilocks and the Three Bears），又或者譯做《金髮姑娘同三隻熊》，係一個源自 19 世紀英格蘭嘅童話故事，顧名思義講到一個金頭髮嘅細路女同埋三隻熊。

個故仔好短好簡單，但係就好出名，而且仲有咁上下文化影響力：有唔少創作品都有由呢個故仔嗰度取材，而且廿一世紀初嘅英文當中仲有幾隻字詞係嚟自呢個故仔嘅。

情節

好耐好耐以前有三隻熊。佢哋係一家三口－熊爸爸、熊媽媽同熊囝zai4仔。佢哋住喺森林入面嘅一間屋。有一日，佢哋煲咗啲好靚嘅餬做早餐，不過啲餬熱得滯，所以佢哋就將啲餬分做三碗，然後走咗去散步，諗住畀啲餬慢慢攤凍佢。

正當三隻熊去咗散步嗰陣，有個叫做金髮妹mui1（Goldilocks）嘅細路女捉蝴蝶路過。金髮妹係個好冇家教嘅女仔。佢見到熊家嗰間屋，問都唔問就開門走入去。佢望到檯上面三碗餬好似好好食噉，就想擅自攞嚟食。

首先佢試咗吓熊爸爸嗰碗。「嗯，太熱喇。」

然後佢試咗吓熊媽媽嗰碗。「嗯，太凍喇。」

最後佢試吓熊囝仔嗰碗。「嗯，啱啱好。」（Just right）

於是金髮妹就坐低食熊囝仔嗰碗餬，食到一乾二淨。佢食食吓就開始覺攰，想搵張櫈坐低唞吓。

首先佢試咗吓熊爸爸張櫈。「嗯，太硬喇。」

然後佢試咗吓熊媽媽張櫈。「嗯，太軟喇。」

最後佢試吓熊囝仔張櫈。「嗯，啱啱好。」

於是金髮妹就喺熊囝仔張櫈度坐低，仲坐爛咗張櫈。佢唞唞吓仲瞌眼睏，所以佢就走入睡房，想搵張床。

首先佢試咗吓熊爸爸張床。「嗯，頭嗰邊太高喇。」

然後佢試咗吓熊媽媽張床。「嗯，腳嗰邊太高喇。」

最後佢試吓熊囝仔張床。「嗯，啱啱好。」

於是金髮妹就喺熊囝仔張床度睏覺，仲睏得好淰。

過咗冇幾耐，三隻熊散完步返到屋企。

「有人入咗我哋間屋！」

「有人食過我哋啲餬！」

「有人整爛咗我張櫈！」

三隻熊跟住就喺睡房度發現咗睏緊嘅金髮妹。佢哋嬲起上嚟，就大聲噉咆哮。金髮妹醒咗見到三隻熊喺度大發雷霆，嚇到有咁快得咁快跑。

自此之後，三隻熊就再冇見過金髮妹。故仔完。

故仔嘅原始版本講嘅係一個肉酸嘅老女人，趁三隻擬人化寡佬熊人jan2唔喺屋企嘅時候，入咗佢地森林間屋，老女人食啲糊，坐爛張櫈，上床瞓着。當熊人返嚟見到，佢醒咗，跳出窗，再冇出現過。呢個版本有提到三隻寡佬熊嘥士唔同，大中細三隻。第二個版本用一個叫 Goldilocks 嘅後生金髮妹取代咗老女人，第三個就係到而家為止最出名嘅版本，用一家三口代替寡佬熊人jan2三人組－大熊變咗阿爸，中熊變咗阿媽，而細熊變咗囝仔。

影響

睇埋：金髮妹原則同可住帶

有唔少創作品都有由呢個故仔度取材，例子可以睇吓 2022 年嘅電腦動畫奇幻片《無敵貓劍俠：8+1 條命》或者係 DC 漫畫《Fables》呀噉。

《金髮妹同三隻熊》呢個故仔 just right（啱啱好）嗰句嘢好出名。呢句嘢仲有畀科學界攞嚟幫啲概念改名：有好多科學領域都有講到

「

啲變數嘅數值要啱啱好，唔好太高又唔好太低。

」

呢個諗頭，例如天文學上就有講到可住帶嘅概念，提到一粒行星如果要有生命，佢唔可以離佢粒恆星太遠（太遠就會凍得滯），但又唔可以離佢粒恆星太近（太近就會熱得滯）－粒行星同佢粒恆星之間嘅距離要啱啱好。而喺廿一世紀英文入面，

• 可住帶有陣時會畀人嗌做 Goldilocks Zone ：

  金星：表面閒閒哋攝氏幾百度－「離太陽近得滯，太熱喇。」

  土星：表面閒閒哋攝氏零下百幾度－「離太陽遠得滯，太凍喇。」

  地球：「啱啱好。」

• 「啲變數嘅數值要啱啱好」呢個諗頭畀人改咗個名，叫金髮妹原則（The Goldilocks principle）。

睇埋

• 小紅帽

拎

• Goldilocks and the Three Bears. American Literature （英文），《金髮妹同三隻熊》英文版。
• Literature / Goldilocks （英文），TV Tropes 呢頁講《金髮妹同三隻熊》。