針對香港民主派嘅假新聞

出自維基百科,自由嘅百科全書
跳去導覽 跳去搵嘢

香港民主派時不時會成為假新聞嘅攻擊對象,有啲假新聞來源甚至涉及一啲香港政府官員或者親中派嘅立法會議員。亦有一啲親中派嘅人,就算喺啲假新聞被釐清否定之後,仍然繼續攞嚟攻擊民主派。有香港嘅傳媒人同海外嘅研究都指出,呢啲針對民主派人士同行動嘅假新聞謠言,好有可能係背後有人操控。

事例[編輯]

雨傘革命期間嘅謠言[編輯]

  • Facebook上曾經有一個名為Marc Tan嘅網民留言,聲稱一位朋友嘅大肚老婆,因為佔中令交通擠塞,遲咗去到律敦治醫院分娩,令女嬰嚴重腦缺氧、大量腦細胞死亡。但係文章一出之後,就有網民釐清,律敦治醫院無設有產房,直指呢啲係五毛作故仔,醫院管理局新聞組亦同律敦治醫院核實,稱佔領行動發生之後,並無接受呢個個案[1][2]
  • 有一個自稱叫做「容姐」嘅人,打咗上去香港電台phone-in節目《有李同行》,話因為佔中令佢喺隧道內「塞咗四個鐘」,結果未能同家人到港島見癌症病重媳婦最後一面,但事後有唔少網民話,當日紅隧交通非常疏落。時事評論員范中流亦指,如果塞車四個鐘,必定係大新聞,但各大傳媒未見報道[1][3][4]。資深傳媒人區家麟撰文回應事件嘅時候,形容事件令人心寒,又話呢啲謠言散播係有組織同計劃[3]

黃之鋒以二千萬買樓假新聞[編輯]

喺2019年10月,網上流傳一單假新聞話黃之鋒,以二千萬購入南區豪宅貝沙灣分層戶,當中指明係貝沙灣南灣六座中高層B室單位,買賣由美聯物業促成。黃之鋒否認事件,美聯物業之後回應話佢哋無幫黃之鋒做過任何買賣,《星島日報》記者去土地註冊處做查冊亦未見嗰個單位易手[5]

不過,有啲激進親中派嘅人,仍然攞呢單新聞嚟做文章。例如喺2020年香港立法會選舉民主派初選嘅投票日,黃之鋒喺太古康怡廣場外為袁嘉蔚拉票嘅時候,石房有忽然現身騷擾佢哋嘅拉票活動,用電話拍攝佢哋,又指罵黃之鋒係「漢奸走狗」,用呢單新聞老屈佢。擾攘約10分鐘後,在場好多人指罵石房有,結果石房有自行離開現場[6]

羅范椒芬散播假新聞聲稱有少女向激進派示威者提供性服務[編輯]

2019年9月9號反對逃犯條例修訂草案運動風波期間,行政會議成員羅范椒芬喺接受香港電台英文台節目《Backchat》嘅時候,宣稱有年輕少女為一啲激進示威者提供免費性愛服務,又宣稱已經證實咗件事,聲稱對於呢啲少女被誤導而提供免費性服務感到悲哀[7]

羅范椒芬嘅說法令公眾嘩然,民主派人有唔少人,例如當時出席同一節目嘅吳文遠,仲有黃碧雲同埋陳淑莊都批評佢發放假新聞引起公眾恐慌,行為唔能夠接受[8][9][10],有傳媒亦做咗事實核查,否咗佢嘅說法[11]

2019年香港區議會選舉攻擊民主派候選人嘅留言[編輯]

喺選舉結果公佈後,有多名民主派當選人疑似被微博等一啲社交網站傳聞有不良行為或者生理缺陷。其中喺深水埗南昌北選區擊敗民建聯鄭泳舜公民黨男性當選人劉家衡,就被指係「著名援交女」、「AV天使」;喺油尖旺佐敦南選區擊敗民建聯葉傲冬陳梓維被傳為係庇護工場嘅弱智人士,「自理能力差少少」;而出戰北區清河選區嘅註冊社工袁浩倫就被指啱啱喺戒毒中心完成療程出嚟[12]。其後求驗傳媒批評,呢啲改圖係不實指控[13],被抹黑嘅劉家衡握就回應話無諗過有一日連自己嘅性別都需要澄清[14]

假新聞攻擊背後嘅操作[編輯]

  • 美國獨立社交平台研究公司Graphika喺2021年2月發表報告,指出有數以百萬計嘅虛假社交平台帳戶有組織同有系統咁幫中共唱好,攻擊香港民主派人士同香港反送中運動,又點名提到,包括港人講地在內嘅多名親中派人士同網媒,仲有新民黨成員陳志豪、中國外交部發言人趙立堅、多位中國駐外大使等,有份參與散播垃圾假資訊(spamouflage)。報告又話,有關活動有幕後組織同資金支持[15][16][17]
  • 資深傳媒人區家麟喺分析一啲同佔中有關嘅流言個陣,形容呢啲謠言嘅散播有組織有計劃,識得講故仔,有畫面感有細節,仿真度極高,渠道亦揀得好[18]

參考[編輯]

  1. 1.0 1.1 Https://Www.post852.com, 852郵報 (2014-10-02). "范析852 X 遍地開花│抹黑佔領故事何其多 作假弄虛靠常識揭破|852郵報". 852郵報 (中文). 原著喺2021-03-06歸檔. 喺2021-03-05搵到.
  2. "香港人,你為何健忘? | 別橋". 香港獨立媒體網. 喺2021-03-05搵到.
  3. 3.0 3.1 "令我心寒的一段錄音 | 區家麟". 香港獨立媒體網. 喺2021-03-06搵到.
  4. "紅隧塞車阻見病媳? 區家麟質疑真偽 - 20141002 - 港聞". 明報新聞網 - 每日明報 daily news (中文). 喺2021-03-06搵到.
  5. 頭條日報. "【Kelly Online】傳二千萬購貝沙灣 黃之鋒:假新聞". 頭條日報 Headline Daily (中文). 喺2021-03-03搵到.
  6. 頭條日報. "【立會選舉】譚文豪初選街站義工遇襲 黃之鋒與「大波man」口角". 頭條日報 Headline Daily (中文). 喺2021-03-03搵到.
  7. "羅范亂傳少女讓勇士洩慾 | 蘋果日報". Apple Daily 蘋果日報 (中文). 喺2021-03-05搵到.
  8. "【逃犯條例】民間記者會轟羅范散播「假新聞」 抹黑前線示威者". 明報. 2019-09-09.
  9. 吳倬安 (2019-09-09). "【逃犯條例】羅范椒芬:少女被誤導 為「勇武派」提供免費性服務". 香港01.
  10. "羅范:朋友的朋友稱 有女生供性服務 黃碧雲:若無證據應道歉 示威者:未聽聞 - 20190910 - 要聞". 明報新聞網 - 每日明報 daily news (中文). 喺2021-03-06搵到.
  11. 李忠謙 (2019-09-09). "「有年輕女孩遭到誤導,為抗爭者提供免費性愛!」香港官員指控反送中被「性」驅動,遭批「沒證據就道歉」". 風傳媒.
  12. "【Emily】當選者劉家衡被當「天使」遭問價". 原著喺2019-11-29歸檔. 喺2019-11-30搵到. Unknown parameter |dead-url= ignored (help)
  13. 勝負乃兵家常事,何必屈人吸毒及弱智?
  14. 南昌北 劉家衡 Facebook 專頁
  15. "美報告踢爆中共系統性轉發假消息 點名趙立堅港人講地新民黨員". Radio Free Asia (英文). 喺2021-03-04搵到.
  16. "Spamouflage Breakout - Chinese Spam Network Finally Starts to Gain Some Traction" (PDF).
  17. 自由時報電子報 (2021-02-06). "立堅是你?美報告踢爆中國官員系統性轉發假訊息 - 國際". 自由時報電子報 (中文). 喺2021-03-04搵到.
  18. "令我心寒的一段錄音 | 區家麟". 香港獨立媒體網. 喺2021-03-06搵到.