開門五件事

  呢篇文章講嘅係日本料理嘅諺語。想搵唐餐嘅類似諺語，請睇「開門七件事」。

開門五件事（日文：さしすせそ^{(sashisuseso)} ）係指日本菜入邊成日用嘅五種調味料：砂糖、食鹽、醋、豉油、味噌（即麵豉）。日文夾埋一齊叫「さしすせそ」，係日文五十音入面 S 音字頭完整一行嘅五個假名。呢五個假名咁啱係呢五種調味料各攞一個字母，而次序又同五種調味料落鑊通常用嘅次序一樣。

調味料

煮嘢食，尤其係日本菜，通常都會用到呢五種醬料。五種醬料喺日文裡面嘅發音各攞一個字母，加埋啱啱係五十音表入邊嘅完整一行「さしすせそ」，而呢個次序咁啱又同煮一碟餸嘅時候，五種調味料落鑊嘅次序相同。

粵文	日文漢字	日文假名	羅馬字轉寫	解釋
砂糖	砂糖	さとう	satō	要帶出食材嘅甘味，就要先落糖，因為蔗醣嘅分子大粒過食鹽嘅離子，要早啲醃入新鮮食材入面，噉就唔會俾鹽同豉油嘅鹹味冚過糖嘅甜味。
食鹽	塩	しお	shio	用鹽醃食材會減低滲透壓，將食材嘅水同腥味吸出嚟。落完鹽之後，淨返嗰三件事就係開煲之後先用。
醋	酢	す	su	醋要喺開煲之後先落，因為如果太早落，加熱嘅時候會煲走啲酸味。
豉油	醤油	*せいゆ > しょうゆ	*seiyu > shōyu	醋、豉油、味噌都係發酵食品。如果豉油煮得太耐，會苦，所以落得遲過醋。
麵豉	味噌	みそ	miso	麵豉係煮完嘢食起鑊，裝碟嘅時候先加落碟餸度嘅。

「醬油」現代日文發音係「shōyu」，擺咗落「se」嗰格其實係考古音錯配嘅結果。「醬油」嘅日文漢字發音同「正油」一樣，喺十九世紀、二十世紀初，日本曾經興過用「歷史的假名遣」（日文：歴史的仮名遣），追溯平安時代嘅發音嚟寫日文假名。有人就跟住「shōyu」嘅發音倒推「seiyu」出嚟，然後話「醬油」可以擺落「se」嗰格，但其實「醬油」嘅日文發音從來都係「し」字開頭，唔係「せ」字開頭。

其他調味料

有人話「さ」唔係砂糖而係燒酒（日文：酒さけ^(sake)）。酒同糖一樣會添鮮甜味俾啲食材。砂糖同酒之外，味醂亦有類同功效。

「そ」又有人話係「醬汁」（日文：ソース^(sōsu)，由英文 sauce 借入日文），用法同麵豉類似，都係起鑊之後先加入碟餸一齊食嘅。

粵譯

「さしすせそ」粵文譯做「開門五件事」，係同唐餐嘅開門七件事類比。開門七件事包攬煮嘢食所有重要嘅消耗品，所以包埋柴、米、油、茶；但開門五件事集中講調味料，所以冇咗柴米油茶但加咗日本菜常用過唐餐嘅砂糖同味噌。