阿積與豌豆樹
_(14783256495).jpg)
《阿積與豌豆樹》（英文：Jack and the Beanstalk）係一個好出名嘅童話故事，已知最早嗰個版本出自 1734 年嘅英格蘭[1]。
個故仔大致如下：好耐好耐以前有對母子，個仔叫阿積，佢哋兩個好窮；有一日，阿積攞佢哋隻乳牛去賣，換取咗五粒荳返嚟；阿積阿媽好嬲，覺得啲荳完全冇價值，但點知到咗第二日，啲荳就發芽變咗樖高聳入雲嘅豌豆樹；阿積爬豌豆樹去到巨人嘅空中城堡，仲由巨人嗰度偷咗好多寶物返嚟；最後，兩仔乸變到好有錢，可以開開心心噉生活落去。
劇情大綱
[編輯]好耐好耐之前有一個寡母婆，佢帶住個仔，個仔叫阿積（Jack）。呢兩仔乸好窮。有一日，寡母婆發覺屋企好唔夠錢使，於是就決定要將佢哋隻乳牛（全屋唯一一件值少少錢嘅嘢）攞去賣咗佢。佢叫阿積攞隻乳牛去市集度賣，仲吩咐阿積要賣返個好價錢，噉佢哋今晚就可以食餐好嘅。阿積拖住隻乳牛去市集，喺市集遇到個怪男人。怪男人望住隻牛好似有興趣想買噉，阿積見到就問佢肯出幾多錢。怪男人講：
阿積肯成交，將隻牛賣畀怪男人，交易完就攞住怪男人畀佢嘅五粒「魔荳」返屋企[註 1]。阿積一返到屋企，佢阿媽就問佢賣牛賣成點，阿積如實噉將成件事話畀阿媽知，點知阿媽一聽完就扯嗮火，鬧阿積正一係傻仔，一氣之下搶咗啲荳同一嘢將啲荳掟出窗外面。如是者兩仔乸咩財物都冇嗮，嗰晚就空住個肚上床睏覺。
第二朝天光，阿積一起身望出窗外就嚇咗一跳－原來啲荳真係有神力，喺一夜之間發咗芽仲生咗樖好大好高嘅豌豆樹出嚟，樖豌豆樹一路向上生，生到伸咗入雲裏面。阿積沿住豌豆樹向上爬，一路爬到最頂，發現雲上面有座城堡。好奇嘅阿積靜靜雞祟入去城堡，喺城堡廚房搵到個女嘅巨人喺度煮飯。依個時候，阿積醒起自己尋日全日都冇食嘢今朝又冇早餐食，感到飢腸轆轆，於是佢就求個女巨人畀啲嘢佢食。女巨人同情阿積，就施捨咗啲麵包同牛奶畀佢充飢。
冇幾耐，女巨人嘅老公返到城堡。男巨人個樣生到兇神惡煞噉，阿積一見到佢就嚇到搵地方匿埋。點知個男巨人跟住就停低，噉講[3]：
- （粵文翻譯）
- 「Fee-fi-fo-fum [註 2][4]！我聞到有一陣英倫人血嘅味。
- 無論佢生勾勾定係死咗都好，我都要將佢啲骨頭磨碎嚟食！」
不過女巨人聽到就同佢老公講，話間屋除咗佢哋兩公婆之外咩人都冇。男巨人放棄想食人嘅意慾，就食佢老婆煮嘅飯餸然後返房。阿積一路等到天黑先至出返嚟，佢偷入男巨人間房，趁住男巨人睏著咗，偷走男巨人嗰個裝住好多金幣嘅銀包。然後佢攞住個銀包，沿住豌豆樹爬返落地面。阿積返到屋企就同阿媽分享金幣，後嚟兩仔乸仲好開心噉攞啲錢去食大餐。
過咗一排之後，阿積又爬豌豆樹偷入巨人城堡。佢又係問女巨人攞嘢食，又係食食吓男巨人就返到。阿積今次匿喺男巨人嘅床下底。男巨人想食人但又畀佢老婆勸阻，就死死哋氣返房，一返到房佢就攞咗隻雞乸出嚟，佢開口命令隻雞乸生蛋，隻雞乸竟然即刻生隻金蛋出嚟－匿埋喺床下面嘅阿積睇到嗮成件事。一等到男巨人睏著咗，阿積就偷偷哋帶走隻雞乸，攞住隻雞乸返屋企，令佢阿媽好開心。
又過咗一排之後，阿積再次爬豌豆樹偷入城堡，重複「問女巨人攞嘢食，男巨人返嚟想食人，女巨人叫停佢老公，男巨人返房」嘅過程。今次阿積發現男巨人擁有一座有魔法嘅豎琴，座琴啲弦冇人彈都識得自己郁，會演奏美妙嘅音樂。阿積又係等男巨人睏著就出返嚟，想偷座魔法豎琴，但點知阿積一攞起座豎琴，座琴就大嗌：
- 「救命呀主人！有人想偷我呀！」
男巨人扎醒咗。佢見到阿積攞住座豎琴就大發雷霆。阿積有咁快得咁快逃走，而且佢仲跑得好快，男巨人追唔到。阿積沿住豌豆樹爬返落地面，但佢一向上望就見到男巨人都想沿豌豆樹爬落嚟。於是阿積即刻衝入屋企攞佢把斧頭，佢揸實斧頭就郁手想劈斷豌豆樹。劈吓劈吓樖豌豆樹冧，跟住男巨人就由高空跌落地，跌死咗。
到咗最後，阿積同佢阿媽靠住由巨人度偷返嚟嘅財物變到好有錢。兩個人幸福快樂噉生活落去。
後世批評
[編輯]有唔少人都覺得《阿積與豌豆樹》個故仔其實係「教壞細路」：阿積身為主角但行為惡劣－佢受到女巨人嘅恩惠，但唔報恩不特止，仲偷走巨人嘅財物同埋殺死女巨人個老公。
有唔少後世嘅人都會對個故仔做啲修改，想主角阿積似返個好榜樣。個故仔因而出咗好多個版本。有啲版本會話巨人曾經殺咗好多地面嘅人，而且仲會搶走受害人啲財物，而阿積由巨人嗰度偷返嚟嘅財物，查實都係巨人打前由地面嘅人嗰度搶走嘅。亦都有啲版本會話，巨人係阿積嘅殺父仇人，所以佢嘅行為只係報復[5]。
文化影響
[編輯]《阿積與豌豆樹》依個故事舉世聞名，多次畀人改編做戲同其他媒體嘅作品，亦有好多作品有採用《阿積與豌豆樹》當中嘅某啲橋段。
例子可以睇吓 2011 年嘅電腦動畫片《無敵貓劍俠》或者 2014 年嘅奇幻片《魔法黑森林》呀噉。
睇埋
[編輯]註釋
[編輯]引咗
[編輯]- ↑ Tabart, The History of Jack and the Bean-Stalk. in 1807 introduces a new character, a fairy who explains the moral of the tale to Jack (Matthew Orville Grenby, "Tame fairies make good teachers: the popularity of early British fairy tales", The Lion and the Unicorn 30.1 (January 20201-24).
- ↑ Jack and the Beanstalk. American Literature，依篇文係英文版嘅《阿積與豌豆樹》。
- ↑ 原版英文："Fee-fi-fo-fum, I smell the blood of an Englishman. Be he alive, or be he dead, I'll grind his bones to make my bread!"
為咗令啲粵文句子全部都係 12 段音節咁長，依度將 to make my bread 譯做嚟食。 - ↑ "Fee Fi Fo Fum" — Meaning & Context. Linguaholic，依篇英文文章講到句嘢嘅幾個可能意思。
- ↑ Joe Nazzaro, "Back to the Beanstalk", Starlog Fantasy Worlds, February 2002, pp. 56-59.
拎
[編輯]
- Jack and the Beanstalk Fairy Tales and Bedtime Stories for Kids in English （英文），依段片用英文講《阿積與豌豆樹》。
- Jack and the Beanstalk. American Literature （英文），英文版嘅《阿積與豌豆樹》。