陶藝

出自維基百科,自由嘅百科全書
(由陶藝品跳轉過嚟)
跳去導覽 跳去搵嘢
一件陶藝品

陶藝粵拼tou4 ngai6英文ceramic art)係指用陶瓷藝術品嘅過程。

陶藝嘅製品可以分成兩大類:有實用價值(functional)嘅製品,例如碗碟、樽、盆等等,同冇實用價值(non-functional)嘅純裝飾品或者純藝術創作。整有實用價值嘅製品就算係小量製作,仍然都會好似工業設計咁,要顧及到例如易用性呢啲咁嘅問題。

工序概要[編輯]

睇埋:陶瓷

成形[編輯]

陶藝嘅成形主要用三種方法:拉坯(throwing)、倒模(slip-casting)同手捏[1](hand-building)。

拉坯係指用電動嘅拉坯機或者手動嘅製陶轉盤(wheel,行外人叫 potter's wheel),用手藝將泥坯拉成想整嘅樣,不過好明顯呢個方法淨係整到圓嘢(或者將圓嘢壓扁或者切割做得出嘅形狀)。注漿成形,即係倒模,係指用同少量化學添加劑溝出來嘅泥漿(slip),注入預先用石膏製成嘅模,用石膏嘅吸水特性,喺泥漿被個模吸咗幾秒水之後倒走多餘嘅泥漿,再等半乾之後小心攞件嘢出來。手捏就泛指其他嘅成形方法,例如雕刻、將泥壓扁再砌等等。

成咗形嘅半製成品首先要冚住佢慢慢風乾,到半乾(leather hard)先可以繼續下一個工序,用刀、剉等等工具修坯[2](trim)。修坯之後可以再做其他表面裝飾[1](surface treatment)例如雕字、雕圖案等等。

上釉[編輯]

上釉(glazing)唔係必要,但係多數會做,尤其係食具會用佢來做防水(「ling3」 嘅陶瓷就一定係上咗釉)。不過,喺西方嘅傳統,一般唔會即刻上釉,而係先經過一個叫素燒(bisquing)嘅低溫燒製工序,將件嘢定咗型先。呢個工序可以等件嘢易啲上釉,同埋如果上釉出咗錯可以用水洗走啲釉,等風乾之後再上過。

釉(glaze)係一種經過高溫之後會變成玻璃質嘅嘢,佢嘅作用除咗用來上色之外,亦都令到件嘢防水。釉喺未燒之前通常都唔會係最終嘅顏色,而係白白灰灰咁;燒製嘅過程令到釉發生化學反應,變成想要嘅顏色(包括透明)。

雖然釉係防水,但係唔係乜都防。所以,做食具通常會揀一啲冇有毒物質嘅釉(例如,鮮紅嘅釉好可能含鉛,幾十年前仲有用,但係而今已經唔應該用[3]:241);做雕塑品就冇呢種顧慮。

上釉並唔係一種 「想點就會點」 嘅工序,因為釉喺燒嘅過程會變成半流質,甚至(如果落得太多,啲材料唔啱份量等等)流質,所以通常唔可以完全控制燒成之後啲釉去咗邊。有啲人會利用釉嘅呢種特性做出隨機性嘅效果,但係如果要畫一啲精細嘅畫或者寫字,通常會用釉下彩(underglaze)或者某一啲可以用嘅顏料呢類唔會被個爐燒熔嘅嘢,然後再喺上面加一層透明釉。

上咗釉嘅半製成品首先要風乾,乾透(bone dry)先可以燒。

燒成[編輯]

燒(firing)係指用高溫嘅電爐(electric kiln)或者煤氣爐(gas kiln)等等,用熱力改變泥嘅物理結構,變成陶瓷質,呢種過程叫玻璃化(vitrification);不過燒陶瓷唔係要將啲泥完全玻璃化,反而過咗火就會令到件製成品出現瑕疵[4],甚至熔鬼咗。

用電爐嘅叫氧化燒(oxidation firing),用煤氣爐或者碳爐等等叫還原燒(reduction firing)。做陶藝嘅人一般通認為還原燒牽涉到唔同嘅化學反應,所以燒出唔同嘅效果,但係有人指出還原燒其實唔係化學所講嘅還原。[5]

放入爐度燒嘅作品一定要乾透,唔係啲水喺燒嘅過程會變水蒸氣,但係被泥包住冇路走,就爆,唔單止嗰件嘢會冇咗,連隔籬嗰啲都會冇埋。

工業應用[編輯]

工藝嘅陶瓷可以半自動化,例如拉坯可以整一架機來拉。工業應用嘅工序好多時同工藝製作都有唔同,例如風乾方法同燒製嘅先後次序等等。呢種工業產品除咗可以整碗碟等等嘅一般器皿之外,其他例如洗手盆、廁盆等等都係工業生產。

睇埋[編輯]

參考[編輯]

  1. 1.0 1.1 陶藝手捏工作坊 – 形態及表面裝飾處理. 香港藝術學院. 喺2022年9月15號搵到.
  2. . 香港藝術學院. 喺2022年9月15號搵到.
  3. Rossol, Monona (2001). The Artist’s Complete Health and Safety Guide (第3版). New York: Allworth Press. ISBN 978-1-58115-204-3.
  4. Finkelnburg, Dave (2016). "Vitrification". Ceramic Arts Network. American Ceramic Society. 喺2022年9月15號搵到.
  5. Coppage, Ryan (2022-02-28). "Demystifying the Reduction Firing Process: Defining Reduction Firing to Help Improve Firing Outcomes". Ceramic Arts Network. American Ceramic Society. 喺2022年9月15號搵到.