香港公共圖書館落架圖書爭議
香港公共圖書館落架圖書爭議，係指2023年開始一啲唔同於政府官方觀點嘅圖書等內容喺香港公共圖書館書架上面消失（「落架」，或者「下架」）。初初，圖書館只係引用未經諮詢或香港人同意以強行落實嘅《港版國安法》，將一啲政治相關書籍同內容拎走，喺書館睇唔到、借唔到，電腦目錄上查唔到。但去到2023年5月，具有泛民主派背景嘅人佢哋所寫嘅書籍，唔理係咪同政治有冇關連（譬如純粹只係講粵語文化嘅書），都因為作者身份問題而被「落架」。受害嘅作者包括有吳靄儀丶鄺俊宇丶司徒華丶馬嶽丶區家麟等。有部分媒體形容，今次事件係文革嘅開端[1]。唔少人都批評政府嘅做法。
各方回應
[編輯]- 2023年3月，康文署署長劉明光曾經回應聲稱移除嘅書籍明顯違反《港版國安法》[2]。
- 2023年5月，香港中文大學政治與行政學系副教授周保松喺 Facebook 發文，引用香港公共圖書館嘅網頁上《聯合國教科文組織公共圖書館宣言》之中所載嘅信念，「藏書與服務均不應受任何形式的思想、政治或宗教審查，也不應受商業的壓力」1，批評香港公共圖書館嘅康文署同埋相關主事者，一手摧毀香港公共圖書館辛苦建立嘅數十年基業[1]。
- 2023年5月15號，前人大政協劉夢熊話，而家特區政府為左配中共「全面管治香港」嘅政策，做咩事都會「左三分」，形容會令秦始皇年代焚書坑儒事件喺香港重演，亦令台灣人更唔信中共口講嘅「一國兩制」；行會成員湯家驊亦要求康文署解釋圖書館對書籍落架係用咩準則[3]。
- 2023年5月16號，新思維嘅立法會議員狄志遠亦發火，話政府高層前後唔同嘅回應，畀人覺得對呢單嘢嘅處理好亂，同埋完全一啲準則都無，唔明白點解有啲書會唔啱喺公共圖書館上架，但就畀佢喺私人市場賣通街？佢亦話呢單嘢係針對作者做政治審查，鬧政府搞分化[4]。
- 2023年5月16號，行政長官李家超回應記者問有關措施會唔會減低香港接受資訊嘅自由，話落架嘅書籍仍可以喺私人書店搵到，但唔適合出現喺公共圖書館[5]
註
[編輯]- 註 1: 《聯合國教科文組織公共圖書館宣言》原文係「Collections and services should not be subject to any form of ideological, political or religious censorship, nor commercial pressures.」[6]，意譯係藏書同服務都唔應該受到嘅思想意念、政見或宗教嘅審查，包括商業壓力。
參考
[編輯]- ↑ 1.0 1.1 〈香港文革開端？香港圖書館下架政治題材書籍〉。www.ntdtv.com (繁體中文)。2023-05-16。喺2023-05-16搵到。
- ↑ 〈康文署完成處理公共圖書館明顯違反國安法書籍〉。Yahoo News (中文)。喺2023-05-16搵到。
- ↑ 〈【禁書時代】港圖書館繼刪敏感書 評論：焚書坑儒製造恐懼〉。rfa (中文)。喺2023-05-15搵到。
- ↑ 〈圖書下架｜狄志遠斥：毫無準則、針對作者政治審查〉。《香港01》 (中文)。喺2023-05-16搵到。
- ↑ 〈稱圖書館落架書籍價值觀不符公共利益 李家超：市民仍可私人書店購買〉。am730。2023-05-16。
- ↑ "UNESCO Public Library Manifesto 1994 November 1994". unesdoc.unesco.org. 喺2023-05-17搵到.