香港歸英運動
香港歸英運動（英文：Hong Kong-UK Reunification Campaign），簡稱歸英，係主張香港脫離中華人民共和國並再次成為英國海外領土嘅一個政治運動。主張歸英嘅支持者認為: 中國大陸近年屢次干預香港嘅內政，應該被視為中方違反咗《中英聯合聲明》。呢個情況下，英方有權宣布呢份條約已經失效並廢除佢[1]，令香港回復主權移交前嘅狀態。支持者亦都認為，倘若香港特區政府冇能力唔受中方影響下管治香港，而中國政府又明知故犯咁違反《中英聯合聲明》並直接管治香港，香港喺憲法上嘅地位應該回復到1997年7月1日前，既係英國政府因為中方違反咗呢條國際協議而恢復對香港嘅主權。
歸英論支持者認為香港可參考直布羅陀、福克蘭群島、百慕達等地方，成為有民選政府同議會，一片擁有真正自治權嘅英國海外領土。該理論支持者認為，喺民主英國嘅主權下，香港先會有機會實施真正嘅自治，並提供一個安穩嘅空間俾香港人思考香港嘅政治未來，例如可以獨立成為英聯邦王國等嘅選擇[1]。
背景
[編輯]英國一貫嘅政策係協助前殖民地成為主權獨立嘅國家。但係由於大英帝國向大清分3段時間同條約攞到香港（南京、北京、界址專條），情況相對複雜，獨立呢種情況喺香港並唔適用。英國理解中國對香港主權歸屬嘅立場，自1972年11月2日聯合國大會批准《關於准許殖民地國家及民族獨立宣言》入面嘅地方名單剔除「香港」之後，英國從冇向聯合國秘書長要求將「香港」重新列入呢份名單。英方清楚知道中方非常反對香港獨立，因此英國政府實際上冇辦法安排香港獨立。香港92%嘅土地（即係新界）經《展拓香港界址專條》租借而來，1997年期滿，之後英國將會喪失呢92% 嘅土地嘅一切權利[2]。無論獨唔獨立，香港並冇辦法單憑呢 8% 剩返嘅土地（即係香港島及九龍半島）而運作，英國所以必須同中國商討香港前途問題[3]。
網上研究
[編輯]2013年，《南華早報》喺網上進行民意研究，問題係「如果有可能，香港人會唔會願意投票支持回歸成為英國海外屬土？」，表示支持嘅佔93%，唔認同歸英嘅佔7%[4]。
有關行動
[編輯]2014年3月20號，前香港總督彭定康來香港出席牛津大學與香港海事博物館合辦嘅活動時，有部分人士手持英治香港旗，並高唱英國國歌《天佑女王》，提出“香港回歸英國”嘅請求。彭定康同相關关人士握手，喺離開嘅時候冇直接回應，只係表示“尊重香港嘅意見多元化”[5][6]。
2016年6月19號同7月1號，「香港歸英運動」成員到英國駐香港總領事館外面請願，要求英國宣佈《中英聯合聲明》無效，將香港回歸英國[7]。
2016年7月，「香港歸英運動召集人」賴綺雯以保守黨名義報名參加立法會港島區選舉，表明會爭取香港「歸英」。但最後被選舉主任取消參加立法會參選資格。其後，賴綺雯去信英國駐港澳總領事同埋英國外交部部長，希望英國政府考慮宣告《中英聯合聲明》失效，讓香港重新加入英國[8]。
相關書籍
[編輯]- 《論歸英——回到英治香港》[9]
- 《香港歸英論》
主要組織或人物
[編輯]參見
[編輯]參考文獻
[編輯]- ↑ 1.0 1.1 〈親英團體請願促回歸英國〉。東方日報。原著喺2018-09-25歸檔。喺2015-07-23搵到。
- ↑ "Prime Minister's Visit to Peking" (PDF). 1982-09-24. 原先內容歸檔 (PDF)喺2018-09-28. 喺2017-06-21搵到.
- ↑ "Most Confidential Record" (PDF). 1983-03-10. 原先內容歸檔 (PDF)喺2018-09-28. 喺2017-06-21搵到.
- ↑ 〈願香港回歸英国？〉。蘋果日報。原先內容歸檔喺2015-07-23。喺2015-07-23搵到。
- ↑ 〈末代港督访港 港独集体高潮〉。澳亚卫视。原先內容歸檔喺2015-07-22。喺2015-07-22搵到。
- ↑ 〈彭定康撐新聞自由 學術自主 | 蘋果日報 | 要聞港聞 | 20140321〉。蘋果日報。原先內容歸檔喺2016-07-18。喺2015-07-22搵到。
- ↑ 〈書店風波中方違聯合聲明 8人請願冀港歸英〉。2016-06-19。原先內容歸檔喺2017-01-11。喺2017-10-02搵到。
- ↑ 〈【彭定康演講】「香港歸英運動」賴綺雯 場內舉英國旗雨傘〉。立場新聞。2016-11-26。原先內容歸檔喺2020-08-08。喺2017-10-02搵到。
- ↑ 凱莉塔圖; 無言; 毛來由; 紫維、寗思。《論歸英——回到英治香港》。ISBN 9789881250391。原著喺2017-04-14歸檔。喺2017-03-25搵到。