Portal:香港鐵路運輸/精選文/9

中環站荃灣綫月台

中環站（粵拼：zung1 waan4 zaam6；英文：Central Station）響香港中環遮打道、畢打街同埋德輔道中一帶，係港鐵站之一，車站有4個月台。

呢個站係荃灣綫香港島嘅總站同港島綫中途站，響環球大廈、干諾道中同交易廣場地底以行人通道同東涌綫同機場快綫嘅香港站相連。呢個站採用磚紅色為主要顏色，而荃灣綫月台就用深咖啡色作為主要顏色。

中環站有5層，地面係車站出口，車站大堂同商店主要響中環站嘅L1、L2層。L2同L4層分別係港島綫3號月台（往柴灣）同4號月台（往堅尼地城），而L3層就係荃灣綫嘅1號同2號月台（往荃灣）。

另外，響L1層嘅遮打道大堂同車站出口之間重有一層閣樓，用嚟通去車站出口，地鐵公司響車站嗰層開放咗「藝術管道」，為藝術家提供一個展覽場地。而響L2層嘅畢打街大堂設有行人隧道連接香港站東涌綫大堂。