Portal:香港鐵路運輸/精選文/16

鰂魚涌站3號月台

鰂魚涌站（粵拼：zak1 jyu4 cung1 zaam6；英文：Quarry Bay Station）係港鐵港島綫同將軍澳綫嘅轉車站，喺香港島東區鰂魚涌同寶馬山之間嘅地底。本站設有四個月台，並以兩個島式月台排列，所有月台都裝咗月台幕門。本站係最接近東區海底隧道嘅鐵路車站，亦曾經係全港鐵系統中最深嘅車站（深42米）。

鰂魚涌站地面有2個唔相連嘅車站大堂，分別位於英皇道近太古坊地底嘅英皇道大堂以及位於模範邨旁嘅模範里大堂。鰂魚涌站啟用嗰時，淨係得一個英皇道大堂畀乘客出入車站，但因應東區海底隧道嘅鐵路延綫興建，鰂魚涌站擴建嗰時另外喺模範里一帶起咗另一個售票大堂畀乘客往返模範邨一帶。模範里大堂喺欣澳站未啟用前，曾經係全香港最細嘅地鐵車站售票大堂。

鰂魚涌站下層嘅3號及4號月台以西原本有一段掉頭隧道畀觀塘綫列車用，觀塘綫列車喺本站3號月台（現時嘅4號月台）落客後，就會駛入條隧道，掉頭入4號月台（現時嘅3號月台）上客。但當「紓緩鰂魚涌轉車站擠塞工程」完工後，觀塘綫喺2001年9月27號起改以北角站為總站，掉頭隧道喺同年11月封閉。

鰂魚涌站嘅車站出口設計同上環站設計一樣，由兩個獨立大堂組成，兩者冇通道連接。