Wikipedia:是日正文/2006年7月

出自維基百科,自由嘅百科全書
Jump to navigation Jump to search

粵語,即係廣東話或者白話,係屬於漢藏語系漢語語族聲調語言。喺中國南方嘅廣東中西部、廣西中南部同埋香港澳門同埋東南亞嘅部分國家或者地區,同埋海外華人社區都有好多人講廣東話。中國古代叫南方做「越」或「粵」,所以呢種語言就叫做粵語喇。由於喺語言學分類,中國學者同埋西方學者有唔同意見,所以粵語係方言定係獨立嘅語言,尚有爭議。依家全球大約有6.6千萬~1.2億人講粵語。雖然使用嘅人口少過官話漢語,但係粵語嘅使用地區非常之廣泛。唔單止喺海外華人社區裏面廣泛應用,而且支持住以香港文化同埋南粵文化為中心嘅粵語文化,令到粵語具有好強嘅影響力,可以講係目前世界上有較強生命力嘅語言之一。廣州話口音係粵語嘅公認標準口音。但係隨住近年來大量外來人口嘅湧入,廣東境內一些原粵語城市甚至出現外來人口多過本地人口嘅現象,漢語普通話使用人群當然就大增,加上近年嚟香港粵語流行曲、電視電影對中國大陸粵語使用人群嘅強勢影響,粵語文化嘅中心城市事實上已經由廣州遷移到嚟香港。香港粵語同廣州話,有一定程度嘅差異,有時可以由整體口音上區別;但喺個別字詞上,就好難分到。

之前嘅正文:香港