牡丹江
想搵第二個意思嘅話，請睇牡丹江 (搞清楚)。| 牡丹江 | |
| 河 | |
| 國 |  中國
|
|---|---|
| 省/州/邦 | 吉林省、黑龍江省 |
| 延邊州、牡丹江市、哈爾濱市 | |
| 屬於 | 松花江 |
| 支流 | |
| - 左邊支流 | 黃泥河、大石河、干巴河、珠爾多河、都陵河、塔拉河、海浪河、北安河 |
| - 右面支流 | 沙河、官地河、東村河、鐵嶺河 |
| 城市 | 敦化、寧安、牡丹江 |
| 源頭 | 牡丹嶺北麓 |
| - 位置 | 中國吉林延邊敦化 |
| - 座標 | 43°1′30.1″N 127°55′20.5″E / 43.025028°N 127.922361°E |
| 河口 | 松花江 |
| - 位置 | 中國黑龍江哈爾濱依蘭 |
| - 座標 | 46°19′24.4″N 129°32′27″E / 46.323444°N 129.54083°E |
| 長度 | 725千米（450哩，1,450里） |
| 流域面積 | 38,909 km²（15,023 mi²） |
| 流量 | |
| - 平均流量 | 181 m³/s（6,392 ft³/s） |
 牡丹江幹流（深色綫）
| |
| 支流、河口、河源、湖泊等地理信息可查[1]。 | |
牡丹江（粵拼：maau5 daan1 gong1；滿文：ᠮᡠᡩᠠᠨ
ᡠᠯᠠ，穆麟德：Mudan ula，義「彎曲嘅江」[2]；普通話拼音：Mǔdān Jiāng），係位於亞歐大陸中國東北地區嘅河，係松花江第二大支流[3]，以及係中游最大嘅支流，屬黑龍江水系。牡丹江全長725公里，流域面積3.89萬平方公里[4]，流過中國兩個省：吉林、黑龍江。佢發源自吉林敦化嘅牡丹嶺北麓[5]，之後一路向北流，流過黑龍江牡丹江市，最後喺哈爾濱嘅依蘭縣城附近滙入松花江。
牡丹江幹流好長，喺當中形成三個湖，兩個喺上游，一個喺下游。上游幹流喺張廣才嶺、老爺嶺嘅山區，河谷窄，流過敦化市區之後、喺沙河滙入之前，有西崴子水庫；喺寧安南部（屬黑龍江省牡丹江市）更有出名嘅鏡泊湖，鏡泊湖係以前火山噴發，啲岩漿塞住河道形成嘅，係中國最大、世界第二大嘅堰塞湖[6]，鏡泊湖南北長45公里，東西最闊6公里，岸綫曲折，號稱「百里長湖」[7]。
過咗鏡泊湖嘅吊水樓瀑布後就係中游，河谷闊啲，有串珠狀嘅河谷盆地分佈，流過寧安、牡丹江市區後，到樺林；過咗樺林就係下游，下游河谷又窄返，形成蓮花湖；等過咗依蘭嘅長江屯後，先入到平原[3][1]。因爲流域多山，牡丹江係發展水電嘅重點地區，同時因爲氣候濕潤，流域內有豐富嘅森林資源[3]。
水資源方面，佢支流好多，有唔少水庫，其中都陵河起咗個工商行水庫，塔拉河口有大山水庫，除咗呢兩條大支流，重有呢啲水庫湖泊同佢幹流有關：新房子水庫、西河水庫、江南水庫、東靠山泡、連水泡、北安水庫[1]。
航運方面，牡丹江中下游行得大船，其中牡丹江市係內河港，係松花江流域三大河港之一[8]。透過滙流嘅松花江，啲船可以通去黑龍江呢條國際江河，出到俄羅斯，抵達伯力，最終出到鄂荷次克海。雖然地處高寒地區，冰封期比較長，但條江封凍時會有冰上運輸[8]。
名
[編輯]牡丹江個名唔係漢文名，而係官話音譯嘅滿文，意思係「彎曲嘅江河」。又可能因爲佢發源自牡丹嶺，所以噉叫。滿文嘅Mudan ula（官話音譯：穆丹烏拉，普通話拼音：Mùdān wūlā）原本專指上游河段，嗰段河好彎曲，所以滿洲人話佢「彎」（mudan），清末時推及成條江，兼且換字寫成「牡丹江」，漢化到睇唔出滿文痕跡[5]。同樣源出滿文嘅又有穆丹江（muk6 daan1 gong1）[9]。根據漢化名「牡丹江」又有別名牧丹江（muk6 daan1 gong1）[註 1]。
而喺之前，牡丹江有多個名。《新唐書》稱呼做忽汗河（fat1 hon6 ho4）[註 2][註 3]，《金史》稱做活羅海川（wut6 lo4 hoi2 cyun1），「活羅海」又轉音成鶻里改（鶻讀核，wat6 lei5 goi2），又據當時語音寫成同音嘅「胡里改」；《元史》繼承《金史》稱呼胡里改江（wu4 lei5 goi2 gong1），又寫忽呂古江（fat1 leoi5 gu2 gong1）；明代《遼東志》寫成忽兒海河（fat1 ji4 hoi2 ho4），同樣明代朝鮮嘅《龍飛禦天歌》寫做火兒阿河（fo2 ji4 aa3 ho4）[註 4]。
清代時，以鏡泊湖爲界，以上（上游）稱爲勒富善河（lak6 fu3 sin6 ho4；滿文：ᠯᡝᡶᡠ
ᡧᠠᠨ
ᠪᡳᡵᠠ，穆麟德：lefu šan bira，義「狗舌草河」[2]；普通話拼音：Lèfùshàn Hé）[註 5]；鏡泊湖以下（中下游）稱爲瑚爾哈河（wu4 ji5 haa1 ho4；普通話拼音：Húrhā Hé；滿文：ᡥᡡᡵᡥᠠ
ᠪᡳᡵᠠ，穆麟德：hūrha bira）[註 6]。瑚爾哈河又變音成庫爾瀚江（fu3 ji5 hon6 gong1；普通話拼音：Kùrhàn Jiāng）[註 7]，因爲佢流過寧古塔城，所以又叫寧古塔河（ning4 gu2 taap3 ho4）。
有攷據認爲，金元明三代河名，同清代中下游河名係一脈相承嘅，而唐代嘅「忽汗」同清代嘅「庫爾瀚」係呢個一脈相承嘅河名嘅轉化，對應嘅滿文書面係ᡥᡡᡵᡥᠠᠨ（穆麟德：Hūrhan），意思係「大圍網」[2]，噉係因爲滿洲民族長期係漁獵維生，於是地名就表現出來[5]。
神話
[編輯]喺滿洲民間有個噉嘅神話傳說：滿洲人嘅祖先靺鞨人請天神降伏咗惡魔，將佢壓喺馬紀嶺度，於是啲人有安樂日子過。不過惡魔嘅徒弟忽爾汗唔忿，要幫師傅報仇，佢喺長白山游離浪蕩，見人就食，當佢遊蕩到北坡時，見到條大江，佢諗起啲人住喺條江下游，於是變成一樖大槐樹，控制住河源，於是條江乾咗，啲人冇水就生存唔到。忽爾汗話畀啲人聽，想要水就要每個月貢對童男童女畀佢食，啲人只能照做[9]。
之後有個叫穆丹嘅後生仔唔想族人受噉嘅殘害，搵祭司諗計，祭司指佢去搵天神，穆丹搵着天神，天神見佢誠心降魔，就畀把神斧佢，話可以劈山山開、斬樹樹冧，斬邪魔化身嘅嗰樖樹九九八十一下，邪魔就會消散，不過每斬九下，邪魔就會降災一次，等佢贏咗，江河有返，但個人就會永遠變成嚿石[9]。
啲族人爲佢踐行，之後穆丹行咗好耐搵到呢樖大槐樹，呢樖樹有十個𡃁仔圍埋咁粗、七七四十九丈高，樹頂有黑雲罩住。佢斬第一下，把神斧就震到膊頭痹，樹身先得個印。佢一口氣斬咗九下，樹身噴出血水，霎時間天昏地暗、飛砂走石，㧺到佢痛；斬到第二劫時，樖樹發出怪聲，四週圍變凍，穆丹畀雪珠㧺；第三劫時，佢見到自己死咗嘅老豆，老豆嗌佢咪斬樹，樖樹會幫佢得道成仙，穆丹話佢唔想成仙而想爲民除害；第四劫時佢已經好攰，個天反而雲開日朗，出現個靚女來勾引佢，不過穆丹冇受誘惑；第五劫時，樹身飛出四十九條蛇去咬佢，佢繼續斬樹；第六劫時佢攰到冧低，瞓咗唔知幾耐，當佢醒咗想繼續斬樹發覺冇咗力，佢見到有條靑蛇舐咗樖草，每舐一下條蛇就會變長一闋。穆丹知道嗰樖係仙草，於是都跟住舐，立即有返力[9]。
斬到第72下時，樖樹裂開，忽爾汗跳出來，帶埋四個徒弟圍攻佢，喺忽爾汗拈住穆丹條頸時，把神斧飛出去，自己斬咗樖樹三下，穆丹見到乘機抄返斧頭又斬多六下，斬夠81下，忽爾汗倒地不起，樖樹亦都消失，而啲泉水重新湧出，恢復咗江水，但穆丹佢喐唔到，最後變成巨石，後來啲人話牡丹嶺嘅牡丹峰就係嗰嚿大石，啲人紀念佢，條江起名做穆丹江，後來個名轉化成牡丹江[9]。
註
[編輯]- ↑ 牡丹江嘅上游河段位於朝鮮族地區，漢字名「牡丹江」拼成諺文，照常音讀拼做모단강（文觀部式轉寫：Modan gang），但「牡丹」呢個詞喺朝鮮文有流音化讀法，所以又拼모란강（轉寫：Moran gang）。喺中文、韓文，「牡丹」又叫「牧丹」，因此又有諺文寫목단강（轉寫：Mokdan gang）。
- ↑ 重有種稱呼做「忽汗海」，一般認爲係指鏡泊湖，但有觀點認爲，「海」係「河」古音嘅轉音，所以呢個名亦可能係指牡丹江[5]。
- ↑ 喺隋唐漢音，「忽」字呼骨切，曉母沒韻入聲；「汗」字有三切：胡安切、古寒切、候旰切，呢度用匣母翰韻去聲嘅讀法。「忽汗」呢個詞，王力擬音[huət ɣɑn]，高本漢、董同龢、周法高都擬音爲[xuət ɣɑn]，李方桂擬音[xuət ɣân][10]。
- ↑ 根據資料推測嘅滿洲音，「忽汗」係[xuχɑn]，「活羅海」係[xuluχɑi]或者[xuluχɛ]，「鶻里改」、「胡里改」係[xuliqai]；「忽呂古」係[xulyku]；「忽兒海」係[xurχɑi]，「火兒阿」係[xurɴɑ][5]。
- ↑ 「勒富善河」係《欽定盛京通志》寫法。《盛京、吉林、黑龍江等處標記戰績輿圖》轉音寫成埒富陳河（埒讀劣，lyut6 fu3 can4 ho4；普通話拼音：Lièfùchén Hé），其中「陳」音係滿文口頭音，由[ʂɑn]變音成[t͡ʂʰən][5]。
- ↑ 呢個名有大量寫法。「瑚爾哈」係《欽定盛京通志》寫法，對應嘅滿文口音係[χʊrχɑ]；《吉林通志》寫成胡爾哈河，《吉林外紀》寫做湖爾哈河，同「瑚爾哈河」同音，《吉林外紀》又寫呼兒哈河（fu1 ji4 haa1 ho4，官話拼音：Hūrhā Hé）；《盛京、吉林、黑龍江等處標記戰績輿圖》寫成呼爾哈河（fu1 ji5 haa1 ho4），官話同「呼兒哈河」同音；《柳邊紀略》寫做虎兒哈河（fu2 ji4 haa1 ho4）、虎爾哈河（fu2 ji5 haa1 ho4），對應官話拼音都係Hǔrhā Hé[5]。
- ↑ 「庫爾瀚江」係《黑龍江述略》記載，呢個音喺《龍沙紀略》轉音成呼拉哈河（fu1 laai1 haa1 ho4；普通話拼音：Hūlāhā Hé），《吉林外紀》省音成呼蘭河（fu1 laan4 ho4；普通話拼音：Hūlán Hé）[5]。
攷
[編輯]- ↑ 1.0 1.1 1.2 〈天地圖〉。原著喺2016年3月4號歸檔。喺2015年11月2號搵到。
- ↑ 2.0 2.1 2.2 編：栗林 均、呼日勒巴特爾。《『御製満珠蒙古漢字三合切音清文鑑』満州語配列対照語彙》 (PDF)。《《東北アジア研究センター叢書 第30号》》 (日文)。東北大學東北亞研究中心。
{{cite book}}: CS1 maint: url-status (link) - ↑ 3.0 3.1 3.2 〈細數我們龍江那些饒有名氣的大江大河〉。新浪黑龍江。2013年4月22號。原著喺2016年3月5號歸檔。喺2015年11月3號搵到。
- ↑ 《中國河湖大典》編纂委員會 (2014年)。《《中國河湖大典：黑龍江、遼河卷》》。北京：中國水利水電出版社。頁 176。ISBN 978-7-5170-1950-3。
- ↑ 5.0 5.1 5.2 5.3 5.4 5.5 5.6 5.7 王岸英 (2008年)。〈牡丹江流域滿語地名之翻譯考證〉 (PDF)。《民族翻譯》。68 (1)。原著 (PDF)喺2016年3月5號歸檔。喺2015年11月2號搵到。
- ↑ 〈Lake in China—Jingpo Lake 中國的湖—鏡泊湖〉。滬江漢語。2013年4月18號。喺2015年11月3號搵到。
- ↑ 〈鏡泊湖簡介〉。鏡泊湖管委會。原著喺2016年7月6號歸檔。喺2015年11月23號搵到。
- ↑ 8.0 8.1 〈我國主要内河航運幹綫佈局及其主要河港〉。《程璐（主編）《中國經濟地理》》。原著喺2016年3月4號歸檔。喺2015年11月17號搵到。
- ↑ 9.0 9.1 9.2 9.3 9.4 陳慶浩·王秋桂（主編） (1989年)。〈牡丹江的傳說〉. 《中國民間故事全集 - 遼寧民間故事集（二）》。遠流出版。頁 114頁~117頁。ISBN 9573200694。
- ↑ 〈漢字古今音資料庫〉。臺灣大學中國文學系、中央研究院資訊科學研究所。原著喺2015年10月22號歸檔。喺2015年11月3號搵到。