資產

資產（粵拼：zi1 caan2；英文：asset）係經濟學入面一間企業嘅經濟資源，提供正面嘅經濟價值，可以用資產負債表去紀錄。

資產可以分做兩大類：有形資產（睇得到嘅）同無形資產（睇唔到嘅），亦可分為流動資產（預計持有少過一年）同非流動資產（會持有多於一年）。

資產泡沫

内文：資產泡沫

資產泡沫係種經濟現象，指一件資產嘅價持續膨脹，搞到個價脫離咗實際價值：是但搵件市場上嘅資產，件嘢都會有個價－指啲人用幾多錢買賣件嘢；同時件嘢又會有個實際價值－反映件嘢實際上有幾能夠提高個經濟體嘅生產能力；人有陣時會以高過件物品嘅實際價值嘅價嚟買賣件嘢－形成泡沫，造成經濟繁榮嘅假象；而件物品個價一升到咁上下，啲人就會發覺件嘢根本唔值咁多錢，於是個價就會喺短時間內勁跌－個泡爆。

經濟泡沫呢家嘢喺歷史上一路都有發生。好似係澳洲鎳泡沫噉：單嘢發生喺 1960 年代嘅澳洲；當時澳洲因為越戰等嘅原因而搞到鎳nip1呢種金屬出現短缺，於是鎳嘅價就自然開始升；打後因為投資者响度炒鎳金屬等嘅原因，個價愈升愈勁，喺 1969 年上半橛升到去成每噸 7,000 英鎊嘅價咁高，一般投資者買唔起；但到咗同年下半橛，啲人發覺鎳根本唔值咁多錢，於是鎳金屬嘅價就喺幾個月內跌咗超過 50% 咁多。

睇埋

• 投資
• 市場流通度，資產可以有嘅一種特性。