長洲 (香港)
長洲（英文：Cheung Chau）係香港嘅一個島，因為個樣似啞鈴又曾經被稱為啞鈴島（英文：Dumbbell Island），響大嶼山東南便，北望喜靈洲，西南便有石鼓洲，離香港島西南大約10公里。長洲行政上被劃入香港十八區入便嘅離島區，島上人口大約3萬，係離島區入便人煙最稠密嘅島。長洲對內雖然冇陸上公共交通，但基本發展都算完善，除咗有消防局、警署同醫院之外，島上亦有學校、公共屋邨同綜合大樓等基建。
長洲係香港著名嘅旅遊景點之一，島上有唔少觀光名勝，例如有張保仔洞、北帝廟同埋長洲石刻等等，而渡輪碼頭沿岸一帶有好多海鮮食肆。另外，長洲每年都會舉辦盛大嘅太平清醮，呢個活動係長洲最大型嘅傳統節目，每次都吸引大批人士慕名參觀。住宿方面，島上亦有唔少青年旅舍同渡假屋（好似東堤小築），近年亦都有開辦歐美式渡假旅館。
地理
[編輯]長洲響大嶼山同埋南丫島之間，面積大約2.46平方公里，距離香港島大約10公里[1]。長洲東面有西博寮海峽同南丫島相隔開，而西面同北面亦隔住北長洲海峽（Adamasta Channel），同大嶼山同埋喜靈洲相對望[1]。長洲以南係南中國海，再遠啲係擔桿群島。
響地理學上，長洲原本係兩個小島，但係受到島嘅形狀同季候風嘅影響，海浪將海沙帶到兩個島之間，形成沙咀。經過千萬年來日積月累嘅沉積，兩條沙咀不斷延長，最後連接起來，形成連島沙洲。因為咁，而家長洲南、北嘅形狀闊而大，但中部就窄而長，形狀呈啞鈴狀，所以長洲又叫做啞鈴島[2]。
長洲南、北本來係小島，因此地質由花崗岩構成；至於中部由海洋沉積物組成，屬於地表沉積物[3]；因為咁樣，加上受鄉村條例所監管，所以長洲大部分建築物得3層高。長洲南、北部係山丘，中部係平地，北部山丘高啲，最高點有95米高[1]。
西灣長年風平浪靜，因為咁成為咗天然嘅避風塘，而長洲碼頭亦設喺西灣。至於東灣就長年因海浪帶來沉積物，而形成著名嘅東灣泳灘。除咗東灣泳灘之外，長洲其他主要嘅沙灘就坐落喺西灣、觀音灣、大鬼灣同埋東灣仔等地，但呢啲沙灘較細小、沙質較遜、位置都比東灣偏僻。響長洲西南嘅鯆魚灣同埋白鰽灣，重有南部同東南部一帶，由於海浪大啲，亦以滿佈奇石聞名。較出名嘅奇石有五行石、龍王石、鰻魚石、坦克石、花瓶石同人頭石等等，所以當地又叫長洲趣石林[1]。
自然生態方面，長洲南、北部有樹林，喺嗰度可以見到黃室弄蝶同埋角翅弄蝶等等[4]。此外，喺長洲重可以見到香港市花洋紫荊。喺長洲關公忠義亭附近，種滿十幾棵櫻花樹，係全港最具規模嘅櫻花群。呢啲櫻花樹屬山櫻，最初喺1975年從台灣引入35棵，但由於土壤唔得，現時剩低冇幾多[5][6]。
-
-
長洲西南部嘅鯆魚灣 -
長洲全景
人口
[編輯]香港開埠初期，長洲約有600幾戶[1]，到長洲在1898年租借英國，陸上居住人口大約3,000人，而艇戶人口都有近5,000人[1]。；至1930年代，人口復仍然在7,000人左右。在日本佔領香港前，曾一度有大量難民湧入長洲，令人口突破10,000[1]。長洲人口雖然在日治時期有所回落，但香港重光以後，難民再度湧入，令人口再一次超過10,000人[1]。長洲響第二次世界大戰後人口不斷上升，到1990年代時達至高峰的40,000人[1]，之後人口回流，在2000年代回落到大約30,000人[1]。根據政府響2006年進行嘅《中期人口普查》，長洲陸上人口則為24,312人，是離島區人口最稠密嘅一個島[7]。
截至2006年，長洲華人約佔總人口嘅95.58%，其他亞洲人士同外籍人士佔總人口嘅唔夠5%[8]。響華人人口當中，居民主要講廣東話，並來自本地（舊稱寶安縣）、東莞、四邑同惠陽同潮州四大地區。除此之外，另有來自各地定居的艇戶同商旅。而當地則有一黃姓大族，響長洲有唔少土地[1]。
傳統節慶
[編輯]除咗香港嘅公眾假期以外，長洲保留咗唔少傳統節日。要注意嘅係，長洲嘅天后誕訂喺農曆三月十八，比其他地方嘅三月廿三早五日。長洲嘅傳統節慶包括[9]：
| 日期 | 節日 |
|---|---|
| 農曆正月初一 | 農曆新年 |
| 農曆正月十五 | 元宵節 |
| 農曆三月初三 | 北帝誕 |
| 農曆三月十八 | 天后誕 |
| 農曆四月初八 | 太平清醮 |
| 農曆五月初五 | 端午節 |
| 農曆六月廿四 | 關帝誕 |
| 農曆八月十五 | 中秋節 |
交通
[編輯]
長洲除咗畀安老院用嘅迷你巴士之外，冇陸上公共交通服務，而對外交通就靠嗮渡輪，渡輪碼頭響西灣。
注
[編輯]- ↑ 1.00 1.01 1.02 1.03 1.04 1.05 1.06 1.07 1.08 1.09 1.10 陳永鏗、黎民鏗著，《離島探勝遊》（香港：萬里機構‧萬里書店），2004年7月。
- ↑ 〈香港漫步遊 互聯網檔案館嘅歸檔，歸檔日期2008年9月21號，.〉，《香港旅遊發展局》，2008年2月5號睇。
- ↑ 《香港地質圖》（香港：地政署測量部），組別AR/3/G，1979年。
- ↑ 長洲 綠洲，oasistrek.com遠足行山資訊
- ↑ 〈長洲賞櫻唔使去日本 $23搞掂〉，《東方日報》，2006年3月13號
- ↑ （具潛力旅遊點 只剩一棵吐艷 政府保育不力長洲櫻花凋零），《太陽報》，2006年3月15號
- ↑ 〈區議會分區／選區：A301 互聯網檔案館嘅歸檔，歸檔日期2021年5月1號，.〉，《二零零六年中期人口統計的統計表》（香港：政府統計處），2007年7月8日。
- ↑ 〈區議會分區／選區：A303 互聯網檔案館嘅歸檔，歸檔日期2021年3月24號，.〉，《二零零六年中期人口統計的統計表》（香港：政府統計處），2007年7月8日。
- ↑ 〈傳統節日 互聯網檔案館嘅歸檔，歸檔日期2009年10月30號，.〉，《長洲鄉事委員會》，造訪於2007年2月1號。
- ↑ 航班時間表 - 本地線 互聯網檔案館嘅歸檔，歸檔日期2008年2月8號，.，新世界第一渡輪
- ↑ 航班時間表 互聯網檔案館嘅歸檔，歸檔日期2016年4月24號，.，Maris Ferry
- ↑ 〈長洲景點介紹〉，2008年5月27號睇。
