中國共產黨第一次全國代表大會
中國共產黨第一次全國代表大會於1921年7月23號到7月30號同8月2號响上海同嘉興舉行。大會嘅召開宣告咗中國共產黨嘅正式成立。
與會人員
[編輯]1921年6月3號，共產國際代表、荷蘭人馬林到咗上海，提議各地共產主義小組派代表到上海召開全國代表大會。各地共產主義小組推選咗12名代表出席大會：上海代表李達、李漢俊；北京代表：張國燾、劉仁靜；長沙代表：毛澤東、何叔衡；武漢代表：董必武、陳潭秋；濟南代表：王盡美、鄧恩銘；廣州代表：陳公博；日本留學生代表：周佛海；另外陳獨秀又指派代表包惠僧帶咗佢嘅信件，其中包括四點意見：「一曰培植黨員；二曰民權主義之指導；三曰紀律；四曰慎重進行征服群眾政權問題。」佢哋代表全國57名黨員。呢13名代表嘅身份都係記者、學生或教師。但係喺全國有重要影響嘅「南陳北李」陳獨秀、李大釗都因事冇參加會議。陳獨秀嗰時喺廣州，而李大釗6月3號到新華門總統府請願期間，被刺刀拮傷頭。陳獨秀考慮到陳公博啱啱結婚，等佢順便到上海玩。當時响法辦嘅旅歐共產主義小組冇同國內取得聯繫，亦冇派出代表參加會議。共產國際代表馬林同共產國際遠東局書記處兼赤色職工國際代表尼克爾斯基（Никольский，又譯尼科爾斯基、李克爾斯基）亦參加會議。
會議過程
[編輯]7月23號晚，會議召開，地點位於上海法租界貝勒路樹德里3號（後改為望志路106號，而家黃埔區興業路76號）嘅一座石庫門房屋，係一大代表李漢俊阿哥李書城嘅寓所。
大會由張國燾主持，毛澤東、周佛海擔任會議記錄。
7月30號晚，大會會場遭到法租界巡捕房嘅搜查，喺上海代表李達嘅夫人王會悟建議下，去浙江嘉興南湖繼續會議。於是各代表响8月2號前往南湖，响煙雨樓前租咗一艘絲網船，假扮遊湖嘅客人，舉行咗最後一日嘅會議。馬林同陳公博未去南湖。
會議成果
[編輯]大會通過咗中國共產黨嘅綱領，規定咗黨嘅奮鬥目標、民主集中制嘅組織原則同黨嘅紀律，通過咗當前實際工作嘅決議，確定咗黨成立後嘅中心任務。
大會選舉咗中國共產黨中央局委員：陳獨秀、張國燾、李達，稱為「三人團」。陳獨秀擔任書記，張國燾擔任組織主任，李達擔任宣傳主任，主編《共產黨》月刊。
影響
[編輯]中共普遍嘅觀點認為，「一大」嘅召開宣告咗中國共產黨嘅正式成立；但係共產國際通常認為中國共產黨嘅成立時間係1920年8月。
今日會址
[編輯]中共一大會址位於上海市黃陂南路347號，新天地附近。1952年9月會址復修，成立紀念館對外開放，1961年被國務院列為第一批全國重點文物保護單位。
