區別特徵

呢段 MRI 短片入便個人喺度講英文。佢嘅脷同兩塊嘴脣係噉郁。

區別特徵（粵拼：keoi1 bit6 dak6 zing1；英文：distinctive feature）係廿一世紀初音系學上嘅一個重要基本概念，包括咗一拃語音特性，係音系分析會用到嘅。

背景概念

B：宇宙間一切有可能出現嘅聲
A：區別特徵
（幅圖唔跟比例畫。）

睇埋：聽覺

舉個具體例子，一股聲波嘅頻率主宰咗嗰股聲波聽落有幾高音；人嘅聽力範圍有限—健康正常嘅大人，據講淨係聽到頻率 20 至 20,000 Hz 嘅聲，噉即係話想像

1. 200 Hz 嘅聲對 300 Hz 嘅聲
2. 30,000 Hz 嘅聲對 30,100 Hz 嘅聲

喺 1 同 2 嗰兩種情況下，兩隻聲之間喺頻率上都係爭咗 100 Hz 咁多，一個正常大人應該能夠喺情況 1 之下分辨兩種聲，但換轉係情況 2，一個正常大人就應該唔識分兩種聲；噉即係話咁多種聲性質差異當中，得一小部份係人類聽得出嘅，一種聲性質要係「人類聽得出嘅」先有可能成為區別特徵，能夠畀一隻語言嘅使用者用嚟分辨唔同嘅字詞。呢啲噉嘅聲佔咗「宇宙間所有可能出現嘅聲」嘅一極小部份。

基礎概念

内文：音系學

睇埋：調音部位、調音方法同元音圖

對區別特徵嘅分析，通常係噉做嘅：

• 攞住手上想分析嗰隻語音；
• 列出晒可能嘅區別特徵；
• 同每個區別特徵，畀正（表示嗰隻語音具有呢種特徵）或者負（表示嗰隻語音並冇呢種特徵）；

舉例說明，以下係廿一世紀初英文入便幾個輔音，用其中一啲區別特徵嚟表達：

輔音	近似粵拼	音節核心	輔音	響亮	濁音	部位喺前	鼻音
/p/	b	-	+	-	-	+	-
/t/	d	-	+	-	-	+	-
/ŋ/	ng	-	+	+	+	-	+

當中頭嗰三個特徵（音節核心、輔音同響亮）係所謂嘅主要類別特徵。而自然類別就係指緊一拃同樣具有某種特徵嘅音素。唔同語言用到嘅區別特徵都可以唔同，而且經驗表明，隨住語言學家發掘學界前所未知嘅語言，佢哋不時會發現新嘅區別特徵，而語言學界嘅「區別特徵一覽表」亦曾經經過多次改版。

語言嘅音系有一定程度嘅「多餘」：事實表明，是但搵隻語言嚟睇，一對音素之間通常都會喺超過一個區別特徵上有異，即係例如廿一世紀初嘅英文入便有 /p/ 同 /b/ 呢兩個音素，兩個音素之間喺清濁同送氣等多方面都有差異；原則上其中是但一個差異都可以分辨到兩個音素，要咁多差異嚟有啲「多餘」。

音素相關

睇埋：音素同階乘

一隻語言可以有幾多個音素，受制於佢哋用咗幾多種區別特徵：設一隻語言用咗 n 咁多隻區別特徵；如果完全「天真」噉思考，隻語言嘅可能音素數量會係 $2^{n}$ 咁多；但係齋靠諗已經可知，某啲特徵本質上就係唔相容嘅，物理上冇可能同時係 + ，例如一個元音冇可能係

條脷高咗	條脷低咗
+	+

所以實際上，音素嘅數量梗會明顯細過 $2^{n}$ 呢個數值。

睇埋

• 音系法則
• 語言冗餘