平仄

平仄（粵拼：ping4 zak1，即係仄讀做側噉嘅音）係漢語文學上嘅一個概念，關乎喺文言韻文當中要點樣使用聲調：中古漢語嘅聲調分平、上、去、入四聲，而平仄當中嘅平係指平聲而仄係指上去入聲；而根據平仄嘅概念，一首詩歌要好聽，一定要跟從某啲平仄嘅變化規律，否則就「平仄不調」唔好聽。

根據現代語言學前嘅睇法，粵語有九聲，第一（陰平），第四（陽平）為平。其餘：陰上、陰去、陰入、陽上、陽去、陽入、中入為仄。而喺廿一世紀嘅語言學裡邊，粵語就有六個聲調，當中「一四聲而且韻尾唔係 -p、-t、-k 嘅」係平，其餘嘅係仄。

背景概念

内文：聲調

睇埋：聲調輪廓同中古漢語

「平聲哀而安，上聲厲而舉，去聲清而遠，入聲直而促。」
—喺唐朝中國學佛嘅日本僧人空海

平仄呢個諗頭據講係源於南齊（479 - 502 年）嘅。當時啲學者喺度研究語言嘅聲調，指出中古漢語分平、上、去、入四聲，當中平聲出現頻率明顯高啲，所以啲人就將上去入三種聲調統稱做仄聲；平聲顧名思義係指「平直和諧」嘅聲調，而仄聲就「有高低變化」；佢哋個諗法，幾似現代語言學當中嘅聲調輪廓概念。根據聲調輪廓呢個概念，搵一隻聲調語言（例如係粵語噉），隻語言會有若干隻聲調，聲調之間唔單只可以喺音高嘅高低上有差異，亦可以喺音高嘅變化規律上有差異，例如以下係粵語六聲調嘅聲調輪廓圖，打戙嗰條軸係相對音高，而打橫嗰條軸係時間：

喺第二調（史）當中，音高會喺一個音節當中變化，初頭大致係平嘅然後就升；而喺第一調（詩）當中，音高就大致係高同平嘅，不過最尾嗰段會跌一跌。啲人講廿一世紀初粵語嘅平仄，第一調（詩）同第四調（時）一般都畀人當做平聲，除非隻字係 -t、-p 或者 -k 做尾嘅，而非平聲嘅一般畀人當做仄聲。

詩詞應用

睇埋：舊體詩同押韻

傳統上認為，一首詩歌要好聽，一定要喺聲調上跟從某啲規律：例如平聲被認為係和諧嘅，但如果一句句子入邊冚唪唥都係平聲嘅音節，句嘢聽落就會「疲軟」；而仄聲就被認為係唔和諧嘅，如果一句句子入邊太多仄聲音節，聽落就會好似「咬牙切齒」噉。

傳統上，一首舊體詩每一句嘅平仄比例都會相約，五言詩係一句五隻漢字，要三平二仄或者二平三仄先至會好聽；舉例說明，想像用廿一世紀初嘅粵語朗讀杜甫嘅《春望》頭嗰兩句，用阿拉伯數字標聲調—

國(3) 破(3) 山(1) 河(4) 在(6)
城(4) 春(1) 草(2) 木(6) 深(1)

記返起「非 -t、-p 或 -k 做尾嘅一四就係平，其餘嘅係仄」：

國(仄) 破(仄) 山(平) 河(平) 在(仄)
城(平) 春(平) 草(仄) 木(仄) 深(平)

睇得出首詩啲平仄跟從明顯嘅規律，事實係仄仄平平仄、平平仄仄平、平平平仄仄同仄仄仄平平係五言絕句嘅基本句式。

中古漢語存在喺唐朝同宋朝時期，後嚟蒙古人打冧咗宋朝建立元朝。喺元朝期間，中原嗰頭嘅漢語喺音系上出現咗明顯變化，好多中原嘅漢語方言都唔見晒啲 -t / -p / -k 尾。廿一世紀初嘅標準官話已經冇晒呢啲音，例如喺標準官話入邊，國呢隻漢字嘅讀音係 guó，屬陽平聲，如果《春望》頭兩句用標準官話嚟讀，啲平仄就會變成

國(平) 破(仄) 山(平) 河(平) 在(仄)
城(平) 春(平) 草(仄) 木(仄) 深(平)

—被指係出現咗「平仄不調」嘅情況。

睇埋

• 粵語音系
• 粵語聲調
• 粵詩

外拎

• （香港繁體） 粵曲常識課(二) (PDF)，香港教育大學；依篇文第五部有講到粵曲點樣運用平仄。