心情板

呢塊心情板有拃喺德國蒙斯達影嘅相；設計師可能係想設計一啲圖像，用嚟同蒙斯達做旅遊方面嘅宣傳——「蒙斯達嘅精髓係乜呢？」

心情板（粵拼：sam1 cing4 baan2；譯自英文：mood board）係設計用嘅一種工具，設計者有樣嘢想設計，於是佢就收集各種嘅設計元素，設計元素可以係圖片、顏色、紋理、字體等等，然後佢再將呢啲元素砌埋一齊，形成好似一幅拼貼畫噉。佢噉做用意係想望住呢啲有共通點嘅嘢，捕捉想設計嗰樣嘢嘅「精髓」。

主要嘅應用

設計衫用嘅心情板

睇埋：概念

心情板有助傳達想要嘅外觀、感覺或者風格，而且仲可以喺創作過程中成為靈感來源。簡單嚟講，心情板唔單止可以用於設計，仲可以用嚟做視覺工具，快速噉將一個概念嘅整體「感覺」傳達俾其他人睇。喺創作過程中，心情板可以平衡協調同創意，仲可以確保設計團隊成隊人喺工作過程中對佢哋手上嘅工作有一致嘅理解。

譬如依家做電子遊戲設計，要設計遊戲世界入便嘅鬼屋，設計師嘅心情板可能會包含以下呢啲元素：

• 視覺參考：一拃相，影到破舊嘅屋、又黑又窄嘅走廊、同埋哥德式建築。
• 顏色配搭：黑、灰同深紫嘅色調，再加埋陰森嘅綠光或者紅光。
• 紋理：蜘蛛網、腐爛嘅木頭、剝落嘅牆紙，鋪晒塵嘅傢俬嘅質哋。
• 氣氛靈感：有霧嘅森林、陰森氣氛，同埋描繪鬼影嘅靈異相。

唔同嘅設計領域都有機會用到心情板，例如平面設計、攝影、用家介面設計、時裝設計、室內設計... 等都可以用。而且就算唔係專業設計師，都可以會用心情板實現一啲個人目標，好似想裝飾自己間房，或者想理解自己嘅衣著可以傳達咩氣質... 呀噉。除此之外，作家亦可以用心情板嚟解釋寫作風格，或者展示虛構故仔嘅場景。

心情板仲可以用落營銷嗰度，做品牌設計等嘅工作，例如廣告同品牌塑造，都成日會設計圖像。心情板可以確保創意團隊對要設計嘅嘢理解一致，同時又符合品牌想向外界展示嘅形象。

實體定數碼

喺廿一世紀初，心情板可以分兩種。

實體心情板

製作心情板可以用實體嘅材料，用手術刀切割，仲可以噴膠貼上剪裁好嘅素材。紙皮、紙同軟木板都可以做心情板嘅底板。設計者可以貼好多圖像上去，用相、概念圖、貼紙、雜誌圖片、原創藝術品、原創相同布料嚟裝飾，仲有其他任何能夠啟發創作者嘅裝飾物。心情板可以有唔同嘅形狀同大細。

數碼心情板

以數碼形式整嘅心情板易啲改同埋做協作。數碼心情板可以用設計軟件嚟整，例如 Adobe Express 呀噉，或者喺網上通過 Pinterest 之類嘅網站製作。呢啲平台嘅用戶經常會用其他人喺網上分享嘅圖，創造一啲可能唔能夠用身邊實物造嘅願景。

睇埋

• 拼貼畫
• 概念圖
• 設計
• 美學

呢度搵咗一拃描繪嶺南建築（或者叫粵式建築）嘅相返嚟，嶺南建築個概念或者「精髓」係乜呢？

拎

• （英文） 乜嘢係心情板 | 圖像設計基礎，YouTube