越南書法

2011 年影到有人喺河內寫書法。佢寫緊嘅係「祿」呢隻漢字。隻漢字喺粵語入面讀做 luk6，而喺越南話入面就可以讀做 lộc。

越南書法（粵音：Jyut6 naam4 syu1 faat3；越南文：Thư pháp Việt Nam / 書法越南），又或者叫書法越南，顧名思義係指越南嘅傳統書法，包含咗越南人寫字漢、字喃同國語字嗰陣用嘅書法—當中字漢同字喃係方塊字，而越南國語字就係羅馬字嘅變體，兩者涉及相當唔同嘅書寫技巧。

字漢同字喃

書法字國語寫 Việt（越）呢隻字。

一路直至廿世紀為止，越南嘅人寫嘢主要係用字漢（越南人對漢字嘅稱呼）同埋字喃（似漢字但專設計嚟寫越南話嘅文字）嘅。因為噉，越南一路都有字漢同字喃嘅書法。越南嘅字漢同字喃書法，被指係深受唐朝嘅影響，及後發展成自己嘅一套風格。

書法字國語

越南嘅書法字國語有陣時會將啲羅馬字當做方塊字噉嚟寫。
Tân niên hạnh phúc bình an tiến （新年幸福平安進）
Xuân nhật vinh hoa phú quý lai （春日榮華富貴來）

書法字國語（意思係國語字嘅書法）係指越南國語字嘅書法。

喺 15 世紀之後，越南就有同西洋人接觸，開始有人嘗試用羅馬字嚟寫越南話。及後越南畀法國殖民，更加增強咗羅馬字嘅影響力。喺 1900 至 1910 年代，越南人開始大舉用羅馬字寫嘅越南話編寫文學，形成咗所謂嘅越南國語字。自從 1920 年代起，越南人書寫已經變成以羅馬字為主。用越南國語字寫書法（書法字國語）呢家嘢就隨即興起。

值得留意嘅係，書法字國語有陣時會「漢字化」：國語字嚟自羅馬字，傳統上係打橫寫嘅，有別於漢字同假名等嘅方塊字，而因為國語字寫嘅字詞長度參差不齊，喺某啲場合—例如係寫對聯—就好撈絞；於是越南人就諗到條計仔，將國語字「方塊化」，佢哋會將啲羅馬字砌做方塊噉嘅樣，將幾隻字母由左至右、由上至下噉嵌入一個方塊度。為咗藝術上嘅考量，其中幾隻字母會有啲變體，例如 h 會變做の噉。

睇埋

• 諺文
• 粵文拉丁化
• 新英文書法

外拎

• （越南文） 越字書法：從過去到現代