林溥來

林溥來
林溥來
節目主持
英文名	Patrick Lam
花名	Patrick Sir、補習型男
國籍	中國（香港）
出世	1977年2月15號（47歲）; 英屬香港
職業	主持人同補習先生
教育程度	化學工程榮譽學士; 教育系碩士
母校	聖博德學校; 喇沙小學; 喇沙書院; 香港科技大學; 香港中文大學
配偶	關宛珊（2016年結婚）
活躍年代	2009年至家下
經紀公司	無綫電視（2014年至家下）

林溥來（英文：Patrick Lam，1977年 2月15號—）係香港補習先生，補習社同幼稚園創辦人，同無綫電視經理人合約藝員，外號Patrick Sir。

生平

林溥來喺喇沙小學（1989年）同喇沙書院（1996年）畢業^[1]，之後喺香港科技大學同香港中文大學分別攞到學士同碩士學位，讀大學時係香港男子甲一組籃球聯賽（中文：香港男子甲一組籃球聯賽）球隊發景同永倫嘅球員，同時又兼職拍電視同雜誌廣告。有網民認為佢重有型同靚仔過明星，嗌佢『補習型男』。

2005年，林溥來開辦補習社EDFLOW Learning Center（EDFLOW），初期親自兼教英文、數學、科學等科目。其後補習社業務擴展，2010年已有三間分社。林溥來亦係私立幼稚園「伽利利國際幼稚園」校監^[2]。

2009年，無綫電視邀請佢喺收費TVB兒童台（中文：TVB兒童台）節目《通識通通識》做專家主持，又幫翡翠台細路節目《放學ICU》嘅「Patrick Sir英語通通識」環節同埋《智激校園（中文：智激校園）》分別做專家主持同埋首席評判。除咗學術領域之外，林溥來亦參與文化、旅遊同綜藝等電視節目，包括主持節目《東張西望》同《Think Big 天地》。至2018年4月由基本藝人轉為經理人合約。

林溥來自知演技有限，所以無意參與拍電視劇。

林溥來亦有幫一啲公開活動做嘉賓同評判，同幫報紙雜誌寫專欄，譬如《太陽報 (香港)》嘅「通識攻略」專欄、《兒童快報》嘅通識專欄等時，又有幫學生寫教材^[3]。

林溥來2011年拍飲食節目而識咗無綫電視女藝人關宛珊，其後大方承認拍拖^[4]，兩人2016年喺關島秘密註冊結婚^[5]。

2016年5月23號，林溥來喺綜藝節目《東張西望》報道有關《壹週刊》同霸王集團嘅官司後，以「就算幾自由都好，都要有適當嘅自我審查，按當地文化同環境講適當嘅嘢」形容同反思「言論自由」而畀網民唾罵，被認為係政治立場親梁振英嘅余詠珊旗下藝人操控市民嘅意識形態同個人思想^[6]。

去到2023年1月，正值唔少香港人因香港失去言論自由而移民，但佢主持節目《起動南沙》，主動提到話外國生活好係得把口，南沙區生活先係真實，有抹黑移民之嫌^[7]^[8]。

↑ 〈喇沙校友創辦國際幼園〉。《《[[星島日報]]》》 (繁體中文)。2014年6月23號。
↑ 〈簽約經理人林溥來望主持多元化〉。《《[[頭條日報]]》》。2014-07-25。
↑ 〈林溥來熱血籃球火〉。《《[[太陽報 (香港)]]》》。2012-03-28。原著喺2016-03-05歸檔。喺2018-08-13搵到。
↑ 〈被傳非禮關婉珊獲男友呵番〉。《《[[忽然一周]]》》。第877卷。2012-05-18。原著喺2017-12-28歸檔。喺2018-08-13搵到。
↑ 〈2011年拍綜藝撻着 Patrick Sir關宛珊　深圳平買婚紗揭已婚〉。《《[[蘋果日報 (香港)]]》》。2017-12-21。原著喺2018-01-24歸檔。喺2018-08-13搵到。
↑ 〈《東張西望》主持談言論自由：幾自由都要有適當嘅自我審查〉。《《[[蘋果日報 (香港)]]》》。2016-05-24。原著喺2017-01-14歸檔。喺2018-08-13搵到。
↑ 〈起動南沙－免費觀看TVB劇集〉。{{cite web}}: CS1 maint: url-status (link)
↑ 〈大台監察2.0 - 大台又公器私用兼抹黑移民？〉。www.facebook.com (繁體中文)。喺2023-02-05搵到。{{cite web}}: CS1 maint: url-status (link)