梁素琴
 |
| 梁素琴 | |
|---|---|
| 女藝人 | |
| 原名 | 梁之素[1] |
| 英文名 | Leung So-kam[2] |
| 花名 | 琴姐 |
| 籍貫 | 廣東廣州 |
| 出世 | 1928年3月30號 中華民國廣州市 |
| 死 | 2022年11月20號（94歲） 香港東區醫院 |
| 職業 | 粵劇演員、電影演員 |
| 語言 | 粵語、英語、國語 |
| 宗教信仰 | 佛教 |
| 配偶 | 潘朝碩 |
| 父母 | 梁以忠（父） 黎仲華（生母） 瓊仙（張玉京）（繼母） |
| 屋企人 | 梁之潔（妹，原名梁之絜，[3]阿媽嚴淑芳） |
| 現任成員 | |
| 「九大姐」 | |
梁素琴（英文：Leung So-kam，1928年3月30號—2022年11月20號），原名梁之素，粵劇二幫花旦同香港電影女明星，有「藝壇才女」嘅美譽，佢除咗中國文學，琴、棋、書、畫都有一定技巧。 1938年「武狀元」陳錦棠自資組成「錦添花劇團」時代，梁素琴已拜佢為師傅，學習花旦臺步同武打技能[4][5]。從銀幕處女作《孟麗君》（1949年）至息影作《四鳳求凰》（1969年），參演逾50齣電影。
簡歷
[編輯]1928年3月30號，梁素琴喺廣州嘅粵劇世家出世，阿爸係粵樂同粵曲名家梁以忠，繼母係粵曲伶人瓊仙（張玉京）。梁素琴喺5歲時同雙親一齊去香港定居，6歲時梁素琴首次喺電台公開演唱中州話古腔子喉獨唱曲《罵玉郎》。小學畢業後，梁素琴一家就因香港淪陷而離港避難，13歲隨父赴湛江市廣州灣加入由薛覺先組成嘅「覺先聲劇團」，並獲薛覺先同夫人唐雪卿賞識收為其門下弟子。梁素琴從阿爸同好友所改嘅兩個藝名「綺琴」同「素琴」中揀咗後者，就咁正式開展梨園藝壇生涯。梁素琴喺中國大陸演出回港後，曾跟隨京劇名宿鄒來儀習唱，自是學得梅派的唱腔風格。梁素琴之後聲名日噪，經常到中國大陸、越南、新加坡同馬來西亞等地走埠登台。[6][7][8]
1949年，梁素琴首次參與電影演出，於由薛覺先、周坤玲等人主演嘅粵劇片《孟麗君》初次亮相，並獲薛覺先推薦出演皇后一角。呢件事之後，直至1969年，梁先後拍攝50幾部電影。1961年同香港電影從業者李香琴、任冰兒、金影憐、黎坤蓮、朱日紅、許卿卿、英麗梨同譚倩紅結義成金蘭姊妹，合稱「九大姐」。[9]
1964年梁素琴擔任正印花旦同副團長，同梁醒波（團長）、何驚凡、尤聲普、白文彪、顧青鋒、梁翠芬、賽麒麟、陳雪艷等30位伶人，組成「香港粵劇團」前往中華民國臺灣省參加雙十節勞軍、金門前線勞軍同公開演出30日粵劇[10]。
1965年乙已蛇年春節，梁素琴為「碧麗劇團」（全女班）在深水埗、油麻地同香港大會堂演出，文武生係鄧碧雲、正印花旦係吳君麗同譚倩紅、梁素琴為二幫文武生、武生係「英屬馬來亞」回流嘅王劍鳴、丑生係張月兒。[11]
1965年同關海山、區家聲、麥景君、朱少波同艷桃紅等伶人，聯袂到澳門媽閣廟演出5日粵劇[12]。
1966年梁素琴為「新女兒劇團」嘅二幫花旦，夜場開臺前突然失聲，連對白都讀唔出聲，急得滿眶眼淚，好彩正印花旦鄧碧雲情商原任小生嘅李婉湘小姐同佢對調，化解呢場危機[13]。
梁素琴喺1966年拜女畫家蔡佩珠小姐為師，學習中國畫，喺1969年參加喺香港大會堂高座八樓舉行嘅「蔡佩珠師生畫展」，向公眾展示佢嘅中國畫作品：「風雨歸帆」、「清溪垂釣」、「漁村歸掉」、「杏花春雨江南」、「秋江紅葉一帆懸」。「蕙寶音樂社」主持人黃夏蕙小姐同多位名媛貴婦前往捧場[14]。
梁素琴是汪明荃嘅粵劇「唱腔指導」，梁素琴負責指導《天仙配》、《公主刁蠻駙馬嬌》、《糟糠情》；紅線女負責指導《穆桂英大破洪州》[15]。
2021年4月16日，梁素琴獲香港演藝學院頒發榮譽院士銜，以表揚其藝術成就。汪明荃亦有到場致賀。[16]
2022年11月20日朝早，梁素琴喺香港東區醫院因病安詳離世，享壽94歲。[17]
家庭
[編輯]梁素琴嘅阿爸係梁以忠，粵樂同粵曲名家。生母黎仲華喺梁素琴仲喺襁褓時因病早逝。繼母[18]係瓊仙（張玉京），粵曲伶人。[15]
1970年，梁素琴同經營鋁業出入口商行嘅總經理潘朝碩先生喺香港大會堂婚姻註冊處舉行婚禮。佢嘅義結金蘭姊妹九大姐全部缺席觀禮。[19]
長篇粵曲
[編輯]- 西施（56金星）：梁素琴、郭少文、陳彩蘭、陳惠貞、劉錦超、白雲龍
- 王昭君（56金星）：梁素琴、林家聲、陳燕棠、白龍珠、黄佩蘭、葉夢痕
- 穆桂英（57新聲）：梁素琴、李銳祖、馮鏡華、劉克宣、郭少文、羅家會、梁碧玉、劉錦超
- 梁天來（58新聲）：梁素琴、鍾雲山、陳錦棠、劉克宣、郭少文、馮玉玲、小千歲、曾雲飛、簡耀佳
- 泣荊花（58新聲）：梁素琴、鍾雲山、陳錦棠、梅欣、郭少文、簡耀佳、盧麗卿、江峰
- 花木蘭（58新聲）：梁素琴、鍾雲山、羅家會、傳標安、白醒芬、鄭佩玲
- 女兒香（59新聲）：梁素琴、陳錦棠、林家聲、小甘羅、曾雲飛、陳惠貞
- 桃花仙子（59新聲）：梁素琴、鍾雲山、盧筱萍、梅欣、白龍珠、潘小桃
- 客途秋恨（60金星）：梁素琴、鍾雲山、李錦昌、紅霞女、白艷紅、李錦帆
- 情淚灑征袍（63新聲）：梁素琴、小千歲、孟磊明、白艷紅、小甘羅、曾雲飛
參考資料
[編輯]- ↑ 〈广东音乐家梁以忠——追忆〉。《大公报纸》。2013-10-06。原先內容歸檔喺2022-08-27。喺2022-08-26搵到。
- ↑ 梁素琴LEUNG So-kam 2019 榮譽院士 - 香港演藝學院
- ↑ 馮珍今.灼見名家.專訪粵樂曲藝名家楊麗紅.2022-08-16
- ↑ 1960年5月6號(星期五)，香港《大公報》，第二張，第七版。
- ↑ 1964年9月27嘅(星期日)，香港《華僑日報》，第五張，第三頁。
- ↑ 〈荃話題- 梁素琴：生於世家〉。喺2022-11-20搵到。
- ↑ 〈荃話題- 梁素琴：自學自強〉。喺2022-11-20搵到。
- ↑ 〈梁素琴老師的藝術人生〉。YouTube。中國星濤。喺2022-11-20搵到。
- ↑ 〈荃話題- 梁素琴：影壇人生〉。喺2022-11-20搵到。
- ↑ 1964年9月27號(星期日)，香港《華僑日報》，(第五張，第三頁)及(第六張，第一頁)。
- ↑ 1964年12月25日(星期五)，香港《華僑日報》，第六張，第一頁。
- ↑ 1965年3月8號(星期一)，香港《華僑日報》，第四張，第一頁。
- ↑ 1966年1月24日(星期一)，香港《華僑日報》，第五張，第一頁。
- ↑ 1969年4月20號(星期日)，香港《華僑日報》，第四張，第四頁。
- ↑ 15.0 15.1 1989年5月17號(星期三)，香港《華僑日報》，第20頁。
- ↑ 〈古天樂王祖藍獲演藝學院頒授榮譽院士 張學友獲榮譽博士：以為無機會做到〉。《[[明報]]OL》。2021-04-18。喺2022-11-20搵到。
- ↑ 〈徐蓉蓉文化工作室專頁〉。Facebook。2022-11-20。喺2022-11-20搵到。
- ↑ 汪明荃官方網站
- ↑ 1970年11月3號(星期二)，香港《華僑日報》，第八張，第二頁。
出面網頁
[編輯]- 梁素琴的白髮媽媽演出片斷 Wayback Machine嘅版面存檔備份[侵犯版權？]
- 梁素琴的老姑婆(老處女)演出片斷 Wayback Machine嘅版面存檔備份[侵犯版權？]
- 多才多藝 粱素琴 Wayback Machine嘅版面存檔備份
- 粵曲 劍膽琴心 梁素琴 任劍輝 Wayback Machine嘅版面存檔備份[侵犯版權？]