活出生命LIVE演唱會

活出生命LIVE演唱會
張學友嘅現場專輯
發行日期	2004年11月（CD、DVD）
錄製時間	2004年10月5號 香港會議展覽中心（現場採音）
類型	國語流行、粵語流行、英語流行
時長	1:43:54
唱片公司	IOI Limited（製作） 上華唱片、環球唱片（發行）
監製	歐丁玉（音樂總監）
評價
新浪音樂 《當代歌壇》 Amazon 《時代影視》 JD.com 2014
張學友專輯年表
張學友2002年音樂之旅世界巡迴演唱會 （2003年） 活出生命LIVE演唱會 （2004年） 學友光年世界巡迴演唱會

活出生命LIVE演唱會（Live The Life）係香港歌手張學友2004年10月5號喺香港會議展覽中心新翼搞嘅一場慈善演唱會，演唱會剩係公演一場，全場爆滿，收入全部捐畀慈善事業。被稱為大中華地區樂壇巨星同實力派歌手代表之一嘅張學友喺演唱會入面分別翻唱嚟自澳洲、台灣，香港嘅流行音樂，而喺加唱部分先至唱返自己原唱嘅歌曲，令成場演唱會最受期待。

簡介

呢次演唱會張學友共翻唱咗嚟自20位歌手（樂隊）嘅經典名曲，包括已故台灣歌手鄧麗君嘅但願人長久同好友張國榮嘅《追》，陳百強嘅名曲《等》，亦出現咗當時（2004年）嘅新歌，包括香港歌手古巨基嘅《傷追人》，同楊千嬅嘅《小城大事》。佢亦用唔同嘅風格唱咗台灣歌手周杰倫嘅《星晴》，陶喆嘅《愛很簡單》同張震岳嘅《愛我別走》等歌曲，令人有耳目一新嘅感覺。

演唱會入面張學友以一種另類嘅髮型從暴露畀觀眾嘅後臺出場，透過一層玻璃，觀眾自前排觀眾席入面可以清晰睇到區丁玉等後臺工作人員忙碌嘅場景。而張學友就手攞一個蘋果坐喺一張酒吧凳上面開始佢嘅演唱，並不時喺演唱過程入面食蘋果，據佢所講係因為現場錄音嘅關係，攞住一個蘋果顯得健康，從而消除緊張，而且蘋果可以潤喉，對演唱錄音有幫助。從而，呢次演唱會畀樂迷一個貼近自然，樸實嘅感覺，得到媒體同樂迷嘅贊揚。

工作人員

• 演唱會監製：歐丁玉
• 音樂總監：杜自持
• 鼓手：恭碩良

翻唱歌手同歌曲（曲目）

CD 1

1. First of May（原唱：Bee Gees）
2. 但願人長久（原唱：鄧麗君）
3. 眼淚（原唱：范曉萱）
4. 天黑黑（原唱：孫燕姿）
5. 聽海（原唱：張惠妹）
6. 約定（原唱：王菲）
7. 藍月亮（原唱：李克勤）
8. 天下無雙（原唱：陳奕迅）
9. 明天我要嫁給你（原唱：周華健）
10. 瘋了（原唱：林憶蓮）
11. 傷追人（原唱：古巨基）
12. 小城大事（原唱：楊千嬅）

演出場地：香港會展新翼

CD 2

1. 星晴（原唱：周杰倫）
2. 愛很簡單（原唱：陶喆）
3. 愛我別走（原唱：張震岳）
4. 愛如潮水（原唱：張信哲）
5. 味道（原唱：辛曉琪）
6. 等（原唱：陳百強）
7. 追（電影《金枝玉葉》插曲）（原唱：張國榮）
8. 情人（原唱：Beyond）
9. 不老的傳說
10. 講你知
11. 我真的受傷了（同王菀之合唱）
12. 她來聽我的演唱會
13. 愛是永恆

影響

由於演唱會大部分嘅歌都唔係張學友原唱，所以演唱方式同曲風唔同，再加上好多歌曲已經被原唱歌手唱出多年，一早深入人心，以張學友喺樂壇嘅地位，一次過翻唱咁多歌被認為係有一定難度同壓力，行內同行外都普遍認為對佢嚟講係一個挑戰。呢次演唱會成功後，佢更加加深咗喺音樂發燒友心目中嘅影響力。

由於剩係公演一場，喺演唱會舉辦後並冇引起太大嘅轟動，但隨住CD唱片喺香港同台灣發行後，越嚟越多人開始關注呢一場慈善演唱會。好多香港樂評人寫文對演唱會發表唔同嘅評價，多數對張學友嘅翻唱表示認可，但亦有樂評人講出佢喺演唱自己嘅名曲《她來聽我的演唱會》時太過追求完美，反而出現一啲小瑕疵，令首歌有啲唔自然感覺。

香港歌手王菀之亦受到參加呢次演唱會嘅影響，從而步入幕前做咗歌手。之前佢係環球唱片公司旗下嘅一位詞曲作者，冇出現過喺幕前同被媒體曝光，多數觀眾都唔識佢，佢喺2001年幫張學友作過一首國語名曲《我真的受傷了》，當佢喺演唱會入面同張學友合唱後，受到各方關注同一致認同，並喺之後正式做咗環球唱片旗下嘅一名唱作歌手。

演唱會嘅CD同後來發行嘅DVD喺香港、台灣同中國大陸都有好好嘅銷量，甚至喺11年後嘅2014年，呢張唱片都打得入京東商城唱片銷量榜頭10名。唱片重喺2004年年尾攞到IFPI國際唱片協會銷量統計嘅大獎，原本已經完全淡出香港音樂頒獎典禮嘅張學友更破天荒出席當晚嘅頒獎典禮，親身攞獎。

陳慧嫻復出後亦喺2008年2月8號至9號舉行《活出生命II》慈善演唱會，同樣唔少歌曲都唔係陳慧嫻原唱。