羊城賀歲萬家歡

《羊城賀歲萬家歡》（英文：Guangzhou Chinese New Year Celebration）係香港同廣州電視節目一個，屬大型綜藝節目，節目係香港電視廣播有限公司同廣東電視台合作。第一次喺1979年 1月28號，農曆新年期間搞。呢次係香港嘅電視臺，第一次喺中國大陸嘅直播節目，係創中港傳媒合作先河。其後喺1989年同2009年都搞過同類節目。

羊城賀歲萬家歡

1979年1月28號農曆新年，由電視廣播有限公司同廣東電視台喺廣州中山紀念堂、廣州烈士陵園、越秀公園一齊搞。當時係中國開放改革無耐。

羊城賀歲萬家歡十週年慶典

十年後，1989年 2月7號農曆新年，電視廣播有限公司再次同廣東電視台合作，喺廣州天河體育中心同白天鵝賓館舉行同直播《羊城賀歲萬家歡十週年慶典》，香港司儀包括有盧大偉、李美鳳、陳秀珠、沈殿霞、鍾保羅、譚炳文、李香琴，而廣東電視台亦派出前亞視前藝員黃麗梅與譚國治、王怡斐及鍾新寧。

演出歌手同藝員：梅艷芳、陳百強、鄺美雲、肥媽、陳慧嫻、羅嘉良、郭晉安、呂良偉、任達華、林穎嫺、黎美嫻、吳麗珠、甘國衛、顏國樑、劉嘉玲、周海媚、鄧萃雯、梁朝偉、廖啓智、吳君如、江欣燕、胡楓、李麗蕊、董嵐等等。

羊城賀歲萬家歡三十週年

為紀念第一屆《羊城賀歲萬家歡》問世三十週年，2009年 1月25號農曆新年，廣東電視台同香港無綫電視合作直播第三屆《羊城賀歲萬家歡》，粵港兩地藝人「傾巢出動」，兩地觀眾奉上粵港味十足嘅「南派春晚」。呢次晚會星光焰焰，而節目喺省港兩地名勝同鬧市錄製，包括廣州嘅五羊雕像、天河城、白雲山、珠江邊、中山紀念堂，同埋香港維園花市同商場荃新天地。由除夕7點至1月26號（大年初一）零晨十二點半，分別喺廣東電視台嘅珠江頻道同香港無綫電視嘅翡翠台、高清翡翠台播出。