變調

出自維基百科,自由嘅百科全書

變調bin3 diu6係有聲調語言聲調語言;例如廿一世紀初嘅粵語噉)經常出現嘅現象,指某啲字喺特定嘅場合之下,會讀成第個調,但係單獨用時通常會讀返本調,而字典標音亦會用本調。

類別[編輯]

唔同嘅語言,變調嘅法則都唔同,各具特式。變調包括兩種類別:

  • 語素變調[1](morphological tone change),有啲學者又叫變音[2]:唔同於連讀變調、承擔含義分別功用嘅變調。廣州粵語嘅語素變調有三種,分別為高平變調、高升變調同埋低變調,調值分別對應陰平、陰上同埋陽平,高平變調、高升變調嘅主要功用為小稱標誌小稱變調)、名詞性標誌、(名詞)特指標誌、口語風格標誌同埋虛詞音節縮減標誌,而低變調就衹用喺擬聲詞、同埋小稱入邊嘅一類——即親戚稱謂、兒語、細路名嘅疊音詞入邊[1]。例如:地名「長沙灣」個「灣」字本調係第一聲,讀「彎」(waan1),但係喺呢個詞裏面,就一定要變調成第四聲,讀「環」(waan1→4),但係「淺水灣」個「灣」,又只會讀「彎」,唔會讀「環」。又如:「揾錢」個「錢」(cin4→2)字、「啤梨」個「梨」(lei4→2)字,都要變調讀第二聲,但係呢兩個字,喺「金錢」、「雪梨」兩個詞入面,又會用返本調第四聲來讀。由此可見,呢類變調並無簡單規律,個個詞都唔同。
  • 連讀變調(tone sandhi):如果一堆字連續讀出來,聲調「蠱怪」、「難發音」嘅話,中間某啲字就會變讀其他調,咁樣聽落會「順耳」啲,講嗰陣會「順口」啲。致於何謂「蠱怪」、「難發音」、「順口」、「順耳」,則視乎語言而定,並無跨語言嘅通則[未記出處或冇根據]。連讀變調可以出現喺詞、固定詞組入邊,亦可以出現喺啲詞、固定詞組之間。例如國語將連續兩個第三聲嘅字,視為「唔順耳」、「難發音」,所以會將第一個字變調讀成第二聲(3→2),咁樣會「易發音」、「順耳」。有啲語言,每個多字詞裏面都會將某啲字變調,其他字保留讀原調。例如閩南話會將詞裏面孻尾個字讀原調,其餘就按特定嘅規律變調。吳語譬如上海話台州話温州話等等就根據首字、末字抑或多個字定個詞語嘅調,譬如上海話啲多字詞嘅連讀變調大體就係根據首字個單字調類推出嚟嘅。呢類語言,一用到多字詞就必然會變調,變調當食生菜。
    • 廣州粵語當中嘅連讀變調有兩種,都係陰平根據後字聲調個調頭高低而取高降(53)抑或係高平(55)[1]
      • 陰平高降喺陰平高平、陰平高降、上陰入同埋高平變調前面讀成高平;
      • 陰平高平喺唔係陰平高平、陰平高降、上陰入抑或高平變調嘅其他聲調前面,讀成高降,衹出現喺詞、固定詞組入邊,譬如「sam(高降)茸」、「jin(高降)仔」等,而且經常有例外如「jin(高平)人」等。

粵語嘅變調[編輯]

雖然粵語嘅變調屬辭彙變調一類,無乜規則,但係根據發音語意,亦可以歸納出幾種:

  • 變高上調:變調後,讀成第二聲。呢一類最常見。
    • 例子:
      • 耳環(ji5 waan4→2)
      • 男人 → 「男忍」(naam4 jan4→2)
      • 港女 (gong2 neoi5→2)
      • 眼鏡 → 「眼頸」(ngaan5 geng3→2)
  • 變高平調:變調後,讀成第一聲,通常略帶貶義。
    • 例子:
      • 今晚(gam1 maan5→1)
      • 自己 → 自機(zi6 gei2→1)
      • 一個人 → 一個因(jat7 go3 jan4→1)
      • 工廠妹 (gong1 cong2 mui6→1)
      • 蠄蟧絲網(kam4 lou4 si1 mong5→1)
      • 最尾(zeoi3 mei5→1)
  • 其他:難以歸類。

睇埋[編輯]

[編輯]

  1. 1.0 1.1 1.2 麥耘 (Dec 2000). 調調. . 東京: 好文出版社. 20: 100–122.
  2. 李榮 (1983). . (1983:1).