句尾助詞

出自維基百科，自由嘅百科全書

喺語言文法上，句尾助詞（粵拼：geoi3 mei5 zo6 ci4，英文：sentence-final particle），又叫句末mut6助詞，係指一啲擺喺句子最尾嘅細詞位（簡化噉講，詞位係指有某啲意思嘅字）。句尾助詞唔會用嚟指任何嘢，但可能會表示句嘢嘅語域或者語用意思[1][2]。

好似廣東話等東亞嘅語言，不溜都出嗮名多句尾助詞。例如廣東話入面嘅啩gwaa3呢隻字，專門用嚟表示「我唔肯定」噉嘅意思[3]，睇以下嘅句子－

  1. 「阿明做緊乜？」「佢打緊機。」
  2. 「阿明做緊乜？」「佢打緊機啩。」

喺例子 2 當中，答嘅人唔肯定阿明係咪真係打緊機。

粵語例子[編輯]

睇埋：語氣助詞 § 粵語嘅語氣詞同形態素變調

廿一世紀初嘅廣東話有豐富嘅句尾助詞[3][4][5][6]：

句尾助詞 對應漢字 意思 例句 標官對應[註 1]
aa3 呀 表示語氣普通嘅問句，或者用嚟令陳述句個尾聽落冇咁突兀。 A：你哋今晚食乜呀？
B：阿媽今晚煲老火湯呀。		 呀
ge3 嘅 強調一句陳述句講嘅嘢，當中要強調嗰樣嘢前面會加隻係hai6字。 A：你唔係喺香港出世嘅？
B：我係喺美國出世嘅。		 的
gaa3 㗎 表示講嘢嘅人對情況有啲保留，或者係有啲唔肯定。
呢隻字被指係嘅呀縮做一隻字嘅結果[3]。		 A：隻貓貓係邊度嚟㗎？
B：佢係隔離屋伯伯養嘅。		 唔適用
laa1 啦 / 喇 表示「請求」，如果唔落呢隻助詞，句嘢會帶有好似「命令」噉嘅意思。 A：就快餓死喇，快啲煮飯啦。
B：唔好催我煮飯啦。		 吧
laa3 喇 / 嚹 表示句嘢描述嗰件事「已經發生咗」。可以睇埋完成式。 A：皮蛋瘦肉粥上得未呀？
B：煲好咗，上得喇laa3。		 了
laak3 嘞 用法同 laa3（睇返上面）大致相同。 A：皮蛋瘦肉粥上得未呀？
B：煲好咗，上得嘞。		 了
mei6 未 係問句入面用嘅，表示想問一件事「係咪已經發生咗」。睇埋完成式嘅概念。 A：做好晒你啲功課未呀？
B：冚挷攔搞掂晒喇。		 沒
sin1 先 做問句嘅尾嗰陣有「快啲答我」噉嘅意思，
如果係跟住某樣動作，就有指「要嗰樣動作發生咗，先會做另外一樣嘢」嘅意思。		 A：你哋返唔返嚟先？
B：我哋等埋家姐收工先。		 唔適用
tim1 添 表示「仲有」，或者表達驚訝，後者種情況成日會配合隻仲zung6字嚟用。 A：啲飯食晒嗱？仲諗住三碗白飯夠晒你哋食添！
B：阿姐畀多三碗白飯添吖！		 唔適用
ne1 呢 問句用，表示手上嗰句問句，同打前嘅句子一樣不過主語唔同咗。
亦可以係表示句問句「唔預會有答案」。		 A：佢返咗嚟，噉你返唔返嚟呢？
B：點解咁想我返嚟呢？		 呢
maa3 嗎 用嚟將一句陳述句變成問句。 A：佢想返屋企嗎？
B：佢想返屋企。		 嗎
aa1 吖 表示講嘢嘅人情緒上熱烈，例如係興奮噉。 A：噉我哋一於聽日去海洋公園玩？
B：好吖！		 耶
aa4 呀 問句用，表示講嘢嘅人預咗自己講嘅嘢係正確，有陣時係帶有「不悅」嘅意味。 A：個 paa1 ti4 仲未完喎，你返屋企呀aa4？
B：係呀，老婆大人叫我返歸吖嘛。		 唔適用
me1 咩 問句用，表示驚訝或者「唔敢相信」。 A：你唔係今日上廣州咩？
B：突然間有事，聽日先上。		 唔適用
ze1 / zek1 啫 表示「只係」同「淨係」噉嘅意思。 A：你今日使唔使返工？
B：要，不過返半日啫。		 唔適用
zaa3 咋 ze1 aa3 結合埋一齊。 A：你班友仔有冇留返幾件壽司畀我？
B：得返五件咋zaa3，快啲返嚟啦。		 唔適用
zaa4 咋 ze1 aa4 結合埋一齊。 A：嘩，啲壽司得返兩件咋zaa4？
B：係呀，好食吖嘛。忍唔住口。		 唔適用
gwaa3 啩 表示講嘢嘅人唔肯定句嘢係咪真確。 A：阿強今晚會唔會嚟？
B：會啩。		 唔適用
wo3 [7] 喎 表示講嘢嘅人喺度報告緊啲資訊。 A：你煮碟餸好香喎wo3！
B：唔該晒喎！		 唔適用
wo4 [7] 喎 表示講嘢嘅人感到驚訝。 A：老媽子煮乜呀？
B：佢竟然煮意式麪喎wo4！		 唔適用
wo5 [7] 喎 反映啲資訊係「聽返嚟 / 由第個人講」嘅[註 2]。 A：老媽子點講？
B：佢話今晚出街食飯喎wo5。		 唔適用
bo3 噃 表示叮囑或者勸告。 A：返屋企嗰時，要小心睇車噃。
B：得，明白～		 唔適用
lo1 囉 表示「句嘢講嘅內容，應該好顯然易見」噉嘅意思，成日會配合隻咪mai6字嚟用。 A：我成日唔記得閂水喉。
B：噉咪搞到啲水費貴囉lo1。		 唔適用
lo3 囉 / 咯 大致表示「某啲情況改變咗」噉嘅意思。 A：哎吔，我出門口嗰陣唔記得閂水喉添！
B：啲水費金囉lo3。		 唔適用
aa3 haa2 呀吓 用嚟將一句指示「軟化」，令句嘢聽落柔和啲。 A：我出門口喇。
B：返屋企路過超市，記得買雪梨呀吓。		 哦
aa3 ho2 呀呵 用嚟將一句陳述句變成問句，想問「句嘢講嘅嘢係咪正確？」。可以睇返嗎maa3。 A：我返咗嚟喇。
B：你買咗雪梨呀呵？		 唔適用
aa1 maa3 吖嘛 用嚟表示一個答案好明顯。 A：佢返屋企呀aa4？
B：佢要陪老婆仔女吖嘛！		 唔適用
laa1 maa3 啦嘛 laa3 同 aa1 maa3 結合埋一齊。 A：佢去咗邊呀？
B：佢返咗屋企啦嘛！		 唔適用
gaa1 maa3 咖嘛 ge3 同 aa1 maa3 結合埋一齊。 A：嘩，佢講英文講得咁流利呀aa4！
B：佢係喺英國出世同大咖嘛！		 唔適用
zaa1 maa3 咋嘛 ze1 同 aa1 maa3 結合埋一齊。 A：嘩，佢仲識講法國話添呀aa4？
B：超，佢上過一堂，識幾隻字咋嘛！		 唔適用

喺廣東話入面，啲人可以將多過一隻句尾助詞串埋一齊噉用，而一般嚟講，嘅會擺喺串嘢最前，而啲問句用嘅助詞（咩、呢、嗎）會擺串嘢最尾[8]。

睇埋[編輯]

註釋[編輯]

  1. ↑ 依度講嘅對應，係講緊「大致對應」。語言依家嘢，兩隻話啲字好多時都做唔到完美一對一噉對應。
  2. ↑ 可以睇據由嘅概念。

文獻[編輯]

引述[編輯]

  1. ↑ Morita, Emi (2005). Negotiation of Contingent Talk: The Japanese interactional particles ne and sa. John Benjamins.
  2. ↑ Lin, Huey Hannah (2005). Contextualizing Linguistic Politeness in Chinese 互聯網檔案館嘅歸檔，歸檔日期2023年5月10號，. (PhD dissertation). The Ohio State University.
  3. ↑ 3.0 3.1 3.2 啩. CantoDict.
  4. ↑ Law, A. (2002). Cantonese sentence-final particles and the CP domain. UCL working papers in linguistics, 14, 375-398.
  5. ↑ Sybesma, R., & Li, B. (2007). The dissection and structural mapping of Cantonese sentence final particles . Lingua, 117(10), 1739-1783.
  6. ↑ Law, S. P. (1990). The syntax and phonology of Cantonese sentence-final particles. Boston University.
  7. ↑ 7.0 7.1 7.2 喎 www.cantonese.sheik.co.uk.
  8. ↑ Cantonese Final Particles (尾音).
由「https://zh-yue.wikipedia.org/w/index.php?title=句尾助詞&oldid=2059983」收