量詞

個：中文最常見嘅量詞之一，粵文都成日用到。

量詞（粵拼：loeng6 ci4）係詞性一種，會掕住一隻名詞嘅詞語或詞綴，用嚟表示名詞所指事物「屬於咩種類」。加埋「數詞」，例如：一、二、三，就係數量詞，用嚟表示名詞嘅數同埋量。

量詞係用嚟連結數詞同埋名詞，本身冇意思，一定要同名詞或者實詞一齊用。量詞常見於東亞嘅語言，例如漢語、韓語、日語、越南話、泰語、孟加拉話、馬拉話... 等等，都會用到量詞。相比之下，歐洲語言就比較少用到量詞。

概論

以漢語為例，因為西方語言比較少有量詞呢個概念，當西洋人學漢語嘅時候會比較難理解。因為個形容嘅名詞比較多，學漢語嘅外國人好多時都用個去形容大部份名詞，出現一個貓或者一個杯（喺粵語中比較常用隻）等嘅短語。慢慢，反而係由呢班學漢語嘅西洋人掉返轉頭影響埋其他漢語使用者，令到個一詞有變成「萬能量詞」嘅趨勢。

量詞嘅例子：把、杯、本、部、張、個

對比

因為唔同嘅地區，有時唔同語言或方言對同一個名詞都會用唔同嘅量詞。例如：

• 閩南話同粵語叫「一間學校」，而普通話係叫「一所學校」
• 閩南話叫「一粒雞蛋」，廣州話係叫「一隻雞蛋」，而普通話就係叫「一個雞蛋」
• 閩南話叫「一部汽車」或者「一台汽車」，廣州話係話「一部車」或者「一架車」，而普通話就係叫「一輛汽車」
• 廣州話、香港話叫「一個人」，有尐其他粵語方言（例如粵西、粵北地區嘅話）係叫「一隻人」或者「一條人」

睇埋

• 名詞