詞彙體

  提示：呢篇文講嘅唔係文法體。

詞彙體（粵拼：ci4 wui6 tai2），中文又有叫詞彙動貌，德文叫 Aktionsart（行動類型噉解）係一個語言學概念，涉及到文法同語義之間嘅啦掕。行動類型概念會將動詞分做若干類，分類基準係睇佢哋嘅語義，唔同類別嘅動詞「可以做嘅文法體變化」都唔一樣。

基礎概念

内文：文法體同語義學

事實表明，好多語言都有文法體嘅現象，會有方法做構詞上嘅變化，表達一件事件嘅內部時間結構，簡單講即係件事件進行到邊度。睇睇以下嘅例句：

語言	例句	「進行到邊」
粵語	我食咗飯。	已完成
書面中文	我吃過飯了。	已完成
粵語	我睇緊書。	進行中
英文	I am reading.	進行中

用語義學嘅角度嚟諗，文法體唔單只有文法功能，動詞本質上好多時都係指緊行動或者事件，而呢樣嘢實可以帶有「進行到去邊」嘅語義。行動類型個諗頭，就係想將「事件」按語義特性分做若干個類別，而唔同類別喺「做得咩文法體變化」呢點上有差異。

文氏分法

睇埋：動詞結點

根據美國嘅語言哲學專家文德勒嗰套諗法，事件可以分做狀態同有嘢發生兩大種。狀態嘅例子有知道、鍾意或者理解等，呢啲事件通常冇得以進行式嘅形式出現，只可以係冇文法體（例如簡單嘅現在式）或者完成式。英文例子：

例句	意思	時態同體	文法正確？
I know Greek.	我識希臘文。	簡單現在式	正確
Mary likes radish cake.	瑪莉鍾意蘿蔔糕。	簡單現在式	正確
I am understanding what you say.	我明白緊你講乜。	現在進行式	錯誤

文德勒跟住就將有嘢發生再細分做三種，分做一嘢發生、達成同埋活動。

• 文德勒講嘅一嘢發生，係指一啲瞬間發生（或者叫時間定點）嘅嘢，例如得知（講緊一瞬間由唔明去明）、搵到或者死亡呀噉，呢啲事件一般都會抗拒做進行式，而且亦都會抗拒指啱啱開始嘅文法體，即係「啱啱開始死」噉嘅語句會係唔合理嘅。
• 文德勒講嘅達成同活動，都係一啲「明顯唔係一瞬間咁短暫」嘅事件，可以有進行式，分別在於達成有結點，即係實會喺時間上有某啲終結點，而活動就冇。
  • 達成：例子有演講、起屋、捉棋呀噉。
  • 活動：例子有郁動、睇、畫公仔呀噉（理論上可以無限進行）。
• 句子入便第啲字詞，可以指定終結點，從而令到活動型嘅動詞變成達成型，例如

  活動：我行緊路。

  達成：我行緊路去太空館。（太空館係終結點，到咗嗰度行路呢件事件就會終結。）

用表畫出嚟嘅話，文德勒嗰套諗法（包括佢啲延伸種類）如下：

類型	靜止？	有終結點？	一瞬間嘅？
State	+	-	-
Achievement	-	+	+
Semelfactive	-	-	+
Accomplishment	-	+	-
Activity	-	-	-

廿世紀嗰陣好多語言學家都認為，上述四種類型係普世嘅，無論邊隻語言都會跟佢嗰套分法，但係打後嘅研究表明呢點並唔成立。唔同語言對於「呢件事件係咪一瞬間發生嘅」睇法可以好唔同，例如死亡喺好多語言當中都被視為係一瞬間（由生到死）嘅事件，但係又有好多語言都有種情況，佢哋用起死亡呢隻動詞上嚟，會包埋「仲生勾勾，但好明顯就快死」嗰一段時間，而喺呢啲語言當中指死亡嘅動詞可以係進行式，例如英文語句：

He is dying.

Die 譯做中文一般會譯做死噉解，但喺實際應用上，上面句嘢通常係指句中嘅佢處於未死，但就快死（可能係瞓咗喺病床上奄奄一息）嘅狀態。

睇埋

• 謂語
• 時態