12港人案
 | 呢篇文記述緊一項香港嘅時人時事。 內容會隨住事件嘅進展而變動或者更新。 |
 | 呢版要更新，以反映最新情況。加完料之後唔該拎走個模。 |
12港人案（英文：2020 detainment of Hong Kong residents at sea by China，又叫12港人送中案、12港人蛇案[1][註 1]），係指12位香港人喺2020年8月23號喺香港東南嘅海域畀中國海警捉走，之後一路畀當局禁錮喺深圳鹽田看守所嘅事件。
當時有報道指，飛行服務隊嘅定翼機曾經喺相關水域上空盤旋，被質疑係協助警方行動[2][3]。
12港人名單
[編輯]12港人（分別有十一男同一女）都參加過反送中逆權運動，並喺運動期間俾警方捉過[4][5]：
- 李宇軒（29歲）：香港故事成員之一，因為違反國安法入面嘅「勾結外國或者境外勢力罪」同涉嫌洗黑錢，而畀差佬拉
- 張俊富（22歲）：公開大學大三生，響「國際人權日大遊行」入面畀差人捉到佢有手槍同子彈，畀人告「串謀有意圖傷人罪」、「無牌管有槍械及彈藥罪」同埋兩項「管有攻擊性武器罪」
- 張銘裕（20歲）：屠龍小隊成員之一，響「國際人權日大遊行」入面畀差人捉到佢有手槍同子彈，罪名同張俊富一樣
- 嚴文謙（21歲）：香港專業教育學院學生，響「國際人權日大遊行」入面畀差人捉到佢有手槍同子彈，罪名同張俊富一樣
- 李子賢（29歲）：測量員，響「全球反極權遊行」入面畀差佬拉，畀人告「暴動罪」同「襲警罪」
- 郭子麟（18歲）：港大工程系大一生，屠龍小隊成員之一，葡萄牙籍公民，因為參加理工大學衝突而畀人告「暴動罪」
- 鄭子豪（17歲）：前港鐵技術訓練員，響灣仔一個單位畀差佬捉到佢有汽油彈原材料，畀人告「串謀意圖縱火罪」同埋「管有物品意圖損壞財產罪」
- 鄧棨然（30歲）：售貨員，響灣仔一個單位畀差佬捉到佢有汽油彈原材料，罪名同鄭子豪一樣
- 廖子文（17歲）：中五生，響灣仔一個單位畀差佬捉到佢有汽油彈原材料，罪名同鄭子豪一樣
- 黃偉然（29歲）：機械技工，響上水沙頭角路吳屋村附近畀人懷疑響度製造「DNT」，因而畀人告「製造爆炸品罪」
- 黃臨福（16歲）：越南籍中二生，曾經向旺角警署擲汽油彈，又畀差佬響屋企搵到有三個汽油彈，畀人告「企圖縱火」同「管有攻擊性武器罪」
- 喬映瑜（33歲）：售貨員，同上水村屋農田整炸彈一案有關，因而畀差佬通緝
事件經過
[編輯]偷渡過台灣
[編輯]8月23號朝早七點幾，呢十二位港人由西貢布袋澳出發，原本諗住先到東沙群島落腳，之後再駁另一艘船到台灣屏東縣，到台灣後就申請政治庇護。不過香港去台灣水域之前一定要先經中國海域，而中國響呢度有主權，佢哋就係響經過中國海域嗰陣畀中國水警捉到[6]。
但同時有人話，其實中國水警好少會響呢度出現，反而係解放軍去南海軍演嗰時先至會經過呢度，所以中國水警應該係先前已經收到料，而畀料佢哋嘅好有可能係香港警察[4]。
根據中國水警嘅資料，喬映瑜同鄧棨然響「上家」指示底下，組織其他人參加呢次行動，由鄧棨然揸艘快艇，而喬映瑜就涉嫌響船上教人「夾口供」，話：「如果畀人捉到，就一齊話係出海釣魚。」呢啲細節係喬映瑜響畀人審判期間提供，但由於冇旁聽，未知係真定假[7][8]。
拘留期間
[編輯]8月26號，中國水警響微博將呢件事公開，並且話呢12位「非法越境人員」畀廣東海警拉咗，禁錮喺深圳鹽田看守所[9]。9月13號，鹽田公安正式以「偷越邊境罪」，刑事拘留呢12位港人，並且響9月30號起訴佢哋[10]。
揭發政府飛行服務隊追蹤12港人
[編輯]
10月6號，《蘋果日報》揭發根據flightradar24顯示，保安局旗下嘅一架B-LVB定翼機響8月23號凌晨四點幾響西貢布袋澳上空飛嚟飛去，行跡可疑，似係監視住隻快艇，仲要持續三個幾鐘，直到八點半先返；而另一架屬於政府飛行服務隊B-LVH獵豹直升機就響香港以南對開嘅海域飛嚟飛去，似係同中國水警報料，仲曾經冇信號有成半個鐘[11]。同時之間，《立場新聞》揭發，話透過航空雷達公司，發覺當日嘅B-LVH獵豹直升機同B-LVB定翼機未有接住平時嘅時間表出動（呢兩架機應該係朝頭早或夜晚出動，但唯獨響23號係凌晨出動），而且路線仲飛得遠過以前，經過嘅地方都同平時唔同[12]。啲人批評差人係專登放生呢12港人，等佢哋畀中國水警拉[11]。
警務處處長鄧炳強響之後就出嚟澄清，響呢件事上面，差人冇角色，而特首林鄭月娥都話係[13]。
但係響10月8號，黃之鋒同鄒家成、岑敖暉、朱凱迪同埋幾個家屬（分別有鄭子豪阿爸、李子賢嘅阿爸阿媽同黃偉然個老婆）到大嶼山飛行服務隊總部前面見記者，其中黃之鋒公佈一份係屬於飛行服務隊嘅內部文件，話當日嘅飛行程序（Flying Programme）紀錄係「P-OPS」（全名：Police Operations，中文：警方行動），質疑差人係先前已經知道佢哋12個香港人要偷渡，所以就放「陷阱」，並唔係好似鄧炳強咁講。另外，響10月7號，飛行服務隊更新電話簿頁，其中懷疑有份參加呢次「送中行動」嘅人（名單：馬鈞豪、黃詠妍、丁沛東、張家輝同陳堅衡）嘅資料全部唔見嗮，鄒家成質疑佢哋係身有屎先至刪除。而佢哋啱開始冇耐，就有成三十幾個軍裝差人上前，向佢哋發告票，話違反限聚令（防止武漢肺炎疫情擴散）。家屬好嬲，就批評啲差人：「香港政府講大話、出賣港人！」、「我要真相要公義！」、「報警報咗咁耐，你查咗啲咩嘢，抄牌就咁叻，好窮呀你？」，質疑係「中港勾結」[13][14]。
警方話呢次行動真係同差人冇關係；飛行服務隊就話唔會評論；而保安局就鬧呢啲指控係「混淆視聽」。總之，佢哋都係話唔會公開其他資料[15]。
家屬同律師受阻
[編輯]自從呢12港人畀中國拘留以嚟，家屬就一直冇得探佢哋，引起家屬不滿。
司法判刑
[編輯]
11月27號，鹽田公安話已經完成調查，會以呢十二位港人組織他人偷越邊境罪（鄧棨然同喬映瑜）、偷越邊境罪，移送到鹽田區人民檢察院起訴。由於當局冇先前通知家屬，所以家屬「心急如焚」，好驚屋企人嘅情況，又批評官派律師「一問三不知」，希望可以到場旁聽[16]。
12月16號，檢察院響其中十個人提出公訴；而另外兩位未成年嘅就舉行唔公開嘅聽證，睇下會唔會起訴，而成單案件將會閉門審訊。12港人關注組發聲明，譴責中國大陸唔公開審判，直頭係「秘密審訊」，同中國大陸一直響到宣傳嘅「陽光司法」背道而馳。家屬希望可以公開判決書同埋有港府嘅人上去旁聽，但最後都係成唔到事[17]。
12月28號，檢察院正式開審，指聽完官派律師嘅辯護後，會「擇日宣判」；又話十位被告當場認罪，仲希望法庭可以判輕啲[18][19]。法院又改口話，今次係公開審判，所以有一大班外國領事因應返家屬嘅要求，一朝早到場要旁聽，但就畀大陸以「名額已滿」為理由唔畀班領事入去。法院話，本身已經有人大代表、政協委員、記者同部份家屬旁聽；但家屬直指冇呢回事[20]。
判刑
[編輯]12月30號，鹽田區人民法院正式判刑，刑期如下[1]：
| 名 | 罪名 | 判刑 |
|---|---|---|
| 鄧棨然 | 組織他人偷越邊境罪 | 坐監三年，罰款人民幣兩萬蚊 |
| 喬映瑜 | 坐監兩年，罰款人民幣一萬五千蚊 | |
| 嚴文謙 | 偷越邊境罪 | 坐監七個月，罰款人民幣一萬蚊 |
| 鄭子豪 | ||
| 張俊富 | ||
| 黃偉然 | ||
| 李宇軒 | ||
| 郭子麟 | ||
| 李子賢 | ||
| 張裕銘 | ||
| 廖子文 | 唔起訴 | 12月30號遣返香港 |
| 黃臨福 |
後續
[編輯]美國制裁
[編輯]2020年12月22號，美國商務部公布制裁一批同中國軍方有聯繫嘅組織，限制佢哋買美國嘢同埋技術，以防止佢哋唔恰當咁轉移美國嘅技術，其中就包括咗政府飛行服務隊。有一啲報導推測美國政府嘅決定，同呢次事件有關[2][3]。
廖黃兩人移交香港後
[編輯]
畀人率先押返香港嘅廖子文、黃臨福兩個人喺移交到香港警察同押送天水圍警署之後，同日獲得同屋企人見面。雖然佢哋已經返香港，但係代表律師喺警署亦畀警察多番阻止，更一度要求律師必須有家屬在場，check埋身份先可以見當事人，形容做法同鹽田看守所無分別。幫佢哋嘅鄒家成又話，佢哋好明顯受到酷刑精神折磨[21][22]。
見面後，12港人關注組喺社交專頁引述喬映瑜屋企人嘅講法，話見面嘅時候，佢神情緊張，完全唔想傾喺被禁錮鹽田看守所嘅事，家屬批評所謂嘅官派律師一直唔見人影，從來唔覆電話或訊息，開庭又冇話畀家屬。由於電話一直冇人聽，就諗住打電話去律師樓，但係佢哋話冇接過呢單案。同時，關注組又話，12名港人冇得揀律師，秘密拘留期間嘅人身安全同通訊又得唔到保障，官派律師重隱瞞身份同案件嘅訊息。響想攞料嗰陣，反而畀鹽田分局以「信息屬刑事案信息」而唔理佢。關注組批評：「又話係公開審訊，但就只有中共自己人可以出席，依家案件審完都冇判決書，成個司法過程根本係一場鬧劇。」[23]。
將家屬委託嘅辯護律師釘牌
[編輯]
判決結果公佈後，港人家屬其中委託嘅內地律師盧思位同任全牛，喺2021年1月4日左右，先後收到咗四川省同河南省司法廳發出嘅行政處罰告知書，話佢哋過往嘅執業行動有「嚴重損害律師行業形象，造成惡劣社會影響」，而要釘律師牌。「12港人關注組」隨後發表咗聲明，譴責中國大陸當局想斷兩位律師嘅生計，同時多謝返盧等一眾中國人權律師響受到中國當局嘅各種政治壓力下，仍然繼續秉持專業同操守，接受家屬嘅委託去爭取維護12港人嘅權益[24][25][26]。
先後兩次拉咗協助十二港人嘅人
[編輯]2020年10月10號，差人拉咗九個人，話佢哋提供快艇同錢，又安排佢哋偷渡前點去碼頭，同埋安排到咗台灣之後嘅生活等等，包括梁國雄嘅前助理唐婉清、本土民主前線成員鍾雪瑩等等。12港人關注組發表聲明，狠批差人係想轉移視線，質疑差人嘅資料來源係嚟自12港人，擔心佢哋畀人以「酷刑」逼供[27]。
2021年1月14號，國安處以「協助罪犯」為由拉咗十一個人，話佢哋幫12港人偷渡，其中有九龍城區議員黃國桐、前學聯副秘書長何潔泓個阿媽同音樂創作人霍朗齊等等[28]。
李宇軒被非家屬安排律師代表
[編輯]李宇軒去到3月底喺內地刑滿被遣返返港後，案件喺3月31號提堂，佢被一名大律師羅達雄代表，羅達雄當時拒絕透露李嘅下落，而李宇軒嘅妹妹就話羅達雄唔係家屬安排嘅代表律師，更加話睇報道先知有呢個人[29]。
香港再審
[編輯]組織偷越邊境罪成判囚2年嘅喬映瑜喺中國刑滿出獄後，轉交香港又審。2024年1月11號佢喺區域法院承認製造爆炸品、管有爆炸品及意圖妨礙司法公正總共3項控罪。[30]
反應
[編輯]香港
[編輯]建制派
[編輯]立法會議員謝偉俊指，呢12位港人係香港政府嘅「敵人」，又話呢單案件涉及好多敏感資料，關連到中美之間嘅明爭暗鬥，所以佢話「唔應該過份要求愛我哋嘅而走去錫我哋嘅敵人」[31]。
民主派
[編輯]民主黨議員涂謹申質疑佢哋唔肯公開官派律師嘅資料，係唔想負責。佢話，被捕者家屬唔知道官派律師個名，就唔知律師有冇見過當事人、更加唔知佢有冇代表幫當事人辯護。佢又話，同家屬公開官派律師嘅資料係基本公義制度[23]。
學生
[編輯]
2020年9月22號，港大學生組織「守護港大聯署小組」，響學校發起「聲援被捕手足、反對國安惡法 、關注港大染紅」行動，其中有叫啲人寫明信片畀12港人，之後再寄上去。發起人阿揚話，呢次行動又叫「中秋送暖行動」，係希望畀響大陸嘅12港人同中國當局知道，香港係有唔少人關注呢單案件；雖然知道佢哋冇乜嘢可能收到，但係「做到幾多得幾多」，可以畀到佢哋一啲溫暖[32]。
參考
[編輯]- ↑ 1.0 1.1 〈12港人蛇案：2人組織偷越邊境罪囚2至3年 李宇軒等8人囚7個月〉。《on.cc東網》 (香港中文)。喺2021-01-12搵到。
- ↑ 2.0 2.1 〈美國商務部把香港飛行服務隊列入黑名單 - RTHK〉。news.rthk.hk (臺灣中文)。喺2020-12-22搵到。
- ↑ 3.0 3.1 〈美國限制逾百中俄企業部門購買技術產品 包括香港飛行服務隊 | 立場報道 | 立場新聞〉。《立場新聞 Stand News》 (英文)。原著喺2021-07-08歸檔。喺2020-12-22搵到。
- ↑ 4.0 4.1 凌逸德 (2020-08-28)。〈潛逃被截｜偷渡路線曝光 12港青有案在身 擬經東沙島轉船赴台〉。《香港01》 (香港中文)。喺2020-12-30搵到。
- ↑ 〈12港人案●一文睇｜被關押130日 重判能否上訴？ ｜ 蘋果日報〉。《Apple Daily 蘋果日報》 (香港中文)。原著喺2021-02-12歸檔。喺2020-12-31搵到。
- ↑ 〈內地海警截十數名港人疑偷渡台灣 據報包括涉違國安法李宇軒 - 新聞 - am730〉。web.archive.org。2020-11-16。歸檔時間2020-11-16。喺2020-12-30搵到。
{{cite web}}: CS1 maint: bot: original URL status unknown (link) - ↑ 羅家晴 (2020-12-30)。〈12港人判刑│新華社：喬映瑜庭上哽咽 曾教夾口供「出海釣魚」〉。《香港01》 (香港中文)。喺2021-01-01搵到。
- ↑ 〈【12 港人案】黨媒︰鄧棨然經「上家」策劃偷渡 喬映瑜庭上哽咽稱後悔 「認知內地法治公正嚴謹」 | 立場報道 | 立場新聞〉。《立場新聞 Stand News》 (英文)。原著喺2020-12-31歸檔。喺2021-01-01搵到。
- ↑ 〈12港人涉潛逃關押鹽田看守所 葉國謙：料內地起訴非法入境相關罪名 涂謹申：潛逃者一般被遞解 (12:27) - 20200909 - 港聞〉。《明報新聞網 - 即時新聞 instant news》 (繁體中文)。喺2020-12-30搵到。
- ↑ 彭琤琳 (2020-09-30)。〈深圳檢方批捕12港人 10人涉偷越邊境 2人涉組織他人偷越邊境〉。《香港01》 (香港中文)。喺2020-12-30搵到。
- ↑ 11.0 11.1 Https://Www.post852.com, 852郵報 (2020-12-22)。〈政府飛行服務隊被美國商務部列入黑名單 限制購美商品與技術｜852郵報〉。《852郵報》 (香港中文)。原著喺2020-12-22歸檔。喺2021-01-01搵到。
{{cite web}}: External link in|last= - ↑ 〈【夥警行動】重組飛行服務隊近 800 次航程 8.23 飛行路徑明顯異常 疑監視 12 港人快艇 | 互動專頁 | 立場新聞〉。《立場新聞 Stand News》 (英文)。原著喺2020-11-17歸檔。喺2021-01-01搵到。
- ↑ 13.0 13.1 吳倬安 (2020-10-06)。〈12港人潛逃｜被質疑港府早知悉 林鄭批抹黑政府 重申警方無角色〉。《香港01》 (香港中文)。喺2021-01-02搵到。
- ↑ 〈眾新聞 | 12港人被中方截獲前 飛行服務隊定翼機上空一帶盤旋 疑涉警方行動 家屬質疑中港勾結〉。《眾新聞》 (中文)。原著喺2020-10-16歸檔。喺2021-01-02搵到。
- ↑ 〈保安局：不會公開飛行服務隊飛機調配及航行細節〉。《Now 新聞》 (香港中文)。喺2021-01-02搵到。
- ↑ 〈12港人案交檢察院 家屬無收通知 質疑官派律師作用 內地律師：審查起訴最長6個半月 - 20201128 - 港聞 - 每日明報 - 明報新聞網〉。web.archive.org。2020-11-28。歸檔時間2020-11-28。喺2021-01-10搵到。
{{cite web}}: CS1 maint: bot: original URL status unknown (link) - ↑ 〈10港人周一受審 不公開沒旁聽 家屬轟「秘密審訊」 促直播及公布判決書 - 20201226 - 要聞〉。《明報新聞網 - 每日明報 daily news》 (繁體中文)。喺2021-01-10搵到。
- ↑ 〈12港人蛇案完成審訊 10被告認罪 鹽田法院擇期宣判〉。《on.cc東網》 (香港中文)。喺2021-01-10搵到。
- ↑ 〈中新社：「12港人案」10人受審認罪 盼法庭輕判 - RTHK〉。news.rthk.hk (臺灣中文)。喺2021-01-10搵到。
- ↑ 〈12 港人案開審 鹽田法院：擇期宣判 有人大、家屬旁聽 多國領事代表被拒門外 | 立場報道 | 立場新聞〉。《立場新聞 Stand News》 (英文)。原著喺2021-01-12歸檔。喺2021-01-10搵到。
- ↑ 周皓宜。〈12港人判刑│兩未成年者返港 家屬稱神情緊張 避談看守所經歷〉。
- ↑ 〈12港人送中｜返港兩人神情緊張 避談關押經歷 鄒家成：好明顯受酷刑精神折磨 ｜ 蘋果日報〉。《Apple Daily 蘋果日報》 (香港中文)。原著喺2021-01-08歸檔。喺2021-01-04搵到。
- ↑ 23.0 23.1 聯合新聞網 (2020-11-08)。〈官派律師資料要不到 12港人家屬擬向深圳法院提訴訟 | 聯合新聞網：最懂你的新聞網站〉。《聯合新聞網》 (中文)。喺2021-01-04搵到。
{{cite web}}: CS1 maint: url-status (link) - ↑ 12港人｜內地律師任全牛、盧思位遭釘牌 家屬感謝二人接受委託 hk01 2021-01-04
- ↑ 協助12港人家屬的內地律師盧思位擬被吊銷執業證書 RTHK 2021-01-04
- ↑ 「12港人」律師將遭中國吊銷執照，關注組：「欲斷生計、殺雞儆猴」 互聯網檔案館嘅歸檔，歸檔日期2021年1月8號，. The News Lens 關鍵評論網 2021-01-05
- ↑ 〈12港人扣內地｜9人涉協助偷渡被捕 港人家屬憂資料來自公安逼供 (18:00) - 20201010 - 港聞 - 即時新聞 - 明報新聞網〉。web.archive.org。2020-10-21。歸檔時間2020-10-21。喺2021-01-16搵到。
{{cite web}}: CS1 maint: bot: original URL status unknown (link) - ↑ 王譯揚黃廸雯 (2021-01-15)。〈12港人｜11人涉協助罪犯獲保釋 黃國桐哽咽：律師唔會做犯法嘅事〉。《香港01》 (香港中文)。喺2021-01-16搵到。
- ↑ 〈李宇軒案件提堂 大狀羅達雄代表 李宇軒胞妹：非家屬安排律師 看報道「先知呢個人」 | 立場報道 | 立場新聞〉。《立場新聞 Stand News》 (英文)。原著喺2021-04-01歸檔。喺2021-04-03搵到。
- ↑ 〈12港人案喬映瑜承認製造管有爆炸品及意圖妨礙司法公正罪 - RTHK〉。news.rthk.hk (臺灣中文)。喺2024-01-11搵到。
- ↑ 〈謝偉俊：12人是港府敵人 ｜ 蘋果日報〉。《Apple Daily 蘋果日報》 (香港中文)。原著喺2021-02-12歸檔。喺2021-01-12搵到。
- ↑ 〈12港人送中︱港大生發起「開學文宣日」 籲師生寫明信片寄深圳聲援被羈押者 ｜ 蘋果日報〉。《Apple Daily 蘋果日報》 (香港中文)。原著喺2021-01-29歸檔。喺2021-01-21搵到。