Wikipedia:是日正文/2022年11月

出自維基百科,自由嘅百科全書
一班阿伯喺度捉棋。
一班阿伯喺度捉棋。

博弈論(game theory),粵文又有叫對策論或者賽局理論,係應用數學嘅一個分支領域,專門研究理性嘅決策者喺策略上嘅互動:博弈論會將一場博弈想像成一件數學上嘅物體,一場博弈由某啲規則同若干個參與者組成,每個參與者手上都有一柞可能選擇同埋特定嘅資訊,而對於一個參與者嚟講,佢每一個選擇都會引致某啲得失,呢啲得失由場博弈嘅規則話事;每一個參與者會想令自己嘅利益最多,並且按照呢條原則做決策。捉棋、打機、以至國際關係等好多嘅現象都涉及博弈,而原則上,所有人類之間嘅互動都可以想像成博弈,所以博弈論能夠應用落去所有嘅社會科學(尤其係經濟學政治學等)嗰度,解釋各式各樣嘅社會現象。到咗廿一世紀,就連邏輯學生物學電腦科學都會用到博弈論。

除咗俾人攞嚟做解釋性嘅研究,博弈論仲有俾人用嚟做一啲規範性嘅研究:有學者運用博弈論嚟分析喺某啲情況(例如係某啲使錢上嘅決擇)之下,一個參與者有邊啲選擇同埋應該要點樣做決策先至可以令到自身利益最多-有好多經濟分析師都興用博弈論分析企業彼此之間喺市場上嘅鬥爭,並且用呢啲分析嚟向企業提供營運方面嘅建議。

博弈論源於廿世紀初:博弈論係喺廿世紀上半橛由馮紐曼等嘅大數學家諗出嚟嘅,打後呢個理論喺廿世紀中期俾經濟學家生物學家用嚟分析佢哋各自嘅領域當中嘅現象,而且仲有多個經濟學家靠住佢哋用博弈論對經濟現象進行嘅分析攞到諾貝爾經濟學獎。到咗今日,博弈論上嘅發展令到佢出咗大量嘅專有概念同子理論,成為咗一門獨立於第啲應用數學領域嘅領域。 (成篇文章……)

以前嘅正文: 學習經濟學建築學