俄羅斯入侵烏克蘭戰爭入面同香港有關嘅事件

出自維基百科,自由嘅百科全書
跳去導覽 跳去搵嘢

俄羅斯入侵烏克蘭引起咗香港唔少討論,除咗引起一啲人對香港反送中運動嘅聯想之外[1],亦有啲親中派人散播不當言論被批評,另外,國際社會亦有聲音將入侵事件同中國對港政策相提並論。

香港網民反應[編輯]

喺戰爭期間,香港網民嘅討論甚為熱烈,除咗實時討論最新戰況、分享難民圖片、香港記者實地採訪經歷,甚至有人喺香港港發起聯署聲援,甚至聲言要加入烏克蘭軍隊作戰[2]。有一段短片喺香港社交媒體上廣為傳播,講述一位要留守戰場嘅烏克蘭父親送別女兒嘅場景。片段得到媒體人潘小濤轉載,佢又呼籲香港人要多啲關心烏克蘭,而沈旭暉亦形容呢次事件將烏克蘭同香港聯繫起來,又話《中英聯合聲明》被撕毀,其實就好似俄羅斯點樣撕毀同烏克蘭嘅條約一樣[1]。香港亦有人喺社交媒體上不但密切關注俄烏局勢,並出文响應烏克蘭方呼籲,捐款支援烏克蘭政府抵抗俄羅斯侵略。[3][4]

香港政界反應[編輯]

非建制派[編輯]

  • 因為北京單方面強行實施《港版國安法》而被逼流亡嘅前立法會議員梁頌恆同埋許智峯喺Facebook表示方別對烏克蘭支持,梁頌恆祝願烏克蘭戰士平安,武運昌隆[5],而許智峯就參與喺阿德萊德聲援烏克蘭嘅遊行。許智峯喺社交媒體上載嘅集會照片入面,亦有人支持烏克蘭嘅同時,舉起聲援香港嘅旗幟。[6]
  • 社民連喺3月6號去到俄羅斯駐港領事館抗議,要求俄軍滾出烏克蘭,社民連主席陳寶瑩又話,中國政府應向俄羅斯施壓,停止戰爭。不過,過程期間,有成十幾個警察喺度監視,結果陳寶瑩揶揄,點解連兩個人嘅請願都要如臨大敵[7]

親北京派[編輯]

  • 新民黨立法會議員李梓敬曾經喺俄烏局勢未全面惡化嘅時候英國影星戇豆先生嘅改圖,諷刺如果大家相信西方傳媒,指俄羅斯會入侵,咁就只能空等,揶揄西方傳媒散播假新聞,但隨著俄羅斯正式入侵後,李梓敬刪除帖文同改圖,但並無道歉或者解釋,被網民翻舊帳。《明報》有幾次嘗試聯絡李梓敬,亦不獲回應[8][9]
  • 俄羅斯有多間銀行因為支持普京嘅行動而被制裁,行政會議成員湯家驊形容做法係「西方霸權」為咗既得利益逼使俄羅斯就範,又話難保日後唔會用同樣手法逼使香港甚至中國就範。因為北京落實《港版國安法》而被流亡嘅前立法會議員羅冠聰就揶揄,話中國要反制國際社會,同世界主要經濟體脫鈎,自主研發科技同埋大量消化急速貶值嘅俄羅斯盧布[10]

其他公眾人物言論反應[編輯]

  • 無綫前體育主播伍家謙喺社交媒體提及自己收到一名認識烏克蘭體育記者朋友嘅訊息,呢位朋友忽然話要保護家園,遲啲先一齊打機嘅時候,淚水即刻跑出,佢又祝福對方平安[8]
  • 楊子俊創立嘅山道文化出版烏克蘭照片集,扣除成本後收益會全數捐贈烏克蘭政府或國際認可人道組織,以資助烏克蘭嘅人道主義救援[11]

車淑梅、朱庭萱因轉載以「夫妻比喻」形容俄烏關係文章被指責[編輯]

俄羅斯入侵烏克蘭後,車淑梅朱庭萱都分別轉載咗一篇形容俄羅斯烏克蘭喺前夫妻關係,稱俄入侵就好似像前夫保護兩個仔(東烏克蘭兩個分裂政權),結果惹來猛烈批評。

其中車淑梅喺2022年2月25號,俄羅斯入侵烏克蘭後兩日,車淑梅喺Facebook轉載呢篇文章,結果王喜暗指車淑梅係賤種,馮睎乾亦重提梁家輝當年點批評佢[12],形容佢係「八婆中的八婆」[13]。車之後刪文並道歉,又話祝願世界和平,但原文被網民備份流傳,其 Facebook 喺2022年2月26號調整留言設定,好友以外人士唔可以留言[14][15][16][17][18]。另外,亦有網民批評車淑梅刪除咗批評佢嘅留言[19]

朱庭萱轉載文章亦同樣被網民批評,但佢冇好似車淑梅咁道歉,反而話呢篇文章只係「嬉笑怒罵」,簡單解釋兩者烏恩怨,又話唔好屈佢支持俄羅斯,亦冇收返篇文章[19]

台北市議員梁文傑質疑烏克蘭軍人多謝香港人被批評[編輯]

內文:俄羅斯入侵烏克蘭戰爭入面同台灣有關嘅事件#梁文傑質疑烏克蘭軍人多謝香港人被批評

部分批評中國小粉紅聲援俄羅斯嘅聲音[編輯]

  • 前全國政協委員劉夢熊喺Facebook同網台訪問入面都強烈批評斥中國小粉紅為俄羅斯入侵叫好,係為虎作倀,必須譴責[9]
  • 專欄作家馮晞干係評論事件嘅時候,由八國聯軍嘅歷史開始講起俄國同蘇聯嘅侵華史,直斥支持俄國嘅中國人係「契弟」[9]
  • 沈旭暉喺社交網站提到,因應西方支持烏克蘭,中國小粉紅一窩蜂支持普京,北京亦明顯「同情」俄方,有啲藍絲網民就覺得同美國或者西方持相反意見就即係愛國,批評呢啲非黑即白嘅邏輯[20]

部分香港媒體報導同立場[編輯]

香港有啲親中媒體喺報導上偏向俄羅斯,對烏克蘭抱有批判態度。

  • 無綫新聞《世界觀》入面話『有評論認為』,今次事件係因為烏克蘭總統澤連斯基爭取加入北約,觸動俄羅斯神經,錯判形勢。不過,節目入面就冇交代到底係邊個評論。另外,節目入面亦花上一定篇幅批評澤連斯基嘅施政[21]
  • 文匯報》美化俄羅斯入侵行動,將入侵事件形容為係尋求使烏克蘭非軍事化和去納粹化,又話烏克蘭國民衛隊亞速營係新納粹組織,曾經有份參與香港反送中運動[22][23]

《東方日報》散播假新聞被波蘭駐港總領事館公開炮轟[編輯]

《東方日報》喺2022年5月27號,發佈假新聞,指波蘭想藉此吞併烏克蘭領土,結果被波蘭駐香港總領事館喺5月30號反擊,指說法係俄羅斯散布嘅不實資訊,呼籲大家唔好俾蒙騙。波蘭領事館又話,佢哋親身經歷過被占領嘅痛苦,並且永遠唔會承認,領土嘅改變能通過非法、無源無故嘅侵略而實現[24]

將入侵事件同中國對港政策比較嘅言論[編輯]

喺2月26號,美國駐日大使喺一個記者會入面形容,俄國嘅行為,類比中國對香港嘅作為,提到中國簽署《中英聯合聲明》,但為咗封殺民主聲音,話毀約就毀約,而俄國受明斯克和布達佩斯協議約束,同樣公然失信,仲試圖合理化開戰行為[25]

不過,親中派劉兆佳就話借烏克蘭類比為香港唔適當[2]

睇埋[編輯]

參考[編輯]

  1. 1.0 1.1 "從歷史到現實 中港台三地民眾如何觀察俄烏之戰". BBC News 中文 (中文). 2022-02-25. 喺2022-03-02搵到.
  2. 2.0 2.1 文維廣 (2022-03-01). "烏克蘭局勢︱港人關注事態發展 劉兆佳:香港與烏克蘭欠可比性". 香港01 (中文). 喺2022-03-02搵到.
  3. "東歐餐廳 Ivan The Kozak︱💙💛多謝大家呢幾日對烏克蘭嘅關注💙💛". Facebook (中文). 2022-02-27. 喺2022-03-02搵到.
  4. "Gunslinger 不曾遠去的硝煙 不再猶豫 不再觀望 立刻為烏克蘭捐款". Facebook (中文). 2022-02-27. 喺2022-03-02搵到.
  5. "Parasiuk Volodymyr 就係記錄片Winter on Fire 入面講「如果我哋接受咗政府既條件,我哋死去既隊友唔會放過我哋」呢句經典既人。願他和其他烏克蘭戰士都平安,武運昌隆。". Facebook (英文). 喺2022-03-04搵到.
  6. "身體力行,在我身處的城市,出席集會撐烏克蘭,以我們的自由,捍衛他們的自由。希望世界上的香港人,一起為烏克蘭集氣。我依然相信,我們每人一小步的努力,是可以慢慢令世界改變的。".
  7. "社民連到俄羅斯駐港領事館抗議 促俄軍滾出烏克蘭 | 獨媒報導". 獨立媒體. 2022-03-06. 喺2022-03-06搵到.
  8. 8.0 8.1 "【Emily】俄羅斯侵烏 李梓敬潛水 烏克蘭朋友保家園暫別 伍家謙淚湧 - 20220226 - 港聞". 明報新聞網 - 每日明報 daily news (中文). 喺2022-03-07搵到.
  9. 9.0 9.1 9.2 "中港大不同:中國人搶購俄羅斯食品以示支持 港人捐款聲援烏克蘭". RFI - 法國國際廣播電台 (中文). 2022-03-04. 喺2022-03-07搵到.
  10. "同意中國一定要反制國際社會,最好加速同世界主要經濟體脫鈎,自主研發所有尖端科技,大量消化急速貶值嘅俄羅斯盧布,禁止所有高官富豪子女投奔歐美敵對勢力,完成鎖國內循環大業🙌".
  11. "【Emily】「山道」出版烏克蘭相集 收益捐當地". 明報. 2022-03-01. 原先內容歸檔喺2022-03-29. 喺2022-03-30搵到.
  12. "原來車淑梅有d咁嘅賤種朋友,真係什麼嘢同什麼嘢做朋友。".
  13. "梁家輝鬧爆車淑梅".
  14. "車淑梅引用離婚夫婦比喻俄烏局勢惹批評 刪文再公開致歉". 明報 (中文). 2022-02-26. 喺2022-02-26搵到.
  15. "車淑梅引用離婚夫妻比喻俄羅斯烏克蘭 網民圍剿失言即刪post道歉". 香港01 (中文). 2022-02-26. 喺2022-02-26搵到.
  16. "車淑梅用離婚夫婦比喻俄烏局勢惹網民圍插 即刪文兼道歉". am730 (中文). 2022-02-26. 喺2022-02-26搵到.
  17. "【烏克蘭戰爭】借離婚夫妻比喻俄羅斯攻打烏克蘭 車淑梅被網民狂轟急刪Post道歉". 香港經濟日報 (中文). 2022-02-26. 喺2022-02-26搵到.
  18. "中港大不同:中國人搶購俄羅斯食品以示支持 港人捐款聲援烏克蘭". RFI - 法國國際廣播電台 (中文). 2022-03-04. 喺2022-03-07搵到.
  19. 19.0 19.1 "用離婚夫婦比喻俄烏局勢惹批評 車淑梅刪文致歉 - 20220227 - 娛樂". 明報新聞網 - 每日明報 daily news (中文). 喺2022-03-02搵到.
  20. 沈旭暉. "香港藍絲『焗撐』普京屠殺烏克蘭人民:為何墮落至此?".
  21. 無綫新聞. "專題節目 - 無綫新聞 - 澤連斯基由喜劇演員到總統". news.tvb.com. 喺2022-03-03搵到.
  22. "烏新納粹成俄打擊對象 曾受中情局訓練參與港黑暴". 香港文匯網 (中文). 喺2022-03-03搵到.
  23. "文匯報忘了跟黨走? 仍美化俄羅斯入侵行動、批評烏克蘭有人參與香港「黑暴」". winandmac.com 視麥媒體 (英文). 2022-02-28. 喺2022-03-06搵到.
  24. Storm.mg (2022-05-31). "波蘭企圖併吞烏克蘭領土?港媒散布俄羅斯假新聞 波蘭總領事館:不要被蒙騙-風傳媒". www.storm.mg (中文). 喺2022-05-31搵到.
  25. 民間全民電視公司 (2022-02-26). "俄羅斯毀約打烏克蘭 美駐日大使:如同中國對待香港". 民視新聞網 (中文). 喺2022-03-02搵到.