信貸違約掉期

信用違約掉期（Credit default swap，CDS）係種信用風險轉移契約，契約雙方包括信用違約風險保護買方（protection buyer）同信用違約風險保護賣方（protection seller）。

例

你有甲公司發行嘅面值100萬、5年期債券，如果驚甲公司違約，令你損失，你可以同乙公司（例如銀行），訂立信用違約掉期契約，年期通常有5年，代價係有效期內，你每年要畀銀行一筆固定嘅錢，叫 basis point spread，bps。例如100bps咁，即係你每年要畀100萬×100×0.01%，即係1萬蚊畀乙銀行，通常每季畀一次錢，即係每季你要畀乙銀行2500蚊。如果5年內都無任何信用違約，咁你得唔到任何賠償，乙銀行5年總共賺咗5萬蚊；之但係，假設響第二年甲公司違咗信用約（credit default），咁你一方面唔使再交保費畀乙銀行，乙銀行重要賠錢畀你。

賠

信用違約掉期賠法，通常有兩種，第一種係實物交收，即係乙銀行用100萬幫你買返甲公司嘅債券，無論甲公司債券，市價值幾多錢。第二種係現金結算，假設甲公司債券嘅剩餘價值（recovery value）係面值嘅20%，咁乙銀行會支畀你100萬×（1－20%），即係80萬銀。

保費

如果一間發債機構嘅信用評級調低咗，又或者市場預期，呢間發債機構嘅信用違約風險增加，咁呢間發債機構嘅債券，佢嘅信用違約掉期 bps 就會上升，換句話講，你要畀多啲保費，相反亦然。

OTC

信用違約掉期係喺所謂 OTC（over the counter）市場買賣，即係唔會經交易所買賣。