房地產

2018 年澳洲維多利亞州嘅一間屋；間屋、笪地同埋笪地有嘅天然資源加埋嘅總體就係一棟房地產。

房地產（粵拼：fong4 dei6 caan2），或者就噉簡稱地產，係財產一種。一棟房地產會包含

• 某笪土地、
• 該笪土地上面嘅建築物（例如屋）、加埋
• 該笪地有嘅天然資源（好似係水同泥土呀噉）。

房地產唔會包含笪地上面嘅動產：動產包括「郁得」嘅財產，即係件財產郁咗都唔會有損佢嘅價值，好似某人啲傢俬或者汽車都係佢嘅動產，而相比之下，某笪土地或者某間屋（簡化噉講）唔郁得，或者郁咗就會明顯影響佢嘅價值；因為房地產唔包動產，就算某人將佢啲傢俬擺喺佢擁有嘅屋裏面，啲傢俬都唔算係棟房地產嘅一部份。

法律定義

2017 年美國南卡羅萊納州一棟住宅

睇埋：財產、動產、不動產同建築物

正路嚟講，法律會對房地產呢隻詞（或者隻詞喺第啲語言入面嘅對應）作出定義。喺 2022 年，美國紐約州嘅康奈爾法律學院係噉樣定義房地產呢隻詞嘅：

粵文翻譯：房地產係（指）一笪土地，包埋任何永久噉結附喺笪土地上邊或者下邊嘅人造或者自然財產，例如係一棟住宅、一棟建築物、一樖樹或者礦物質。好似交通工具等嘅動產唔係房地產嘅一部份。

動產泛指啲「郁得」嘅財產，相對於不動產：

• 好似土地、建築物、樹、泥土蘊含嘅礦物質或者井等嘅財產正常情況下都係唔郁得嘅，或者郁咗就會明顯影響佢哋價值，例如一笪地位置近垃圾堆填區，住喺笪地嘅人成日受垃圾嘅臭味侵擾，較少人會想買該笪地（需求低），通常就會壓低呢笪地嘅價；如果家陣有位魔法師，佢施展魔法將笪地變去一個離垃圾堆填區遠嘅地方，就好可能會令該笪地嘅價升－呢笪地郁咗，佢嘅價值就明顯改變。
• 好似傢俬、交通工具（包括私家車同電單車等）或者個人電腦呢啲「郁得」嘅物品，都算係動產。房地產正常唔包動產－噉亦即係話，想像某個人因為想移民而賣咗自己棟房地產，法律上佢只係賣緊佢笪地同地上便嗰間屋，間屋入面啲傢俬依然係屬於佢嘅，除非佢做買賣嗰陣，講明將啲傢俬賣埋俾對方；正路嚟講，佢頂攏淨係有義務要喺限時內將啲傢俬搬走。

投資用途

睇埋：理財

自從廿世紀中，房地產就一路都被視為有用嘅投資：由於通脹等嘅現象，有返咁上下識理財嘅人都會想用自己嘅儲蓄買一啲有升值潛力嘅財產，而唔係淨係儲住啲錢；事實亦表明，房地產有升值潛力，買咗仲可以攞嚟住，所以好多人以至企業都會買房地產嚟做投資，甚至買咗啲房地產之後唔住喺入便。據估計，喺 2020 年代初嘅美國，房地產市場嘅總值去到過萬億美金咁多。

因為房地產咁重要，房地產嘅相關課題自然引起咗唔少經濟學同金融學工作者嘅關注。呢啲工作者會剖析房地產市場嘅運作，想知要點預測房地產市場嘅變動，亦想知要用乜政策先可以有效管控房地產市場等等。

睇埋

• 睇屋
• 裝修
• 室內設計
• 建築施工

拎

• （英文） 唔同嘅投資房地產方式，投資百科