報喪女妖

1825 年一幅圖畫；幅畫描繪畫畫人想像中嘅報喪女妖。

報喪女妖（英文：banshee，讀音似粵拼：ben1 shi4，嚟自愛爾蘭蓋爾文：Bean Sidh，大致係仙子女噉解）係愛爾蘭民間故仔入面嘅一種靈，有陣時亦都會當做仙子嘅一種。報喪女妖嘅特徵係會以陰沉、著黑衫嘅女性噉嘅形象現身，而每當佢哋現身嗰時，就表示有人就嚟要死。

特徵

廿一世紀初有個後生女喺度 cosplay 扮報喪女妖－淨係「個樣似後生女唔係似老女人」呢點已經唔似傳統嘅報喪女妖。

睇埋：仙子同鬼魂

報喪女妖最大嘅特徵係會預告死亡：根據民間傳說，當一個人就嚟要死嗰陣，報喪女妖就可能會現身；隻報喪女妖會喺即將要死嗰個人屋企外尖叫或者喊，而佢嘅叫聲往往會令周圍嘅人不寒而慄；外形上，報喪女妖多數會係年老嘅女人、似鬼魂、著住長同灰黑色嘅斗篷、長頭髮、而且對眼因為喊得多而紅嗮。

根據多數故仔嘅描述，報喪女妖冇惡意唔會害人，不過始終佢哋出現表示就嚟有人死，所以啲人普遍都唔多想見到佢哋。

現代

廿一世紀嘅奇幻故仔有時會提到報喪女妖，而且報喪女妖嘅形象仲出現咗變化，例如有啲作品會對報喪女妖條橋段作出創新，做出「報喪女妖唔係死亡嘅先兆，而係帶嚟死亡嘅惡靈，聽到佢哋嘅叫聲會引致死亡」噉嘅設定。

睇埋

• 死靈
• 死神
• Macabre