跳去內容

歷史嘅垃圾時間

改拎
出自維基百科，自由嘅百科全書

歷史嘅垃圾時間（中文：歷史的垃圾時間）係中華人民共和國嘅潮流用語、網絡用語、史觀、概念同埋迷因。呢個詞喺2024年7月起開始喺中國流行，用嚟形容國家或地區嘅經濟或者政治狀況已經嚴重惡化，而且無辦法扭轉局勢，最終會走向失敗嘅時期。

「垃圾時間」原自英文嘅「garbage time」，原係喺體育用嘅術語，意思係喺一場比賽嗰度，雙方嘅得分相差好遠，好難可以喺跟住嘅時間改變勝負結果，剩餘嘅比賽時間基本上喺無用嘅[1]。喺呢個時候，教練好多時都會改派一啲候補嘅人上場，一嚟可以俾啲無乜經驗嘅球員可以練習，二嚟可以俾啲主力球員休息[1]。

起源

[編輯]

「歷史的垃圾時間」呢一個叫法，最早係喺2024年7月左右喺中國大陸嘅網絡上廣泛流傳。不過最初點解咁叫，就有唔同嘅講法，有人話係嚟自奧地利經濟學家米塞斯（Ludwig von Mises）嘅經濟學概念[2]：「從經濟學嘅邏輯嘅角度嚟睇，當某段歷史嘅趨勢同經濟規律背道而馳，任何個人都無可能可以改變，而且係必然會走向失敗嘅階段，就會被定義做『歷史的垃圾時間』[3]。」中國人民大學重陽金融研究院嘅執行院長王文喺佢寫嘅文章嗰度指出，米塞斯嘅著作之中並無「歷史的垃圾時間」呢一個叫法，佢形容話「歷史的垃圾時間」係米塞斯開始用嘅叫法係「赤裸裸的假冒偽學術用詞」[1][4]。

呢個詞其實係出自廣州《羊城晚報》編輯胡文輝喺2023年9月發表嘅評論文章《歷史嘅垃圾時間，文化嘅悠長假期》嗰度[5][6][7][8]。2023年11月，署名清和社長嘅作者發表咗標題叫《如何渡過歷史嘅垃圾時間》嘅網上文章，用嚟回應胡文輝嘅觀點，其引用咗米塞斯等經濟史學者嘅觀點同理論，進一步解釋「歷史嘅時間垃圾」呢個概念[8]。

背景

[編輯]

喺2024年7月，中國經濟面臨嚴峻挑戰。雖然官方數據顯示上半年 GDP 增長5.0 %[9]，不過呢個數據唔太多人相信，好多間媒體都指出，實際嘅中國經濟情況並唔樂觀[6][5][7][10]。史丹福大學教授羅斯高（Scott Rozelle）喺美國智庫戰略與國際研究中心（Center for Strategic and International Studies）嗰度指出，中國人面臨失業、貧窮等問題[11]，啲人對經濟前景嘅信心大幅下降，消費者唔願意使錢，企業唔願意投資，呢種信心危機喺度形成緊一種惡性循環[6][5][7][10]。

美國之音引用評論指出，中國人喺中華人民共和國領導人習近平統治之下，經歷咗2019年武漢肺炎大爆發，佢嘅「親自指揮、親自部署」，令到中國經歷咗三年嘅動態清零政策，後果係令到中國經濟受到重創。中國政府唔俾啲人民對習近平嘅政策作出批評，甚至相關嘅關鍵詞亦都成為敏感詞，唔俾用[2]。當其他國家走出武肺疫情嘅影響，逐步開放，經濟開始復甦嘅時候[12][13]，中國去到2022年3月，經濟火車頭嘅上海仲要面對封城問題[14][15]，令到有錢有能力走嘅人都「潤」（移民外國）咗，而年輕人先係「內卷」，然後一係開始諗移民，一係就「躺平」[16][17]，甚至「擺爛」[17]。

而中國嘅年輕人需要面對呢個現實，佢哋意識到中國經濟係呢種情況之下比日本泡沫經濟爆破後嘅「失去的三十年」時期更加惡劣，而中國政府睇落又好似無辦法對應，加上一系列包括「內捲化」等內部問題，部份中國年輕人覺得自己無能力去改變自己嘅處境，只可以接受現狀，只能夠選擇以「躺平」嘅消極嘅悲觀主義心態去迴避現實[5]。

另一方面，有錢嘅中國民眾開始有移民海外嘅舉動，想脫離中國嚴峻嘅政治同經濟環境，出現咗所謂嘅「潤學」現象[18][19]。中國人喺去外國申請庇護嘅人數亦都上升緊，更多嘅中國中產用逃避政治迫害嘅理由申請政治庇護；美國之音引述聯合國難民署嘅數據話，喺2023年，單係喺英國，申請庇護嘅中國人就有2384人[20]。

詞義

[編輯]

雖然「歷史的垃圾時間」嘅一個詞嘅來源有啲爭議，不過「歷史的垃圾時間」呢個裡面嘅「垃圾時間」就毫無疑問係源自體育術語「垃圾時間」，指嘅係比賽賽果已成定局，剩餘比賽時間已經係可有可無，因為點都無辦法可以改變比賽嘅結果[11]。將呢個概念借用嚟描述歷史上嘅一個時期，意思係之前嘅決策錯誤，喺長期執行之下，已經走到某個關鍵點，無得返轉頭，成件事嘅總體方向已經無可避免咁繼續向錯嘅方向走，即使個人點樣努力，都無辦法改變結局[5]。

當大局已定，無論你如何努力，失敗都是不可避免的，那只是徒勞的掙扎。

——胡文輝[6]

根據胡文輝嘅講法，佢定義1979年蘇聯入侵阿富汗之後嘅蘇聯同埋黃巢民變之後嘅唐朝都係「歷史的垃圾時間」[5][6]。胡文輝喺佢嘅評論文章嗰度指出，雖然蘇聯喺1991年解體，但係真正觸發佢嘅解體係由1979年入侵阿富汗開始。蘇聯總統戈巴卓夫只係加速咗「垃圾時間」嘅結束[7]。

根據清和社長嘅講法，「歷史的垃圾時間」嘅特點係對思想同言論自由嘅壓制[8]：

每當歷史進入垃圾時間，最先倒下的永遠是文化人、思想者。每一輪文化浩劫就像歷史的複讀機：從尖銳的批評聲消失，到沉默將被認為居心叵測，然後是讚美不夠賣力也是一種罪，最後只留下一種聲音：謊言。

——清和社長[8]

而電影編劇曾鳴[21]就認為，「內捲化」係喺「歷史的垃圾時間」所產生嘅一種變異處世之道[8]。胡文輝喺文章嗰度建議，如果啲人身處喺「歷史的垃圾時間」，佢哋所發出嘅種種聲音同做嘅種種努力，都對時局無影響，係無濟於事嘅。啲人唯一可以做嘅係，根據美國經濟學家赫舒曼（Albert Otto Hirschman）提出嘅概念 —— 「退出」，或者用中國嘅概念「躺平」，嚟拒絕「歷史的垃圾時間」，將「歷史的垃圾時間」當做「文化的悠長假期」[8]。

評論

[編輯]

路透社指胡文輝呢篇已經俾當局屏蔽咗嘅文章入面對1979年之後嘅蘇聯同中國唐朝嘅歷史陳述表明，有啲歷史失敗係必然嘅，有啲評論員嘅解讀係呢啲陳述其實係佢對時事嘅隱含評論[10]。胡文輝喺佢嘅文章嗰度提出咗兩個問題:「那麼，不幸而遭遇歷史垃圾時間的人們，又該如何自處呢？」同埋「是不是要跟時間的垃圾同歸於盡呢？[7]」

呢個詞流行喺三中全會嘅前夕，引起包括新華社[22]在內嘅各個中國官方媒體嘅批評。 《北京日報》發表咗評論員文章，形容「歷史的垃圾時間」呢個詞係「偽學術、炒概念、強行炮製焦慮」，目的係以陰陽怪氣嘅方式借題發揮，影射「無奈無望」，意圖否定中國嘅一切[4]。

曾經擔任《環球時報》前編委兼專欄作家，依家係中國人民大學重陽金融研究院執行院長王文喺《觀察者網》嗰度寫咗一篇文章，承認呢個詞反映咗中國人對經濟下行嘅情緒反應，但佢認為呢個詞比「躺平」更加危險，因為呢個詞其實係否定咗中國嘅發展，誘導民眾預期中國將會面向失敗，令到民眾會以消極嘅態度去面對將來[4]。

《北京日報》批評「垃圾時間論」係偽學術概念，認為炒作呢一個概念係對國家發展嘅唱衰，係「陰陽怪氣」嘅表現。評論員「京評」話，佢將「個別」案例誇大成為普遍規律，強行製造焦慮情緒；《北京日報》話中國經濟發展並非一帆風順，每個階段都有挑戰，但係中國人從未放棄努力，取得咗舉世矚目嘅成就[23][24]。 需要留意嘅係，《北京日報》呢篇文章基本上係「帶風向」，佢並無討論「垃圾時間論」嘅原因，亦都無用邏輯去辯駁「垃圾時間論」背後嘅論點（例如經濟下行，房地產市場大跌，年青人面對搵工難、減薪、壓力等問題[25]），更加無提出實際嘅解決辦法[23]。

中國人民大學嘅王文就認為，「垃圾時間論」試圖「完全否定當下中國嘅發展狀況」，「營造國家終將失敗嘅預期」。佢喺文章嗰度亦都同意「垃圾時間論」的確係折射咗依家好多民眾嘅情緒共鳴，同埋喺經濟下行期間嘅社會心理。不過佢又認為，用呢個詞嚟描述依家嘅經濟同社會狀況唔單止誤導公眾，仲加劇咗對經濟嘅影響，同埋下行嘅悲觀情緒。佢引用法國歷史學家布勞岱爾（Fernand Braudel）嘅理論，認為中國正處於一個「偉大的歷史的關隘時刻」，指出個人應該喺歷史嘅關鍵時刻進行自我調整同創新，推動社會進步，而唔係消極躺平[26][27]。

美國聖湯瑪斯大學國際研究講座教授葉耀元指出，對比起「躺平」呢個詞，「歷史的垃圾時間」更進一步有睇衰中國嘅意思[28][29]。紐約艾德菲大學（Adelphi University）文理學院院長、政治學教授王維正就指出，用呢個詞嚟形容對中國未來嘅觀感，有預知佢嘅結局，而且無力回天嘅意思，代表中國改革開放走入死路嗰度[28][29]。

中國政治學者劉軍寧形容「歷史的垃圾時間」呢一個概念等同於俾習近平政權判咗死刑。劉軍寧指出，習近平破壞咗中國改革開放嘅唯一成果 —— 領導人任期限制。喺佢對中國嘅十年統治期間，習近平清除黨內異己，並實施歷時嘅三年清零政策，導致中國多個產業崩潰，外資紛紛撤退；中國民眾同埋國際社會對佢嘅政權失咗信心。無論習近平再做啲咩，都改變唔到「歷史的垃圾時間」嘅趨勢[30]。

《經濟觀察網》評論員馬向陽話，「歷史的垃圾時間」係一個相對嘅概念，並且包含社會盛衰之間嘅週期性變化。意味著唔同時期嘅「垃圾時間」會有唔同嘅特徵同影響。如果啲人生活喺呢個大變革嘅時代，個體生命都顯得特別短暫同埋變幻無常，所以喺「歷史的垃圾時間」，啲人應該盡量活得精彩啲[31]。不過呢篇文章只係宣傳盲目樂觀，並無講出問題嘅起因，又無點出問題係乜，亦都無提出解決方法。

睇埋

[編輯]

參考

[編輯]
  1. ↑ 1.0 1.1 1.2 〈中国人民看衰未来不满困境　"垃圾时间"成流行词〉。《自由亚洲电台》。2024年7月12號。喺2024年9月15號搵到。{{cite web}}: CS1 maint: url-status (link)
  2. ↑ 2.0 2.1 金哲 (2024-07-17)。〈中国网络观察: 官民争议"历史的垃圾时间"〉。《美國之音》 (中文)。喺2024-07-18搵到。
  3. ↑ 〈中國網民熱議「歷史的垃圾時間」 官媒抨擊：陰陽怪氣〉。《光傳媒》 (中文)。2024-07-12。喺2024-07-18搵到。
  4. ↑ 4.0 4.1 4.2 紀曉華 (2024-07-12)。〈中國觀察：官媒反擊「歷史的垃圾時間」〉。《星島日報》 (中文)。喺2024-07-18搵到。
  5. ↑ 5.0 5.1 5.2 5.3 5.4 5.5 〈經濟崩壞．短評｜中國進入「歷史的垃圾時間」惹熱議遭官媒狠批  何時完場仲有幾折騰值深思〉。《追新聞》 (中文)。2024-07-15。喺2024-07-18搵到。 {{cite web}}: no-break space character in |title= at position 30 (help)
  6. ↑ 6.0 6.1 6.2 6.3 6.4 夏榕 (2024-07-17)。〈三中全會企圖重振經濟 網民悲觀熱議"垃圾時間"慘遭審查〉。《法新社》 (中文)。喺2024-07-18搵到。
  7. ↑ 7.0 7.1 7.2 7.3 7.4 Jennifer Zeng (2024-07-17). "Glimpse Into the Chinese 'Garbage Time of History'". Japan Forward (英文). 喺2024-07-15搵到.
  8. ↑ 8.0 8.1 8.2 8.3 8.4 8.5 Oiwan Lam (2024-07-19). "Chinese social media users call this age "The Garbage Time of History"". Global Voices (英文). 喺2024-07-20搵到.
  9. ↑ 〈透视2024年中国经济"半年报"〉。《新華社》 (中文)。2024-07-15。喺2024-07-18搵到。
  10. ↑ 10.0 10.1 10.2 Joe Cash (2024-07-17). "'Garbage time': China's slump spins out new meme of economic despair". Reuters (英文). 喺2024-09-15搵到.{{cite web}}: CS1 maint: url-status (link)
  11. ↑ 11.0 11.1 陳家齊 (2024-07-17)。〈「歷史垃圾時間」 中國網路用語顯露出對經濟前景極度悲觀〉。《太報》 (中文)。喺2024-07-18搵到。
  12. ↑ "Timeline of UK government coronavirus lockdowns and restrictions". Institute for Government (英文). 2022-12-09. 喺2024-09-16搵到.
  13. ↑ CDC (2023-03-15). "CDC Museum COVID-19 Timeline". Centers for Disease Control and Prevention (美國英文). 喺2024-09-16搵到.
  14. ↑ 〈上海封城一个月：官方坚持"动态清零"政策不变 如何解除危机〉。《BBC News 中文》 (簡體中文)。2022-04-28。喺2024-09-16搵到。
  15. ↑ 〈封城下的上海〉。The New York Times。2022年5月4日。喺2024年9月16日搵到。{{cite web}}: CS1 maint: url-status (link)
  16. ↑ 〈上海封城掀"润学"讨论：中国年轻人在内卷后开始移民？〉。《BBC News 中文》 (簡體中文)。2022-06-13。喺2024-09-16搵到。
  17. ↑ 17.0 17.1 〈"躺平、内卷、润、摆烂"流行背后：不给年轻人以未来，将是整个社会的失败〉。news.ifeng.com (中文)。喺2024-09-16搵到。
  18. ↑ 王允 (2022-07-11)。〈中国润潮乍起 为安全感、自由和做个正常人〉 (中文)。RFA。原著喺2022-11-01歸檔。喺2022-08-20搵到。
  19. ↑ 〈上海封城掀「潤學」討論：中國年輕人在內卷後開始移民？〉。《BBC News 中文》 (繁體中文)。2022-06-13。喺2024-09-15搵到。
  20. ↑ 〈中国人在英申请庇护人数上升: 更多中产出走为避政治经济压迫〉。《美国之音》 (中文)。2024-08-31。喺2024-09-15搵到。
  21. ↑ 上海唯眾傳媒嘅首席導演
  22. ↑ 袁媛、嚴紅蘭 (2024-07-17)。〈新华时论丨历史何来垃圾时间〉。《新華社》 (中文)。喺2024-07-18搵到。
  23. ↑ 23.0 23.1 〈新闻我来说｜"历史的垃圾时间"？真耶假耶？〉。xinwen.bjd.com.cn。喺2024-09-15搵到。{{cite web}}: CS1 maint: url-status (link)
  24. ↑ 〈锐评｜"历史的垃圾时间"？真耶假耶？_京报网〉。news.bjd.com.cn。喺2024-09-15搵到。
  25. ↑ 网易 (2024-07-03)。〈闹大了！网传中金一女员工因降薪跳楼，浙大研究生毕业，年仅30岁〉。www.163.com。喺2024-07-17搵到。
  26. ↑ 〈王文：现在真的是"历史的垃圾时间"吗？〉。www.guancha.cn。喺2024-07-16搵到。
  27. ↑ 〈人大重阳网 现在真的是"历史的垃圾时间"吗？〉。rdcy.ruc.edu.cn。喺2024-07-16搵到。
  28. ↑ 28.0 28.1 聯合新聞網。〈三中全會前夕 民眾看衰經濟 「垃圾時間」成流行語〉。《聯合新聞網》 (中文)。喺2024-09-15搵到。
  29. ↑ 29.0 29.1 〈中共三中全會前夕中國民眾看衰經濟！「歷史的垃圾時間」成流行語〉。Yahoo News (中文)。2024-07-14。喺2024-09-15搵到。
  30. ↑ 陳維健 (2024–02)。〈【老陳時評】歷史的垃圾時間還剩多少？〉。《歐洲之聲》 (中文)。喺2024-07-18搵到。{{cite web}}: CS1 maint: date format (link)
  31. ↑ 馬向陽 (2024-02-09)。〈穿越"历史的垃圾时间"〉。《經濟觀察網》 (中文)。喺2024-07-18搵到。
由「https://zh-yue.wikipedia.org/w/index.php?title=歷史嘅垃圾時間&oldid=2187666」收